نێچیرڤان بارزانى دێ چیتە بریتانیا
گاڤ نیوز
وەزیرێ دەرڤە یێ بریتانیا ب فەرمى نێچیرڤان بارزانى، سەرۆکێ هەرێما کوردستانێ داخواز کرە بریتانیا، هەروەسا راگەهاند، بودجەیەکا تایبەت ژى بۆ هێزێن پێشمەرگەى تەرخان کریە.
ئەڤرۆ ل هەولێرێ نێچیرڤان بارزانى پێشوازى ل دۆمێنیک راب وەزیرێ دەرڤە یێ بریتانیا کر و پشتى کۆمبونێ د کۆنگرەیەکێ رۆژنامەڤانى دا بارزانى راگەهاند، هەر ئێک ژ گەشەپێدانا پەیوەندیێن بریتانیا و هەرێما کوردستانێ و ئیراقێ، هەروەسا کێشەیێن ناڤبەرا هەولێر و بەغدا و بزاڤا چارەکرنا وان، شەڕێ دژى تیرۆرێ و مەترسیا سەرهەلدانا وان و بهێزبوونا داعشێ و هەلبژارتنێن بهێت یێن ئیراقێ و رەوشا ناوچێ ب گشتى و چەندین بابەتێن جهێ گرنگیا هەر دو ئالیان هاتنە بەحسکرن.
نێچیرڤان بارزانى گۆت ژى: پەیوەندیێن هەریمێ ل گەل بریتانیا بلند د نرخینن و هەڤپشکیا خەلکێ هەرێمێ ل گەل گەلێ بریتانیا ٣٠ سالان بەرى نوکە دەستپێکریە و ژ وێ سالێ تا ئەڤرۆ پەیوەندیێن هەرێم و بریتانیا بەردوامن.
ژ ئالیێ خۆڤە وەزیرێ دەرڤە یێ بریتانیا دوپاتکر، بریتانیا دۆستا مللەتێ کوردە و رۆلێ پێشمەرگەى ل دژى داعشێ بلند نرخاند و گۆت: بریتانیا پابەندە ب پەیوەندیا دۆستاتیێ ل گەل هەرێمێ و دلخۆشین هێزێن پێشمەرگەى ل گەل سوپایێ ئیراقێ بۆ دەرخستنا داعشێ ژ جهێن ناکۆکى ل سەر کار دکەت.
دۆمێنیک راب ئاشکراکر ژى، بریتانیا دێ بودجەیەکا نوى بۆ هێزێن پێشمەرگەى تەرخان کەت بۆ پاراستنا سامان و کلتۆرى و ئەو بودجەیە ژى د چارچۆڤێ رێککەفتنا لاهاى دایە.
وەزیرێ دەرڤە راگەهاند، کو نێچیرڤان بارزانى ب فەرمى بۆ بریتانیا بۆ باشترکرنا پەیوەندیێن هەر دو ئالیان هاتیە داخوازکرن و ل نێزیک دێ سەرا بریتانیا دەت.
تُتاح هذه الصورة أيضا في: کوردی