تفاق وئێكگرتن بنیاتێ پێشكەفتن و گەشەپێدانا مللەت و وەلاتایە
شەمال خدر
دبێژن جارەكێ زەلامەك بوو پارچە زەڤیەكا وی ل دەردۆرێ گوندی هەبوو سالانە بۆ خوە دچاند و دكرە گەنم داكو نانێ زارۆكێ خۆ پێ دابین بكت , ئەو زەلام رابوو رۆژەكێ چوو ناڤ دەخلێ خوە دیت ژدوورڤە سێ زەلام ب گایەكی و ماهینەكێ و كەرەكی ڤە دناڤ دەخلێ وی دا دیاردكن ،نێزیك بوو بەرێ خۆ دایێ سێ زەلامێن ب دەست و لەپ مەزن وگەلەك بهێزن دەوارێ وان گەنمێ وی دچەرینن و بێ سەروبەركرنە ,زەلامێ خودانێ زەڤیێ بۆ خۆ هزركر و گۆت خودایێ من ئەز دێ چاوا بكارم ڤان هەرسێ زەلاما ب دەوارێن وانڤە ژناڤ زەڤیا خۆ دەربێخم؟ هەكە نە ب سیاسەتێ بت ئەز نكارمە وان هەرسێ ژی گەلەك دقەلەو بهێزن هەكە ئەز ئاخافتنەكە نەجوان بێژمە وان دێ من گەلەك ئێشینن ,ڤێجا دڤێت ب سیاسەتێ ئێك ب ئێك ئەز ل گەل وان باخڤم وپاشی بقوتم.
ل دەستپێكێ گوتە وان ئەرێ ما ئەز نە گوننەهم وە هۆسا دەوارێ خۆ بەردایە ناڤ دەخلێ من دا و دچەرینن ما هوون نزانن ژین و ژیارا من و زارۆكێ من هەمو ل سەر ڤێ پچكا گەنمی یە ,گۆت باشە ئەڤ كەرێ هانێ یێ كێ یە خودانێ كەری گۆت باوەركە یێ منە خودانی دەخلی گۆتێ هەما گا دەوارەكی قودرەتییە و گۆشتێ وی دئێتە خوارن و جووت پێ دئێتە كرن و خەلك گەلەك مفای ژێ دبینت و ماهین ژی خەلك گەلەك كارێ خۆ پێ رێڤە دبت و هاتن و چوونا وان ل سەر پشتا ڤی دەواری یە, ئەرێ باشە تو شەرم ناكی تە ئەڤ كەرێ پیس و قرێژی بەردایە ناڤ دەخلێ من و دچەرینی رابوو خودانێ كەری تێر قوتا و دئەردی را درێژكر , خودانێ گای و ماهینێ ژی گۆت مادەم جوامێری چ نەگۆتە مە ئەم ژی دەنگ ناكن ما چ شۆلێ مە ژ وی هەیە بلا هەر وی ب قوتت ,بوو دۆرا خودانێ ماهینێ گۆتێ هەما گا دەوارەكە گۆشتێ وی دئێتە خوارن و خەلك گەلەك مفای ژێ دبینت ئەرێ باشە تو شەرم ژ خۆ ناكی تە ئەڤ ماهینا پیس نە گۆشتێ وێ دئێتە خوارن تە بەردایە ناڤ پچكا دەخلگێ من دا, رابوو تێر ل وی ژی دا و قوتا هەتا دئەردێ را درێژكر ,گۆتە خودانێ گای هەما تە نەگۆت ئەم دەوارێ خۆ نابەردنە ناڤ دەخلێ ڤی بەلەنگازی تە ئەڤ گایێ حەرام و دەڤ مەزن بەردایە ناڤ دەخلێ من و وە هەموو پووچ كر تێرا وی ژی قوتان ل وی دا دئەردێ را درێژكر ,خودانێ ماهینێ و كەری ژی گۆت دێ سۆز بت ئەم ژی دەنگ نەكن و چما دەمێ ئەم قوتاین تە هاریكاریا مە نەكر دێ تو ژی وێ قوتانێ تام بكە دا تو بزانی .
ل دوماهیێ خودانێ دەخلی هەر سێ ژی قوتان و هێلانە ل وێدەرێ دەوارێ وان ژی ژ ناڤ دەخلێ خۆ دەرێخستن و ل پێشیا خۆ هاژۆتن و بەرێ وان دا مالا خودانی ,خودانێ كەری گۆتە هەڤالێن خۆ سێ مرۆڤێ ژ مە پیستر و بێ تفاقتر نینن دەمێ ئەز قوتای وە هاریكاریا من نەكر،لەوما وی ئەم هەرسێ ژی قوتان وئەڤ هەموو ئینا سەرێ مە ,ڤێجا هەكە ئەم ب تفاق و ئێكگرتی بان وی نەدكاری مە ئەڤێ چەندێ ب سەرێ مە بینت.
ئەنجام ژ ڤێ چیرۆكێ یان سەرهاتیا هەنێ ل ڤێدەرێ ژمەرا دیاربت كا كارتێكرنا بێ تفاقیێ چەندە خرابە بۆ كەسان وكۆمان وهەروەسا بۆ مللەتان ژی ، و پێتڤی یە ئەم هەردەم ب تفاق بین و دئێكگرتی بین دهەمی كار وهەلویستان دا ،كو هیچ دەلیڤەكێ نەدەینە نەیار و دژمنێت خۆ كو بێ تفاقیێ ودووبەرەكیێ بئێخیتە دناڤبەرا مللەتێ مەدا ،چنكو تفاق وئێكگرتن بنیاتێ پێشكەفتن و گەشەپێدانا مللەت ووەلاتایە، ئەڤجا دڤێت پەند ژ سەربۆرا ڤان هەرسێ كەسێن دناڤ ڤێ سەرهاتیێ دا بێتە وەرگرتن.
تُتاح هذه الصورة أيضا في: کوردی