فەهمی بابێ رۆژانێ:ڤەرێژا كارەساتا شنگال ومەترسیێن بەردەوام
فەهمی بابێ رۆژانێ
پشتی كارەساتا شنگال وهاتنا ب سەدان ئاوارێن شنگالێ بۆ هەرێما كوردستانێ وئاكنجیكرنا وان د كەمپێن بێ سەروبەردا ونەبوونا ئازوقەی وەك پێتڤی ونەبوونا دەرفەتێن كاری وب سەردا هاتنا قەیرانا داریی وبڕینا بودجێ هەرێمی ژلایێ حكوومەتا ب ناڤ فیدرال وهاتنە خوارا بەهایێ پترۆلێ،ب هەزاران خێزان دنالن ژ هەژاری وپشتی ژ دەستێن تیرۆرێ رزگاربوین وخەلكێ هەرێما كوردستانێ ب هەموو رێیان هاریكاریێن هەمەجۆر بۆ برایێن خۆیێن ئاوارە دابینكرن وجهێ سوپاسی وشانازیێ یە،لێ مخابن مەودا درێژبوو وحكوومەتا عێراقێ هاریكاریا وان ناكت سەرەرای كو دڤیا مەزاختنا پێدڤیێن وان ل سەر بودجێ عێراقێ بت ،هەروەسا نەهاتنا پێتڤیان كو ل ئاستێ ژیانەكا بەختەوەربت،لەوما هندەك ژوان نەچار دبن زارۆكێن خۆ ئاراستەی خوازەكیێ بكن لكۆلانێن گوندان وباژێران وب تایبەت ل دهۆكێ وئەڤە دیاردەكا مەترسیدارە ودلئێشە بۆ هەر مرۆڤەكی خودان وژدان،بەلێ مخابن كەس خۆ ل وان زارۆكان ناكەتە خودان وئاغا ومەزنێن وان یێن دیرۆكی وهەروهەر ول هەموو سەردەمان دڤێلایێن ئەڤرۆ ستی وخانیێن مۆدێرن دا دژین ودوور نینە هەتا نها پارێ كوچكا وشێخێ هۆزێ دخۆن ومللەتێ وان ل كەمپان وهەیكەلێن بێ سەروبەردا دژین وهندەك ژمللەتێ وان ددەریا ئیجەدا دخەندقن ول كۆلانێن ئەوروپا ل هیڤیا حەلیانێ و وەرگرتنا مافێ پەنابەریێ نە.
و وەك نموونە رۆژەكێ ئەز ل دهۆكێ بووم زارۆكەكی ژیێ وی (11-12)سالی هات وسلاڤ كر وگۆت مامۆ خێرەكێ بدە من ئەز هەژارم ؟؟؟وئەوی نەدزانی ئەزێ چ مللەتم ؟؟من گۆتێ ناڤێ تە چیە ؟؟گۆت ناڤێ من (ا-خ)من گۆتێ تو یێ ئێزدی ؟؟گۆت بەلێ ئەز ئاوارێ شنگالم ،من گۆتێ مالا وە لكێدەرێ یە ؟؟گۆت مالا مە ل كەمپا ؟؟؟؟ وبابێ من دانعەمرە ودەیكا من مریە وئەم پێنج زارۆكین وكەس نینە مە ب خودان بكت ومن ژ نەچاری قوتابخانە هێلایە داكو خوشك وبرایێن خۆ ب خودان بكەم ..من گۆتێ تو رۆژێ چەند دراڤی ب دەستڤە دئینی ؟؟؟گۆت (4-5)هەزاری وگۆت ژمارا چادرا مە ……من گۆتێ ئەڤە بۆ تە دراڤ وهەرە ئەڤرۆ بەس بگەرە ورۆندكا خۆ لچاڤێن وی نەگرت ودلێ من گەلەك پێ سۆت وگۆت من ژی دڤیا ئەز نۆكە ل قوتابخانێ بام وەكی هەڤالێن خۆ ونەباما پێكەنیێ خەلكێ ومن گۆتێ چ نینە مەهەموویا هەژاری ودەربەدەری دیتیە وخەما نەخۆ دێ دەرباس بت،لێ ئەوی گۆت ئەم (5-6)زارۆكێن هەژارین رۆژانە دئێین بۆ خوازەكیێ ؟؟؟وخواندەڤانێ هێژا دزانت چەند مەترسی ل سەرهزر وبیرێن ڤان جۆرە زارۆكان هەیە،لەوما بانگەوازیا مە بۆ هەموو كەمپێن ئاواران ورێڤەبەرێن وان ئامارەكێ بۆ وان خێزانێن زۆر هەژار وپێتڤی چێكەن ودەستێ هاریكاریێ بۆ وان درێژ بكن.
هەر چەندە زۆربەی هەرە زۆری ئاواران دهەژارن ژبەر بێكاریێ وئاوارەیێ وزۆربەی وان دراڤێن كارتا نە زیرەك نە وەرگرتیە وئەرزاقێ دئێت نائێتە خوارن وقەول بوو بۆ هەر خێزانەكێ هەیڤانە (400)هەزار دینارا ب دەنێ وئەوژی نەهات ژئەگەرێ گەندەلیا بەرپرسێ بادەكا ئاواران ل بەغدا ،مخابن زۆربەی ریكخراوێن بیانی بازرگانیێ ب هاریكاریێن ئاواران دكن وجۆرێ ئازوقەی زۆر یێ خرابە ونائێتە خوران وهەر نەخەما كەسی یە ؟؟؟هیڤیدارین لایەنێن پەیوەندیدار وكاربدەست وخودان دەستهەلات وپلە وپایە وبناڤێ ئێزدیان گەهشتینە وان جهان خۆ لڤان ئاریشان بكەنە خودان وهندەك ژئێش وئازارێن وان سڤك بكن،ژبۆ تەناكرنا وژدانێ خۆ و وەك ئەركەكێ مرۆڤایەتی.
تُتاح هذه الصورة أيضا في: کوردی
