بەرى ٣٢ سالان جارا ئێکێ بوو من سەرەدانا بنگەهێ لالش کری، د وى وەختى دا ئەز قوتابی بووم ل زانکۆیا بەغدا ل کۆلیژا ئادابێ پشكا ڕاگەهاندنێ، بۆ جارا ئێکێ بوو من گوڤارا لالش دیتی و د وی وەختى دا من چەند ژمارەیەک وەرگرتن و پاشی بەردەوام من ژمارێن گوڤارا لالش ب چاڤهكى مەزن د دیتن وتا نهۆ ژى ب ههمان شێواز ل جهم من يێ بەرز و بلندە، سەرەراى رەخنە و کێماسیێن جار جاران ئەم لێ دبینن.
ل دوڤدا من چەندین ژمارێن گۆڤارا لالش دگەل خۆ دبرنە بەغدا بۆ ماموستایێ هێژا وقەدر گران و روحا وى شاد هەرو هەر (حسین فیضالله جاف) خودانێ کتێبخانا بەدلیسی ل بەغدا، حسین فیضالله دگۆت دڤێت لالش یا بەردەوام بت و کارێ بەردەوام بۆ رێکخستن و کارا کرنا جڤاکێ ئێزدی بکەت و گەلەک و گەلەک ب رێز و پٍێزانين ڤه بەرێ خۆ د دا گؤڤارا لالش و چەندین جارا ژمارێن جودا بۆ ههڤالێن خۆ داخواز دكرن ژوانژى نڤیسەر جمیل بەندی رۆژبەیانی و کمال مزهر صباح ابو سوران و چەندین کەسێن دى، حسین فیضالله جاف دگۆت هەبوونا بنگەهێ لالش و گۆڤارا لالش شۆرەشەکا هزری و ڕەوشەنبیری یە دڤێت یا بەرداوم بت.
سال دچۆن و سال هاتن و حسین فیضالله جاف هاتە دهۆک و بنگەهێ لالش دیت و گۆڤارا لالش و چەندین ژمارا وەرگرتن لـ سالا ٢٠٠٥ێ هەروهسا لبیرا منه ئەو رەوشا من دچاڤێن ویدا دیتی ل مال مێهڤانی من بوو و گۆت ب راستی کاک خدر هەموو ئەو سەردان و کەیفخوشیا من سەرەدانا دهۆک کرى ل ئالیەکى و چۆنا من بۆ پەرستگەها لالش و بنگەهێ لالش ل ئالیەکی دی بوو د گۆت خدر گیان دڤێت بنگههێ لالش هەردەم بمينت و بزاڤا ڕەوشەنبیریا ئێزدیان بۆ ناساندنا ئێزدیان بۆ هەموو خەلكێ عیراقێ ب رێكا بنگههێ لالش بت.
من ئەڤ پێشەکيیە رێز کر دا دیار دکەم چاوا خەلکەکى دى بەرێ خو د دەنە بنگەهێ لالش و گۆڤارا لالش، سالڤەگەرا دامەزراندنا بنگەهێ لالش کو ل سالا ١٩٩٣ێ هاتيیە ل سەر رێبازا کارى و نابت بیێ دەستخۆشی و دلخوشی دەرباز بت بۆ ئەوان کەسان یێن کۆ بناغێ ئەڤی بنگەهى دانايى جهێ رێز و تەقدیرایە.
نهۆ بنگەهێ لالش وێ د رەوشەکا دیدا د هەموو بیاڤاندا ئهوژى وهكو ئەرک و بەرپرسیارەتيا وان يا جیاوازا دگەل وان سالێن بۆریدا.
ئەرک و بەرپرسیارەتیا بنگەهی دڤیا پێداچونەکا رەخنەیی و ستراتیجی لسەر بهێتە کرن ئەرک و بەرپرسیارەتیێن پلاتفورمێن میدیایی یێن بنگەهێن لالش دڤیا پێداچونەکا رەخنەیی و پراکتیکی ل سەر بێتە کرن، دڤیا ئەڤ پلاتفورم ببنە ئامرازێن نەهێلانا رهقوکینێ – خطاب الکراهیة – و ببنە پالدەرێن دروستکرنا پرێن باوەریێ و دروستکرنا تێکەلیان .
