تەقینا رۆکێتەکێ پرۆژەیەکێ فەیسبووکێ پاشدا خست
ئێن ئارتى
رۆکێتەک کو د قوناغێ بەرهەڤکرنێ دابوو بۆ فرێکرنە ناڤ ڤالاهیا ئەسمانی تەقی، ئەڤەژی بوویە سەدەمێ پاشدا خستنا پرۆژەیەکێ فەیسبووکێ کو پشتا خوە ب وێ رۆکێتێ گرێدابوو.
سپێدا ئەڤرۆ ٢ی ئێلولا ٢٠١٦ێ، رۆکێتا فالکۆن ٩ کو د پلان دابوو ڤێ حەفتیێ بۆ ڤالاهیا ئەسمانی بهێتە فرێکرن تەقی، سەدەمێ تەقینا وێ ژی هەتا نوکە نەهاتیە زانین.
ئەو رۆکێت ل جهێ بلندبوونا خوە تەقی و ب سەدەمێ ڤێ ژی تەڤاهیا ئەو بارێ کو د ناڤا رۆکێتێ دا بوو ژناڤ چوو.
ئێکەمین هەیڤا دەستکردا کۆمپانیا فەیسبووک ژی د ڤێ رۆکێتێ دابوو کو دخاست فرێکەتە خولگەها تایبەتا خوە د ڤالاهیا ئەسمانی دا.
فەیسبووکێ ب رێیا ڤێ هەیڤا دەستکرد د خاست خزمەتگوزاریا ئنتەرنێتێ بێ هەمبەر بگەهینیتە وەلاتێن هەژارنشینێن ئەفریقا.
ئەڤ پرۆژەیە ب ئینتەرنێت دۆت ئۆرگ هاتیە ناسکرن و مارک زوکەربێرگ دامەزرێنەرێ فەیسبووکێ دخاست ب رێیا ئەڤی پرۆژەیەی تەڤاهیا جیهانێ پێکڤە گرێ بدەت.
ژبۆ دەستکەفتنا هەیڤا دەستکردا خوە، فەیسبووکێ گرێبەست دگەل کۆمپانیا ئیوتێلسات ئەنجامدابوو کو شەهرەزا تێچوویێ وێ ب ٩٥ ملیۆن دۆلاران د خەملینن.
بەلێ د رۆکێتێ دا هەیڤا دەستکردا فەیسبووکێ ژی ژناڤ چوویە و د هەمبەر دا فەیسبووک تنێ ب ئاوایێ پارە دێ هێتە قەرەبوو کرن، ئەڤەژی رامانا وێ ئێکێ ددەت کو ئەڤ بوویەرە کارتێکرنێ ل سەر پێشڤەچوونا پرۆژێ ئینتەرنێت دۆت ئۆرگێ چێدکەت.
رۆکێتا فالکۆن بەرهەمێ کۆمپانیا سپەیس ئێکسە کو ئارمانجا وێ دروستکرنا رۆکێتەکێ یە بشێت چەند جارەکان بهێتە بکارئینان.
ئارمانجا سەرەکی ژی ئەوە کو تێچوویا رۆکێتان ب ئاوایەکی کێم بکەت کو هاولاتی ژی بشێن ب ئاوایەکێ ئاسایی گەشتێ بۆ ناڤ ڤالاهیا ئەسمانی ئەنجام بدەن.
تُتاح هذه الصورة أيضا في: کوردی
