خۆ كوشتن و كوشتنا ژنان بوویە مژارا سەرەكی یا تۆرێن جڤاكی!!
چنار شمو قاسم
تاوانا كوشتنا ژنان ب بەهانەیا شەرەڤ و نامووسێ ب خرابترین جۆرێ تاوانێ دئێتە هەژمارتن ل جیهانێ و هۆكارێ ڤی جۆرێ تاوانێ ژ ئەگەرێ تێنەگەهشتن و نەرەوشەنبیریا تاكی یە دجڤاكی دا، ئەڤ جۆرە تاوانە بتر دناڤ جڤاكێن پاشكەفتی دا هەیە كو ژن تێدا ب پلە دوو دئێتە هژمارتن.
كوشتنا ژنان ب تنێ تاوان نینە ل دژی ژنان بەلكو تاوانە ل دژی هەموو مرۆڤایەتی و نفشێ داهاتی ژی،چنكو فشارێن دەروونی و ترس و دوو دلیێ لسەر خێزانێ بجه دهێلن ،كوشتنا ژنان دناڤ هەموو جڤاكان دا هەیە لێ هەر یەك ب رێژەیەكا جیاوازە و ب تایبەتی د جڤاكێن رۆژهەلاتا ناڤەراست دە ،كۆمەلگەها كوردی ژی ئێكە ژ وان جڤاكایە كو دیاردەیا كوشتنا ژنان تێدا یە بەربەلاڤە ب تایبەتی ئەڤە ماوەیەكە ئەڤ دیاردە ب رێژەیەكا زۆر زێدەبوویە دەمێ ئەم بەحسێ كوشتنا ژنان دكن دڤێت ئەم وان ئەگەران دەست نیشان بكن كو دبنە ئەگەرێ خۆكوشتن یان كوشتنا ژنان،بۆ نموونە كەمترخەمیا یاسایی ل دەمێ لێپرسینێ دگەل وان كەسان دكن ئەوێن ئەو ژنە كوشتین یان ئەو زەلامێن گەفان ل ئافرەتان دكن ل وی دەمی ژن هاوارا خۆ دگەهینتە دادگەهێ بەلێ تاوانبار نائێتە سزادان یان پشتی ماوەیەكی كێم ژ زیندانێ دئێتە ئازادكرن بێ كو چارەسەریەكا یاسایی یا گونجایی و ساخلەم بۆ ئاریشێ بێتە كرن،هەروەسا گەلەك جاران كەس و كارێن ئافرەتێ سكالا یاسایی لسەر تاوانباری تۆمار ناكن ژبەر شەرما جڤاكی ئەڤە ژی ئەگەرەكە كو سزایەكی كێم لسەر تاوانباری بێتە دان،رێكخراوێن ژنان نكاریە تا رادەیەكی د بەرژەوەندیا ژنان دا كار بكن ئانكو ئەم دكارن بێژن هێز و یاسایەكا دروست ل پشت ڤان رێكخراوان نینن،ژبەركو ل دەمێ ئافرەتێ ئاریشەك هەبت دچتە ڤان رێكخراوان و پشتی ماوەیەكی كێم بۆ كەس و كارێن وێ دئێتە زڤراندن،هەروەسا گەلەك جاران داب و نەریتێن ئاینی و جڤاكی دبنە ئەگەرێ كوشتنا ژنان ب بەهانایا شەرەڤ و نامووسێ.
پێتڤیە لسەر حكوومەتا هەرێما كوردستانێ پالپشتیەكا بهێز بۆ رێكخراوێن پاراستنا مافێ ئافرەتێ و رەوشەنبیركرنا خێزانان بكت،داكو ئەڤ رێژە بلندتر نەبت و كارەساتێن مەزنتر پەیدا نەبن،چنكو رۆژانە خۆكوشتن و كوشتنا ژنان بوویە مژارا هەرە سەرەكی و بەربەلاڤ دناڤا تۆرێن جڤاكی دا و ئەڤە دبتە ئەگەر كو خۆكوشتن و كوشتن زێدەتر لێ بێت.
تُتاح هذه الصورة أيضا في: کوردی