رەوش نەیا گونجایە خەلكێ شنگالێ ڤەگەرت
بەختیار قادر
دوو سال و نیڤ ل سەر كارەساتا ب سەرێ ئێزدیان ل شنگالێ دا هاتی ل سەر دەستێ رێكخراوا تیرۆرستیا داعشێ دەربازبوون،هێشتا ب هەزارەهان گرتیێن ئێزدی د دەستێ تیرۆرستان دانە و ب هەزارەهان ئاوارەنە و دژیانەكە ب زەحمەت دا دژین،پشتی ناوچەدارییا سنوونێ و چەند دەڤەرێن شنگالێ ل سەر دەستێ هێزێن پێشمەرگەی هاتینە رزگاركرن و ئارامی ل دەڤەرێ بەرقراربووی ب تایبەت ل سنوونێ،بەحس دئێتە كرن كو بۆچی خەلك ناڤەگەرتە سەر مال و ملك و جهێن خۆ،دهەمان دەم دا هێشتا چەند دەڤەرێن قەزایێ نەهاتینە رزگاركرن و دەست ب ئاڤەدانكرنێ نەهاتیە كرن و كێماسی دچەندین بیاڤێن دیتر یێن ژیانێ دا هەیە، هەموو دزانن رەوش نەیا گونجایە و بۆچی خەلك دئێتە هاندان كو ڤەگەرن.
قەزا شنگالێ هێشتا دەڤەرەكا وێرانكرنێ یە و چەندین كار ماینە بێنە كرن كو ب تەمامی و ب ئێكجاری خەلك دەست ب ڤەگەریانێ بكت،ئەو ژی بەری هەر تشتەكی هێش چەند دەڤەرێن وێ نەهاتینە رزگاركرن،لەوا دڤێت ئەو دەڤەر بێنە ئازادكرن ژ دەستێ تیرۆرستان و مەترسی ل سەر ئێمناهیا دەڤەرێ نەمینت كو جارەكا دی فەرمان دووبارە نەبن ل سەر شنگالێ،هیڤی و ئۆمێدا هەر ئێزدییەكی یە كو گرتیێن ئێزدی ژ كچ و ژن وزەلام و زارۆكان یێن ماین ب زووترین وەخت بێنە ئازادكرن و ب دیتنا كەس و كارێن خۆ شاد بنە ڤە،ژبەركو ل پێش چاڤێ هەموو جیهانێ و جڤاكێ نێڤ دەولەتی رۆژانە یێ تووشی نەخۆشیان دبن ل سەر دەستێ تیرۆرستان و تاوان د دەرهەقێ وان دا یێ دئێنە ئەنجامدان،درەندەترین تاوان ئەو بوو ل ڤێ داویێ دەمێ داعشێ مێشكێ دوو زارۆكێن ئێزدی شووشتی و بۆ كریارێن خۆكوژیێ بكارئیناین كو خۆ ب سوپایێ عێراقێ ڤە پەقاندن،دیسان هەتا نۆكە پتر ژ 30گۆرێن بكۆمێن كوردێن ئێزدی ل قەزایێ هاتینە دیتن و دەست ب هەلدان و ڤەكرنا هەموویان نەهاتیە كرن،پشتی كارەساتێ و هەتا نۆكە كار ل سەر كەیسا جینۆسایدێ یێ دئێتە كرن كو ب جینۆساید بێتە ناساندن،كو ل سەر ئاستێ نێڤ دەولەتی دانپێدان پێ هاتیە كرن و ئێزدی چاڤەرێ ڤی كەیسی نە،هەبوونا هێزێن نەیاسایی و پەیدابوونا ناكۆكیان كارتێكرنەكا راستەوخۆ كریە سەر ژیانا وی خەلكێ ڤەگەریایی و ئەڤ یەك ژی بوویە بەربەستەك مەزن ل پێشیا ڤەگەریانا خەلكێ،نەبوونا خزمەتكاریێن سەرەكی یێن ژیانێ وەك ئاڤ و كارەب و چەند بوارێن دی ئاریشە بۆ وەلاتیان دروستكرینە،مالێن خەلكێ و ژێرخانا شنگالێ هاتینە وێرانكرن و تالانكرن و وەلاتی چاڤەرێ نە بێنە قەرەبووكرن، بەری كارەساتێ پێكڤەژیانەكا بهێز و مكوم دناڤبەرا پێكهاتێن ئایینی و نەتەوەیی ل شنگالێ دا هەبوویە كو ل داهاتی ئەڤ پێكڤەژیان دێ ب چ شێوە ب رێڤە چت،دیسان پاشەرۆژا شنگالێ پشتی رزگاركرنێ دێ چاوان بت،ل سەر ئەڤ خالێن هاتینە بەحسكرن رەوش نەیا گونجایە كو نۆكە خەلك دەست ب ڤەگەریانێ بكت..
هەروەسا پشتی دووڤچوونا مە هەتا نۆكە ل سەرانسەری قەزا شنگالێ دۆرێن هەشت هەزار خێزانێن ئاوارە ڤەگەریاینە سەر جه و مالێن خۆ ب تایبەت ل ناوچەدارییا سنوونێ،هەروەسان سەرەرای كاودانان ڤەگەریانا خەلكێ هێدی هێدی بەردەوامی هەیە و ئەڤە ژی پێنگاڤەكا زۆر باشە بۆ دووبارە ڤەگەریانا ژیانا سروشتی بۆ دەڤەرێ،ب هەر ئاوایەكی بت دڤێت هەموو پێتڤیێن ژیانێ بۆ خەلكێ ل شنگالێ بێنە دابینكرن،وی دەمی دبینم ئاوارە بخۆ ژی دێ ڤەگەرن.
تُتاح هذه الصورة أيضا في: کوردی