بنگەهێ لالش داخوازێ ژ خەلكێ دەشتا نەینەوا دكەتن هاریكارییێ دگەل هێزێن پێشمەرگەی بكن
رزگاركرنا كچ وژنێت گرتی یێن ئێزدیان پێتڤی ب پشتەڤانییا وان كەسێن مایین ل مووسل ودەردۆرێن وێ
ئەڤە ماوێ چەند رۆژایە كاروانێت لەشكەری یێت مەزن دئێنە دەشتا نەینەوا و باژارێ مووسل و لێ كۆم دبن ژبۆ ئازادكرنا ڤان دەڤەران و دەرێخستنا چەتەیێن داعشێن تیرۆرست. ژبەركو دەمژمێرا داوی (ساعە سفر) وا نێزیك بوویی ،هیڤی ژ خەلكێ خۆیێ هێژا دكەین یێن ئاكنجیێن دەشتا نەینەوا ژبەریا ئاوارەبوونێ ،كو ب شێوەیەكێ باش هاریكاریێ دگەل هێزیئن پێشمەرگێ قارەمان بكن ،ژبەركو ئازادكرنا باژارێن دەشتا نەینەوا وگرتنا ئەردێ وێ گرێدایی وانە.
هاریكارییا خەلكی ژ پێكهاتەیێن جودا ل دەشتا نەینەوا و ژوان ژی خەلكێ مەیێ ئێزدی ژ كورێن باشیك و بەحزانێ ،دگەل هێزێن پێشمەرگان كو ئاراستە و رێنمایێن تایبەت یێن بێنە دەرێخستن دڤی دەرباریی دا نەئێنە سەرپێچیكرن ،و لەزێ نەكەن ژ خۆ نێزیككرنێ ل دەڤەرێن نەهاتینە پاقژكرن ژ مین وتەقەمەنیێن گومانبەر و نەپەقیای ،زێدەباری ئەو مال و فەرمانگەه و جادەیێن هاتینە مینكرن ، وهەروەسا رەنگێن دیێن مینكرنێ یێن تیرۆرستی ب رێیا ئامیرێن ناڤ مالێ یێن جودا جودا ب ئارمانجا كەفتنا زیانێ ب هژمارەكا زۆر یا سڤیلێن بێ گونەه.
هەژی ئاماژە كرنێ یە كو پرسەكا گەلەك گرنگ هەیە دەربارەی مە ئێزدیان ،كو پێزانین دئێن و دبێژن ب سەدان ژن و زەلامێن گرتیێن ئێزدی لناڤ باژارێ مووسل ودەروبەرێن وێ هەنە، ولسەر ڤئ چەندێ ئەم گازییا خۆ دگەهینینە هەر كەسەكێ پێزانینەك هەی دڤی دەربارەیی دا و یێ هاریكارببت دگەل دەزگایێن ئەولەهیێ یێن تایبەتمەند ،ژبۆ رێخۆشكرنێ ل رزگاركرنا وان ژ وێ رەوشا خراب و تەنگەزارا ئەوا تێدا دژین ،و وەرگرتنا شەرەفا بەژداریكرنێ د زڤراندنا وان بۆ كەس و كارێن وان یێن كو ئەڤە پتر ژدوو سالایە ل بەندا هاتنێ نە.
دەستەیا بلندا بنگەهێ لالش یێ رەوشەنبیری و كۆمەلایەتی
دهۆك- ١٥/١٠/٢٠١٦
تُتاح هذه الصورة أيضا في: کوردی