WAAR-دهۆك:

جێگرێ سه‌رۆكوه‌زیرێن هه‌رێما كوردستانێ، د كۆمبوونا دگه‌ل كۆمسیارێ بلندێ ئێكه‌تییا ئه‌ورۆپا دا بۆ كاروبارێن مرۆڤی و قه‌یرانان راگه‌هاند؛ مافێ گه‌لێ كورده‌ بریارێ لسه‌ر چاره‌نڤیسێ خوه‌ بده‌ت.
ئه‌ڤرۆ ل سه‌ر داخوازا فه‌رمی یا ئێكه‌تییا ئه‌ورۆپا، قوباد تاله‌بانی ب سه‌رۆكایه‌تییا شانده‌كا بلندا حكومه‌تا هه‌رێما كوردستانێ، گه‌هشته‌ برۆكسل‌ و دگه‌ل، كۆمسیارێ بلندێ ئێكه‌تییا ئه‌ورۆپا بۆ كاروبارێن مرۆڤی و قه‌یرانان كۆمبوو و باس ل ره‌وشا ناڤخوه‌یا هه‌رێمێ و گاڤێن چاكسازیێ یێن حكومه‌تێ و ریفراندۆما سه‌رخوه‌بوونا هه‌رێما كوردستانێ كرن.
قوباد تاله‌بانی د كۆمبوونێ دا گۆت: هه‌رێما كوردستانێ ل بیست و پێنجی مه‌ها ئیلۆنا ئه‌ڤ ساله‌، دێ ریفراندۆما سه‌رخوه‌بوونێ كه‌ت و بێ گۆمان ئه‌ڤه‌ ژی پرۆسه‌یه‌كا دیمۆكراتییه‌ و مافێ گه‌لێ كورده‌ وه‌كو هه‌ر گه‌له‌كێ دی یێ جیهانێ، بریارێ لسه‌ر چاره‌نڤیسێ خوه‌ بده‌ت.
گۆت ژی: دناڤخوه‌یا هه‌رێمێ دا، حكومه‌تێ گاڤێن چاكسازیێ ده‌ستپێكرینه‌ و د نزیك دا، ره‌نگڤه‌دانا وان چاكسازییان، دێ ل سه‌ر خه‌لكێ كوردستانێ دیاربیت.
ل گۆری زانیارییان، شاندا حكومه‌تا هه‌رێمێ، دێ ل برۆكسل دگه‌ل به‌رپرسێن بلندێن ئێكه‌تییا ئه‌ورۆپا و جێگرێ سه‌رۆكوه‌زیرێ به‌لجیكا و وه‌زیرێ به‌رگرییا وی وه‌لاتی كۆمبن و پاشان دێ سه‌ره‌دانا هۆلاندا كه‌ن و دگه‌ل وه‌زیرێن ده‌رڤه‌ و بازرگانییا وی وه‌لاتی كۆمبن.