جاما ئەفریقیا.. 6 رۆژێن پڕی شاشی
گاڤ نیوز:
دەمێ 6 رۆژانە جاما کیشوەرێ ئەفریقیا یا تەپاپێی ل کامیرۆنێ دەستپێکری، لێ تا نوکە گەلەک شاشی د وێ جامێ دا هاتینە دیتن کو زوی ب زوی د یاریێن تەپاپێی یێن فەرمی دا ناهێنە دیتن.
د ئێک ژ یاریان دا کو د ناڤبەرا مسرێ و نایجێریا دا بوو، تەپا یاری پێ دهاتە کرن، سێ جاران هاتە گوهۆڕین و پشتی یاریێ دیار بوو کو تەپە ب دروستی نەهاتبوونە پڤدان.
د یاریا هەلبژارتیێ توونسێ و مالی دا شاشیەکا دیرۆکی چێبوو و دادڤانێ ئێکێ یاری ل خۆلەکا 85ێ بدوماهی ئینا و پاشی ل بڕیارا خۆ لێڤەبوو، لێ هەر نەهێلا دەمێ یاریێ ب دروستی بدوماهی بهێتە و ل خۆلەکا 89ێ یاری بدوماهی ئینا. هەرچەندە دادڤانێ 4 بریار دا یاری بەردەوام ببیتە ڤە، لێ یاریکەرێن توونسێ رازی نەبوون بهێنە د یاریێ دا ڤە.
چێبوونا کێشەیان د یاریا توونسێ و مالی دا بوو ئەگەر کو یاریا د ناڤبەرا مۆریتانیا و گامبیا دا 45 خۆلەکان بهێتە پاشخستن و ئەگەر بتنێ ئەو بوویە کو یاری دا د هەمان یاریگەهـ دا هێتە کرن و د جامێن جیهانی و کیشوەری دا ئەڤ بابەتە جهێ قەبویلکرنێ نینە و نابیت دو یاری د دویڤ ئێک دا ل هەمان یاریگەهـ بهێنە کرن.
یاریکەرێن هەلبژارتیێ مۆریتانیا د یاریا خۆ یا ئێکێ دا سەرسۆرمان بوون پشتی دیتی کو سروودا وان یا نشتیمانی یا کەڤن هاتە لێدان و پشتی وان خۆ نەرازیکری، جارەکا دی سروودا وان یا نشتیمانی هاتە لێدان، لێ هەر یا دروست نەبوو و جارا سێیێ ژنوی سروودا وان یا نشتیمانی ب دروستی هاتە لێدان.
د یاریەکا دی دا سەرۆکێ ئێکەتیا تەپاپێی یا ئەفریقی ل ناڤ جەماوەری ئامادە ببوو، لێ نڤست بوو و ئاگەهـ ژ یاریێ نەبوو.
بەری یاریا جزر ئەلقەمەر و مەغربێ، گۆلپارێزێ مەغربێ و یانەیا سڤیلیا یا ئسپانی یاسین بۆنۆی کۆنگرەیەکێ رۆژنامەڤانی هەبوو، لێ دەمێ وی بەرسڤا رۆژنامەڤانان ددا، نوینەرێ لژنەیا رێکخەر داخواز ژ وی کر کو ب زمانێ ئنگلیزی یان فڕەنسی بەرسڤێ بدەت، هەرچەندە بۆنۆ زمانێن ئنگلیزی، فرەنسی و ئسپانی ب باشی دزانیت، لێ وی داخوازی رەت کر و گۆت: کێشەیا وی نینە زمانوەرگێڕ ل کۆنگرەیێ رۆژنامەڤانی نەبیت.
تُتاح هذه الصورة أيضا في: کوردی