سروشتێ مرۆڤی د لۆژیكا هزركرنێ دا
جوان عزەت
پشكا دووێ و داویێ
هەر جڤاكەكی هندەك سالوخەتێن خۆ یێن تایبەت هەنە و ل سەر وان سالوخەتان بەردەوامیێ ددەنە وەرارا ژیانێ، ئەڤجا ئەو بنەما چ بناڤێ هزرێن داب و نەریتێن كۆمەلایەتی یان ژی سیاسی، جڤاكی و… بن خەلكەكێ هانددەنە كوژیەكێ هزركرنێ، كو تاك بتنێ دناڤ وی قالبی دا بژین بێ كو هزر د خۆ گوهەرین و دووڤچۆنا رێیێن نوو یان ژی داهێنان و شوێنكاریێن تازەتر بكن.
ئەڤ جۆرێ فاكتەران وە دكت تاكەكێ مری و بێ گیان و نە لسەر خۆ ئامادەببت ل هەر دەمەكی دا بەری بێت گازندێ ژ خۆ بكت ئێكسەر ئەوی یێن دی ددەتە بەر داسا وێ گازندەكرنێ، ئەگەر بەرێ خۆ بدەین پرانیا جڤاكێن عێراقێ ل سەر شەنگستێ كۆچەری و هۆزاتیێ هاتبوونە فێركرن ئەڤان جڤاكان هزردكرن هەر دەمێ بەرژەوەندیەك یان دەرفەتەك هەبت دڤێت بۆ هەموویان بت، و هەردەمێ زیانەك ژی هەبت دڤێت هەموو باجا وێ بدەن، لەوران ئەو یاسایێن كو دەولەت و دەستهەلاتدارێن وان بهێز دئێخستن هەموو لسەر پیڤەر و هەڤدژیێن رەگەزپەرستیێ بوون،ئەڤێ جڤاكەك دروست كر، كو جیاوازیا رەگەزی تێدا دروست بت و هەڤركی و ململانێ پەیدا ببت ئێك ژ گۆتنێن ئبن خەلدوونی ژی كو گرنگی و ئاماژە دایێ ئەڤ خالە بوویە”(بوویەر و پرسێن كەتواریێن جڤاكی هەردەم هەڤبەندن ب فاكتەرێن رەگەز پەرستیێ ڤە)” ئانكو ئەو هێزا ژلایێ كۆمەلەیێن كاریگەر دئێتە بەخشین پەیوەندی ب بنیاتێ رەگەزپەرستیێ ڤە هەیە،ئەڤ رەگەز پەرستیە نەبتنێ دناڤ جڤاكێن عێراقێ دا سەرهلدایە، بەلكو ب گشتی ل جڤاكێن رۆژهەلاتی سەرهلدایە هەتا جڤاكێ كوردی ژی ڤەگرتیە و یا بوویە ئێك ژ رەفتار و خالێن سەرەكی، بەلێ تشتێ كو ئەم هزر تێدا دكەین ئەوە ئەگەر مە هند گرنگی ب رەگەزایەتیێ دایی هند ب تێگەهێن مرۆڤبوونێ دا بوو ئەز باوەرم نها مە كێشە دگەل سروشتێ هزركرنێ نە دبوو، هەروەها خالەكا دی یا گرنگتر هەیە ئەو ژی هەڤبەندیا نڤشێ كەڤنە دگەل نڤشێ نوو كو وەكریە تاكێ سەردەم دهزركرنا خۆ یا لۆژیكی دا دوودل بت و پەنایێ بۆ هندەك نەچاریان ببەت،چنكو ئەو بنەمایێن دكەڤن دا هاتین شرۆڤەكرن دناڤ جڤاكی دا بوونە ژێدەرەكێ رەفتاری و ب تایبەتی د ناخێ نفشێ كەڤن دا هاتن چاندن یا ئاشكەرا هەتا نها ئەو رەفتار بووینە دیاردە د ناڤ جەوهەرێ ئەخلاقی دا، لەوران ئیرۆ سەرەدەریا نفشێ كەڤن دگەل نفشێ نوو ب شێوەیەكی هەڤدژی یە ئەڤێ پێتڤی ب رەوشەنبیریەكا روون و نوو هەیە.
ئەنجام: هوبز د گۆتنەكا خۆدا دبێژت”(مرۆڤ بخۆ گورگێ مرۆڤی یە)”،واتە ئەوا مرۆڤی دڤێ جیهانێ دا ب سەرێ مرۆڤی ئینای گیانەوەری دگەل گیانەوەری ئەو هزرا توندرەو نینە، ژبەركو نەبوونا هزركرنێ دناڤ جڤاكێن رۆژهەلاتی دا وەكریە بەردەوام تاك ببتە قوربانیێ زیندانا خۆ یا نافخۆ و دووری هزرێن گەشبین و ئەرێنی ژیانێ ببەتە سەر، ژبەركو كێشا هەرا دیار ئەوە كو مرۆڤ د نافخۆیا خۆدا جیهانەكا دی یە و ژ دەرڤەی مرۆڤی ژی جیهانەكا دیتر هەیە، دناڤبەرا وێ جیهانا نزم و بلند دا دڤێت مرۆڤی هەولا هەلسەنگاندنەكا ئەقلانی و دووری هزرا گشتی هەبت.
تُتاح هذه الصورة أيضا في: کوردی