زارۆكێن ئێزدیان تووشی شوشتنا مێشكی بووینە ژلایێ داعش ڤە
خالد خدر
چەكدارێن رێكخراوا تیرۆرستێن (داعش ) ب هەزارا زارۆكێن ئێزدیان گرتن و رەڤاندن وبرنە مووسل و تللەعفەر و رەققایێ ، و دئەنجامدا ئەو زارۆكێن رەڤاندیێن ئێزدیان كرنە دناڤ هندەك سەربازگەهێن تایبەت دا وچەكدار كرینە و مەشق و راهێنان پێ كرینە، وفێری هزرێن تووندڕەوی و تیرۆرستی كرن دناڤا وان سەربازگەهان دا ، ژبلی ئەشكەنجەدانا هندەكا وكوشتنا هندەكێن دی ، ئەڤا هاتیە ئەنجامدان ل دژی زارۆكێن ئێزدیان دووری هەر بەها و بنەمایەكێ مافێ مرۆڤی و زارۆكی یە.
ب مخابنی ڤە هەتا نۆكە رێكخراو و سازیێن نیڤ دەولەتی یێن تایبەت ب مافێ زارۆكی ڤە هیچ پێنگاڤەك نە هاڤێتینە دەربارەی رزگاركرنا زارۆكێن ئێزدیان یێن لبن دەستێ درندەیێن داعش دا ، ژیانا وان زارۆكێن هەنێ لبن مەترسییەكا گەلەك مەزن دایە ئەگەر ل وەختەكی نێزیك نەئێنە رزگاركرن ژ دەستێ تیرۆرستێن داعش ، و گرۆڤە بۆ ڤێ چەندێ ل بەریا حەفتییەكێ ل گرتە ڤیدیۆیەكێ دا دوو زارۆكێن ئێزدی دیار بوون كو ژلایێ تیرۆرستێن داعش ڤە هاتبوو پەخشكرن ، و خۆ بەرهەڤ دكرن ژ بۆ خۆپەقاندنێ ، ئەڤە چەندە گەلەك یە ب مەترسی یە ، چنكو ئەڤ نموونە دێ ئێنە دووبارەكرن و گەلەك كریارێن دی یێن ب ڤی شێوەیی ئێنە ئەنجامدان ژلایێ داعش ڤە ، ب رێیا ڤان زارۆكێن بێ گونەه وبێ دەستهەلات ، بەریا نۆكە كەس وكارێن ڤان زارۆكا و هەروەسا هەموو ئێزدیان ب تایبەتی چالاكڤانێن بیاڤێ مافێ مرۆڤی و میدیاكارا داخواز كر بوو ژ رێكخراو وسازیێن نێڤ دەولەتی و نێڤ نەتەوەیی یێن تایبەت ب مافێ مرۆڤی وزارۆكی، كو هەموو هێز و شیانێن خۆ بدەنە كاری ژ بۆ رزگاركرنا ڤان زارۆكێن گرتیێن لبن دەستێ وان هۆڤان دا، بەلێ جهێ داخێ یە كو هیچ پێنگاڤەكا كارا ژ بۆ ڤی باەتی نەهاتە هاڤێتن ، تاكو رەوشا وان گەهشتییە ڤی رادەی ، ورۆژ بۆ رۆژێ رەوشا وان زارۆكا خراپتر لێتێت ، ب تایبەتی پشتی شەرێ ئازادكرنا مووسلێ و ب تایبەتی ئالیێ راستێ ، كو داعش دێ وان زارۆكا بكارئینت بۆ كریارێن خۆ كوشتنێ و خۆ پەقاندنێ ل دژی هێزێن لەشكەری و ئاسایشێ یێن عیراقێ.
ئەگەر ئەڤ زارۆكێن ئێزدیان یێن گرتیێن لبن دەستێ داعش ب زوترین وەخت نەئێنە رزگاركرن ، دێ چارەنڤیسێ وان بەرزە بت و پێشەرۆژا وان بەرەف نەمانێ ڤە چت ، كو زارۆكێن ئێزدیان تووشی شوشتنا مێشكی بووینە ژلایێ داعش ڤە ،و هەموو هزر وبیرێن خۆ یێن گەنی ب خورتی كرینە د مێشكێ وان دا ، و هەموو هەستێ وان تێكدایە و سەروبن كرینە ، و گوهۆرینەكا رەهایی ل سەر كەسایەتییا وان زارۆكان كرییە ، هیڤیدارین ب زوترین وەخت ئەو بێنە رزگاركرن لبن دەستێن وان هۆڤا ، لەورا داخوازی وگازیێن خۆ دگەهینینە هەموو رێكخراو و سازیێن نێڤ دەولەتی یێن مافێن مرۆڤی وزارۆكی ، كو هەولێن كارا بكن ژبۆ رزگاركرنا ڤان زارۆكان وهەول وشیانێن خۆ بكەنە ئێك و بدەنە كاری ژبۆ ڤێ مەبەستێ ،و هەروەسا داخوازی و گازیێن خۆ دگەهینینە هەردوو حكومەتێن عیراقێ و هەرێما كوردستانێ بۆ رزگاركرنا ڤان زارۆكێن ئێزدیان لبن دەستێن داعش.
تُتاح هذه الصورة أيضا في: کوردی