دامەزراندنا بنگەهێ لالش دەستكەفتییەكێ مەزن بوو بۆ ئێزدیان
خالد خدر
ئێزدی وەكو مللەتەكێ كەڤن ودێرین ل دەڤەرێ و بەشەكی هەری گرنگ ژ گەلێ كوردستانێ یە ودگەلەك قوناغێن مێژووی دا دەربازبوویە ، ژبەر رەسەناتی و موكمیا بیروباوەرێن ئێزدیا و ئەو تووشی ژمارەكا مەزن ژ فەرمان و كارەساتان بووینە ل سەر دەستێ دەوروبەرێن خۆ ب تایبەتی دەستهەلاتدارێن ل دەڤەرێ كو ژمارا وان دگەهتە (74) فەرمانا دگەل فەرمان وكارەساتا شنگالێ یا رەش ودلتەزین ،كو درندەترین فەرمان بوو د مێژوویا مللەتێ ئێزدی دا.
ژبلی ڤێ چەندێ ژلایێ هزری ڤە زولم و زۆرداری ئەوان دوژمنا ئینایە سەرێ ئێزدیان ژلایێ گەرۆك و مێژوونڤیسێن وان یێن رەگەزپەرێس و تووندڕەو ڤە ، كو ب دەهان بوختان و تشتێن كرێت و نەژهەژی هاڤێتنە سەر وان داكو ژ بەها و سیمایێ وان بئینە خوارێ وكرێت بكن ل بەرچاڤێ خەلكێ دی ،هیچ كەسەك یان لایەنەك نەبوو بەرگریێ ژ ئێزدیان بكت و ڤان تشتێن هەنێ رەد بكت و وان ب نەوەیی دەربێخیت ،گەلەك پەرتووك و نڤیسینێت شاش و بەروڤاژی ل سەر ئێزدیان هاتنە دەینانی، تاكو سەرهلدانا پیرۆز یا بەهارا سالا1991 دەرفەتەكا زێرین هاتە پێش بۆ ئێزدیان كو رێورەسمێن خۆ یێن ئاینی وجڤاكی ب ئازادی ب گێرن بێی ترس و چاڤدێری ، دامەزراندنا بنگەهێ لالش دەستكەفتییەكی مەزن بوو بۆ ئێزدیان ، ب رێیا ڤی بنگەهی كارێن زۆربەیا وان گۆتن و نڤیسینێن نە راست ب نەوەیی دەربێخن و گەلەك توومەت و بوختان ل سەر ئێزدیان راكرن ب رێیا نڤیسین وڤەكۆلین و گێرانا كۆر وسمینار و سازدانا ڤیستەڤالا ، هەروەسا بنگەهێ لالش رابوویە و ب نڤیسین و دیكیۆمێنتكرنا ئەدەبێ ئاینی یێ ئێزدیان و پاراستنا وی ژ هندابوون و نەمانێ ، بنگەهێ لالش رابوویە ب دەینانا پرۆگرامێ خوندنا بابەتێ ئێزدیاتیێ ل قوتابخانێن ئێزدی لێ ئاكنجی.
بنگەهێ لالش بنگەهەكێ رەوشەنبیری یێ مەزنە ل سەر ئاستێ بنگەهێن ئێزدیان و ل كوردستانێ ژی كو ژمارا ئەندامێت وی دەرباز بوویە ژ (5000) كەسان ،ئەو هەموو هلگرێن باوەرنامێن بلندن ،هەروەسا پتریا وان كادرێن ئیداری نە ل هەموو دام ودەزگایێن حكومی كاردكن ، رۆلێ بنگەهێ یێ دیار وبەرچاڤە ل هەموو بیاڤان دا كو نەبتنێ ئەركێ رەوشەنبیری و جڤاكی ب خۆڤە گرتیە،بەلكو دوورتر ژڤێ چەندێ یە كو هەموو ئیش وئازار و داخوازیێن جڤاكێ ئێزدیان دگەهینتە هەموو دام ودەزگایێن پەیوەندیدار و ل سەر هەموو ئاستان ،هەژی یە بێژین كو بنگەهێ لالش كاردكت ژبۆ پاراستن و راگرتنا كەلەپۆرێ كوردی و ڤێ چەندێ ب ئەركێ خۆ یێ نەتەوەیی دزانت،بیرەوەریا دامەزراندنا بنگەهێ لالش پیرۆزبت ل هەموو ئێزدیان ب تایبەتی ل خەمخۆرێن كەلەپۆرێ كوردینیا رەسەن.
تُتاح هذه الصورة أيضا في: کوردی