بنگەهێ لالش ئاوێنهيا ڕەوشەنبیری و هزری یا ئێزدیانە گرنگە بەرپرسیارانە سەردەریێ دگەل وان کێشە و ئاریشەیێن جڤاکێ ئێزدیاندا ل عیراقێ و هەرێما کوردستانێ ب تایبەت بکەن.
دڤیا ئەڤ بیرەوەریە نەک تنێ بۆ نیشاندانا دەستکەفتیان بت بەلکو بۆ پێداچونێ بت لسەر کار وچالاکی و پلانان، و دەستەكا کارى ب سنگەکى بەرفرهـ ئەوان رەخنە و نڤیسینێن نەد شێوازێ ئەوان بڤێت قهبول كهن، دڤێت هەر کومێنتەک و نڤیسینەک ب گرنگی بێتە وەرگرتن و مفایى ژێ وەرگرن.
خەلک چاڤەرێ گەلەک کار و چالاکيیانە ژ بنگەهێ لالش لسەر بنياتێ مێژوو و ئەزموون و ئیمکانیاتێن بنگەهی کو مەزنترین دەستکەفتە دهێتە پشتەڤانیکرن ژلایێ نڤیسنيگەها رێزدار ( مەسرور بارزانی) سەرۆکێ حکومەتا هەرێما کوردستانێ .
لەورا دڤیا ل سەر ڤی بنياتى بزانن کو خەلک چاڤەریێ گەلەک بەرهەم و چالاکیانە دڤیا ب راست و دروستی بنگەهێ لالش ببتە زمانحالێ ئێزدیان نەک تنێ ل هەرێما کوردستانێ بەلکو لسەر ئاستێ عیراقێ و جیهانی وب روحەکا مرۆڤ دوستانە سەردەریێ دگەل هەر ئاریشه و رەخنەیەکێ بکەن – و دڤیا ب جددی و حەددی دیار کەن کو ئەو نونەراتیا ئێزدیان ب هەموو تەخ و چین وئینتمایان دکەن، دڤیا بجددی کار بکەن داکو ب هەر پێنگاڤەکا هەبت نفشێ نوو لدۆر خۆ خرڤەکەن و بکەنە هێزەکا نوو بۆ بەردەوامی و گرنگیدانێ ب گەنجان ب هەردوو رەگەزان – نفشێ (ژیرێ دەستکرد – الذکاء الاصطناعي و AI) دڤیا دەنگێ بنگەهێ لالش بلندترین دەنگ بت لسەر ئاریشە و کێشێن جڤاکێ ئێزدی سەبارەت پێگەهێ وان ل عیراقێ وهەرێما کوردستانێ لسەر ئاستێ سیاسی و حکومی، و بەردەوام بت ل سەر ب دهستڤەئینانا مافان بۆ قوربانیێن جینوسایدا ئێزدیان ل ٢٠١٤ێ و ئەڤ چەندە نەهێتە چارچوڤەکرن – کو جهێ رێزێ یە هاریکاریا سەروکێ حکومەتا هەرێما کوردستانێ یا هەیڤانە یانژی (یاسایا رزگاربوویان – قانون الناجیات) ژبەرکو هێشتا گەلەک کار وى مایى دڤی بیاڤیدا.
لدوماهیێ ژ دل پیرۆزباهیێ ل بنگەهێ لالش دکەم و دەستەكا کارگێری یا بلند و هەموو دەستەكێن کارى ل تایێن بنگەهێن لالش و نڤیسنگەهان هيڤیدکەم بنگەهێ لالش بمینت بـ هێز و بەردەوام بت لسەر کار و چالاکیێت خۆ و ئەڤان پێشنیاران ب رژدى وەربگرت و ژ دل خۆزی ماموستا حسین فیضالله جاف ما با ساخ کا بنگەهێ لالش ئەو ئۆمیدا وى بجهـ ئینایە یان نە؟.
تُتاح هذه الصورة أيضا في: کوردی