مخابن هەتا نهۆ كورد نەبووینە خودان هێزەكا نەرم ؟
خالدخدر 
بۆجارا ئێكێ ل سالا(1990)ێ زاراڤەیێ هێزا نەرم دیاربوویە ژئالیێ نڤیسەرێ ئەمریكی(جۆزێف نای) ڤە دپەرتۆكا وی یا بناڤێ ((هێزا نەرم ئالاڤێ سەركەفتنێ دسیاسەتا نیڤ دەولەتی دا ))،نڤیسەری دچارچۆڤێ پەرتۆكێ دا بهێزكرنا بەرژەوەندیێن ئەمریكا ل هەموو قولاچكێت جیهانێ شرۆڤەكریە ب تێر وتەسەلی ، كو بناڤ كریە ب هێزا نەرم هەر هۆسا زێدەباری وێ چەندێ بەحسێ هێزا رەق یان یا لەشكەری كریە و تێكەست كریە كو هێزا نەرم ئالاڤێ سەركەفتنا سیاسەتا نیڤ دەولەتی یە و ئەو چەكەكی كاریگەرە ئارمانجا بدەستڤەدئینت ب رێیا سەرەنج راكێشانێ و قاییلكرنێ ل شوونا زۆریێ و دانا سامانێ ،داكو بگەهتە ئەنجامەكی كو داهاتیێ هێزا نەرم یا هەر وەلاتەكی كەلتۆرێ وی بخۆیە و هۆسا تێگەهێ هێزا نەرم دبتە ئێك ژ تێگەهێت مەزن وسەرەكی د زانستێن كۆمەلایەتی و سیاسی دا ،ئانكو هاوكێشە یا ب زەحمەتە دچاوانیا كارتێكرنێ ل یێن دی ب نەرمی و نە راستەوخۆ.
بەردەوام بەحسێ هێزا نەرم و كارتێكرنا وێ یا ئەرێنی دئێتە كرن ئانكو ئامرازەكی كاریگەرە بۆ وان وەلاتێن ئەڤ هێزە ددەستێ وان دا و ب باشی بكاردئینن و برەنگەكی كاریگەر، دیارترین وەلاتێن خودان هێزا نەرم ل جیهانێ ئەڤەنە؟: ئەمریكا ئیرۆ ل پێشیا هەموو وەلاتایە ب هێزا خۆ یا نەرم كو كارتێكرنەكا ئێكجار بەرچاڤ هەیە لسەر گەل و وەلاتێن جیهانێ كارێت وێ یێن سینەمایی وسترانێت بوبی و ماركاتێن وێ یێن بازرگانی یێن بناڤ ودەنگ وەك (ستاربكس ،نایكی،فەیسبۆك،ئەپل)، وفەرەنسا ژی خودانا هێزا نەرمە ب هۆنەرێت خۆ یێن جوان و كەلتۆرێ جلوبەرگان و لێنانگەها وێ یا نموونەیی و شانۆیێ وئەدەبیاتێ،هەروەسا ئیتالیا بەهرا خۆ هەیە بەرهەمێت لێنانگەها وێ جیهان داگیركریە ودیزاینێت وێ ل جیهانا نمایشێت جلوبەرگان وترومبێلێت وەرزشی،وەلاتێ چینێ ژی هێزا نەرم هەیە ب خوارنگەها خۆ و كەلوپەلێت وێ یێن ئەرزان و دڤێتن هندێ ژبیرنەكەین دڤی بواری دا كو هێزەكا نەرم یا بەرچاڤ وبەرفرەه هەیە ئەو خودانا بەرهەمێ هەری مەزنە دبوارێ سینەمێ دا ل جیهانێ كو فلمێت وێ ناڤ ودەنگیەكا جیهانی بخۆڤەگرتینە و هەروەسا لێنانگەها وێ و سفرێت وێ یێن دەولەمەند و هەمەجۆر ژی نە دكێمن و هەروەسا مۆسیقا وێ و وەرزشا یۆگا وجلوبەرگ و وگولاڤێت وێ و بەهارات و وچایا وێ یا كو دئەردێ خۆدا دچینت،بەریا ڤان وەلاتان هەموویان بریتانیا خودانا مەزنترین هێزا نەرم بوو ل جیهانێ كو ڤی بواری دا خۆ سەپاندبوو ب تایبەتی ل سالێن شێستان ل چەرخێ بۆری وكارتێكرنا خۆ یا مەزن هەبوو لسەر جلوبەرگان و وخوارنێ و مۆسیقێ و هۆنەرێت سینەمایی و شانۆگەریێ و ئەدەبیاتێ و بەربەلاڤكرنا وێ زوكا دهاتە جێبەجێكرن ب رێیا میتینگەهێن وێ یێن كەڤن،ل رۆژهەلاتا ناڤین توركیا وئیران هەولا ڤێ چەندێ دكن بەلێ هەتا نهۆ نكارینە ببنە خودان هێزا نەرم،ل ئاستێ ئەرەبا وەلاتێ مسرێ یا رژدە و هەولێن وێ دبەردەوامن ئەگەر نەژ تیرۆرێ با كو بوویە ئاستەنگ لهمبەر داهێنانێت وێ.
مخابنی هەتا نهۆ كورد نەبووینە خودان هێزەكا نەرم ب سەدەمەكا سەرەكی ئەوژی نەبوونا قەوارەكی كوردی و نەبوونا دەولەتا كوردستانێ كو بنیاتێ هەبوونا هێزا نەرمە ئانكو بێی دەولەتبوونێ هیچ مللەتەك نكارە ببە خودان هێزا نەرم،ئەگەرتشتەك دڤی بواری دا پەیدابت هەر دێ بۆ وەلاتێن داگیركەرێن كوردستانێ ئێتە هژمارتن،گرنگیا هێزا نەرم هۆكارێت كارتێكەرن لسەر بەرهەمئینانێ وبلندكرنا هێزا ئابووری بۆ وەلاتێن خودان هێزا نەرم وزێدەكرن وبلندكرنا ئاستێ وێ و كاریگەریا سیاسی لسەر نەخشێ جیهانێ وبنگەهێن چێكرنا بریارێ،پێتڤیە هێزا نەرم نەئێتە كێمكرن وپاشگۆخستن.
تُتاح هذه الصورة أيضا في: کوردی