رۆژنامەڤانەك:ئەگەر باوەری بۆ ئێزدیان ل كوردستانێ و عێراقێ پەیدا نەبت،ئێزدی هەر دێ كۆچ كن
دیدار:سەلام سەبری
رۆژنامەڤانێ كوردێ ئێزدی(سەباح سمیر)ب مەرەما وەرگرتنا چارەسەریێ قەستا وەلاتێ ئەلمانیا كر كو بۆ ماوێ پتر ژ سالەكێ لێ دمینت و پاش ڤەدگەرتە هەرێما كوردستانێ و دیدارەكێ دە بۆ رۆژنامەیا دەنگێ لالش بەحسێ رەوشا ئێزدیان ل وی وەلاتی دكت و دبێژت:”ئەگەر باوەریەك بۆ ئێزدیا ل كوردستانێ و عێراقێ پەیدا نەبت ل وێ باوەریێ مە ئێزدی هەر دێ كۆچ كن،دازانین ژی گەنجێن مە تارادەكێ باش كارینە بگەهنە قۆناغەكا باش ل وی وەلاتی ب رێیا خووندنێ و زانستی،هەروەسا ئاشكەراكر كو هەر وەختێ رەوشا كوردستانێ وەك بەرێ زڤری گەلەك كۆچبەر دێ زڤرنە هەرێمێ ڤە”.
ل دۆر كۆچكرنا كوردێن ئێزدی بۆ وەلاتێ ئەلمانیا”سەباح سمیر”خویاكر:”ئەگەرەك هەیە ئێزدی هەست ب هەبوونا خۆ بكن تایبەت ل كوردستانێ و عێراقێ دڤێت باوەری پتر بۆ ئێزدیان بێتە پەیداكرن،چنكو ئەگەر باوەریەك بۆ ئێزدیا پەیدا نەبت ل وێ باوەریێ مە ئێزدی هەر كۆچ بكن،ئەگەر مە بڤێت ئێزدی وئێزدیاتی بمینت دڤێت سەر ئاخا خۆ بمینن”.
دەربارەی رۆلێ مالێن ئێزدیان ل ئەلمانیا رۆژنامەڤان”سەباح سمیر”دبێژت:”مالێن ئێزدیا ژلایێ زمان و چالاكییان و چەند بیاڤێن دی دا هاریكاریا ئێزدیان دكن ،ب مخابنی ڤە ئەو مال بێ لایەن كار ناكن و هەر ئێك ل گۆر سیاسەتا خو كاردكن ئەو لایەنێ پشتەڤانییا وان دكن و بۆچۆنێن وان نە وەك هەڤن و كارتێكرنا لایەنێ سیاسی ل سەر مالێن ئێزدیا هەیە،دخوازم ئێزدی ل ڤی وەلاتی دئێكگرتی بن”.
سەبارەت ڤەگەریانا كۆچبەرێن ئێزدی ژ ئەلمانیا بۆ هەرێما كوردستانێ”سمیر”دیاركر:”ب دیتنا من پشتی رزگاركرنا مووسل و ژناڤبرنا تیرۆرستێن داعش و نەمانا قەیرانا دارایی ل هەرێمێ،ل وێ باوەریێ دامە خەلكێ كوردستانێ و ب تایبەت كوردێن ئێزدی وەك بەرێ كۆچ نەكەنە دەرڤەی وەلاتی و چێ دبت گەلەك ژ وان یێن چووینە دەرڤەی وەلاتی بزڤرنە وەلاتێ خۆ، ژبەركو گەلەك نە دئارامن بۆ وێ ژیانا ل ئەلمانیا دبۆرینن ژ ناچاری چووینە،هەر وەختێ رەوشا كوردستانێ وەك بەرێ زڤری دكارم بێژم گەلەك دێ زڤرن تایبەت ئەڤێن ڤێ داویێ چووین”.
دیسان ل دۆر رەوشا گەنجێن ئێزدی ل ئەلمانیا ناڤهاتی گۆت:”بۆ ماوێ پتر ژ سالەكێ ل ئەلمانیا ژیایمە و گەنجێن مە تارادەكێ باش ل قەلم دەم كارینە بگەهنە قۆناغەكا باش ب رێیا خووندنا خۆ و زانستی،دخوازم ئەڤێن ڤێ داویێ ژی هاتینە ئەلمانیا پتر خۆ نێزیكی خووندنێ بكن،ژبەركو ئەو دەرفەتێ ددەنە تەخا گەنجان خۆ دیاربكن”.
هەروەسا ل دۆر گەهاندنا كەیسا ئێزدیان بۆ حكوومەت و جڤاكێ ئەلمانی ئاشكەراكر:”ئێك ژوان كەسان بووم ل كەمپێ دا ل چەندین جارا ل جهێن جودا رۆژنامەڤانا و چالاكڤانێن وی وەلاتی گەنگەشە دگەل من دكر سەر ئێزدیا و بۆ رۆژنامەڤان و مالپەرێن ئەنتەرنیتێ و تلەڤزیۆنان ئاخفتم و دەمێ دكیۆمێنت دیتن مەندەهۆش دمان كو لڤی چەرخێ 21ێ دە ئەڤ كارەسات ب سەرێ مللەتەكی بێتە كرن،هەروەسا گەلەك جارا رێڤەبەریا كەمپێ ئەم پەنابەر و چەند كەس ژ ئۆلێن جودا جودا هەتا ئەوروپی كۆم دكرین و سەر بابەتا دئاخڤتین،من بەحسێ خەلكێ خۆ بۆ وان دكر وكارەساتا ب سەرێ مللەتێ كورد ب گشتی هاتی تایبەت ئێزدیا”.
دەربارەی جینۆسایدا ئێزدیان ژی”سەباح سمیر” دیاركر:”یا گرنگە تشتەك بۆ ئێزدیان بێتە كرن و یا ڤێ داویێ ب سەرێ ئێزدیان هاتی و داعشێ ب سەرێ ئێزدیا كری دووبارە نەبت،ئەڤ كەیسا ئێزدیان وەك جینۆساید بێتە ناساندن،دخوازم پەرلەمانێ كوردستانێ و عێراقێ پتر كۆمبوونا سەر جینۆسایدا مە گرێ بدەن و باوەریێ ژ تاكێ ئێزدی را پەیدا بكن،چەندین كارەسات و ئەنفال یێن كوردان نەبووینە جینۆساید ودخوازم وەلاتێن زلهێز یێن نێڤ دەولەتی و لایەنێن پەیوەندیدار پتر گرنگیێ بدەنە مافێ كوردا و تیرۆرێ ژ ناڤ ببەن”.
ژلایەكێ دیڤە و ل دۆر رۆلێ كەسایەتی و مامۆستایێن ئاینی و جڤاك ناس و ئۆلدارێن ئێزدیان ل كوردستانێ و ئەوروپا دا زانین،دخوازم پتر گرنگیێ بدەنە خووندنا پەرتۆكێن ئێزدی و ئامۆژگاریێن ئاینی و زانستێ ئاینی بۆ گەنجان رۆن بكن،داكو خۆ ناس بكن تایبەت یێن ل ئەوروپا،ب مخابنی ڤە گەلەك ژ زارۆكێن مە نۆكە ل ئەلمانیا ل مال لگەل خێزانا خۆ ب زمانێ ئەلمانی دئاخڤن و داخواز دكەم ناڤ مالا خۆ و خێزانا خۆ دا ب زمانێ كوردی باخڤن.
تُتاح هذه الصورة أيضا في: کوردی