شنگال جیێ بەرخودان و كوردایەتیێ یە
دلۆڤان ئەمجەد بارزانی
زۆربەیا خەلكێ شنگالێ كوردن و كوردێن ئێزدی نە ،كو چەندین فەرمان بسەرێ وان هاتینەكرن ،چەند جاران هاتینە ئاوارەكرن و ژناڤبرن هەتا نهۆ دبن دەستی و نەخۆشیان دا ژیاینە،نهۆ خەلكێ شنگال ب تایبەتی كوردێن ئێزدی ئاخینكا بۆ سەربەخۆبوونێ دكێشن،هندی هند نەهامەتی و دەردەسەری یێت دیتین ژبن دەستێن وەلاتێن جیران ب تایبەتی عێراقێ،خەلكێ شنگالێ و دەوروبەر بخۆ تێگەهشتن و زانی تنێ هێزێن پێشمەرگەی و هەرێما كوردستانێ خەمخۆرێن وانن و دهەموو نەخۆشیان دا دهاوارا وان دا دچن،لەوما هەموو هیڤی و ئارمانجێن وان ئەون كو ئازادیێ ببینن و سەربەخۆبوونا كوردستانێ ببینن،چنكو یێ ب چاڤێ خۆ دبینن كۆ زۆریەكا زۆرا لێ دئێتە كرن و یێ دئێنە كۆشتن بتنێ ئەگەر ئەوە ئەو كوردن.
د درێژاهیا دیرۆكێ دا(74)فەرمان بسەرێ كوردێن ئێزدی دا هاتینە كرن،ب تایبەتی ئەڤ فەرمانا ڤێ داویێ یا(3/8/2014)ێ ئەوا ب رۆژا رەش هاتیە ناساندن ئەوا چەكدارێن دەولەتا ئیسلامێ یا بناڤێ (داعش) ب رەنگەكی زۆری درندانە هێرش كرە سەر شنگالێ و داگیركر ئارمانجا وان ژناڤبرن و كۆمكوژیكرنا كوردێن ئێزدی بوو،بتنێ ژبەر هندێ كو كوردن و ئێزدینە رێژەیەكا زۆر یا زەلام و زارۆكان ب رەنگەكی زۆری هۆڤانە كوشتن و بن ئاخكرن و چەند هەزار كچ و ژنێن كوردێن ئێزدی دگەل خۆ برن و ل بازاران كڕین و فڕۆتن پێ دهاتەكرن و ب زۆری ل ئەمیر و چەكدارێن داعشێ دهاتنە مارەكرن و ب زۆری ئایینێ ئیسلامێ لسەر دهاتە سەپاندن،دیسان ب هەزاران كەس ئاوارەی چیایێ شنگالێ بوون چەند رۆژان ل چیایی بێ نان و ئاڤ مان و چەندەها زارۆك و گەنج و پیر ژ برسان و تێنادا مرن ، هەتا هێزێن پێشمەرگێن قارەمان گەهشتینێ و رزگاركرین،هەروەسا ئاوارێن ئێزدی كو نهۆ ل كەمپان دا ل باشوورێ كوردستانێ دژین دبێژن ل وی دەمێ ئەم ل شنگالێ حكومەتا عێراقێ رێ نەدا مە كو بتنێ خانیێن خۆ ژی لسەر ناڤێن خۆ تاپۆ بكەین،ژبەر هندێ ژی دبێژن ئەم چاڤەرێ سەربەخۆبوونێ نە دا بكارین مافێن خۆ بدەست خۆڤە بینین،وەسا دیار ژیكرن و دگۆتنە مە دگەل فەرمانبەرێن ئەرەبان داخوازا تاپۆكرنا خانیێن خۆ بكن،بەلێ مخابن وەك ماف پارچە زەڤی ددانە یێن ئەرەب بەلێ نەددانە كوردان،هەروەسا چەند نەحەز و نەیارێن كوردستانێ ئێك ژوان (حەشدا شەعبی) بەری چەند مەهان یێ هەموو هەولێن خۆ دەن كو چەند هۆزێن كوردێن ئێزدی رازی بكن و دگەل وان بن و بمینن عێراقێ و دژی هەرێما كوردستانێ شەری بكن و دگەل سەربەخۆبوونا هەرێما كوردستانێ نەبن،دبەرامبەردا دبێژنێ دێ زەڤیان ل باشوورێ شنگالێ بسەر ناڤێ وە تاپۆكەین.
هەروەسا سەرۆكێ قەزا شنگال دوی دەمی دا دیاركرن و گۆت ئەم دێ ب هێز پشكداریێ دسەربەخۆبوونا هەرێما كوردستانێ دا كەین ،چنكو ئەم یێن د دەڤەرەكێ دا هەتا نهۆ ژی مە چ مافەك تێدا نینە و هەتا نهۆ ژی یێ مە كۆمكوژ دكن كچ و ژنێن مە یێن بنە كەنیزە،لەوما ژبلی كوردستانێ مە چ رێیێن دی نینن و هندی مە لبیرە د مێژوویا كوردان دا هەر كوشتن و بەرزەكرن و ئەنفالكرن و كیمیاباران كرن و وێرانكرن و ئاوارەیی یا هەبووی و سەرۆكێ هەرێما كوردستانێ مەسعود بارزانی دبێژت ((كوردێن ئێزدی كوردێن رەسەنن))،لەوما پێتڤیە ئەم خۆ بدانێن خۆدانێن كوردستانێ و سەربەخۆبوونێ لەوما دێ بێژم شنگال جیێ بەرخودان و كوردایەتیێ یە چیایێ شنگالێ بۆ قەلغان بۆ پێشمەرگا و خەلكێ ب شەرەفێ شنگالێ كو ئێزدی بوون سەرێ خۆ بۆ دوژمنا نەچەماند و ب جانێ خۆ بەرەڤانی ل كوردستانێ كر دا بكارن بسەر بلندی و ئاشتی و ئازادانە ل هەرێما كۆردستانێ بژین كو ملكێ هەر كوردەكی یە،مرنا بسەر بلندی باشترە ل ژیانا سەر شۆری و بن دەستی.
ئەگەر مە بڤێت جارەكا دی ئەڤ كوشتن و شەهیدكرن و ئەنفالكرن و كیمیاباران كرن و ئاوارەبوون و وێرانكرنا بسەر مە كوردان دا دووبارە نەبنەڤە ، دێ هەموو هەولا دەین كو ب ئاشتی و برایانە بژین ئێكگرتنێ و ئێكرێزیێ و پێكڤەژیانا بێ جوداهی دێ كەینە پیڤەرێ سەرەكی یێ ژیــانــا خۆ دا دسەركەفتی بین،هەروەسا دێ كار كەین بۆ سەربەخۆبوونا هەرێما كوردستانێ بێ سەكناندن.
تُتاح هذه الصورة أيضا في: کوردی