ئاوارێن كەمپا ئێسیان داخوازا هاریكاریان دكن
تۆرا لالش یا راگەهاندنێ
ماوێ پێنچ سالانە ئاوارێن ئێزدی ل كەمپێن سنوورێ پارێزگەها دهۆكێ ئاكنجی نە،ب تایبەت ل كەمپا ئێسیان ئاوارە درەوشەكا پەریشان و ب زەحمەت دا دژین و داخوازا هاریكاریان دكن.
(شاكر عەلی) ئاوارەیەكی شنگالێ یە ل كەمپا ئێسیان بۆ رۆژناما دەنگێ لالش دبێژت:رۆژ بۆ رۆژێ رەوشا ئاوارێن ئێزدی ل بن خیڤەتان دا خرابتر دبت وئێش وئازارێن وان زێدەتر دبن،چنكو دەم درێژ بوو ئەڤە ماوێ بتر ژ چار سالایە ژیانا خۆ یا پر دژوار لبن خیڤەتان دا ب زەحمەت برێڤە دبەن،لەورا پێتڤیە لسەر حكومەت و رێكخراوێن مرۆڤایەتی بتر هاریكاریا ئاواران دهەموو بواران دا بكن وخزمەتگۆزاریان بۆ دابین بكن و دەلیڤێن كاری بۆ گەنجان پەیدا بكن.
ژبال خۆڤە چالاكڤانا كچ(عەزیزە جەلال) بۆ رۆژناما دەنگێ لالش دیاركر،ئەو كەسێن ژ دەستێن تیرۆرستێن داعشێ رزگاربووین و ل كەمپا ئێسیان ئاكنجی رەوشا وان پر یا دژوارە ل كەمپێ دا،چنكو گەلەك زۆری و زۆرداری ل وان هاتیە كرن و گەلەك ژوان تووشی نەخۆشیێن دەروونی بووینە،ئەڤجا ل هەر كەمپە و جیەكی رزگاربووی پێتڤی هەر جۆرە هاریكاریەكێ نە كو هنەكێ ژ ئازارێن وان سفكك بكن.
هەروەسا چالاكڤان(ئەلیاس عبداللە) بۆ رۆژناما دەنگێ لالش خویاكر،بێگۆمان مانا ئاواران بۆ ماوەیەكی هۆسا درێژ كو ڤەكێشت ب سالان رەوشا ئاواران دێ خرابتر بت و رێژا هەژاری وبەلنگازیێ زێدەتر بت،ژیانا رۆژانە یا ئاواران ل ناڤ كەمپان دا گەلەك یا ب زەحمەتە و خزمەتگۆزاری و رۆلێ رێكخراوان گەلەك كێم بوویە،لەورا داخوازێ ژ حكومەت و رێكخراوێن خێرخوازی و بۆردێ كاروبارێن مرۆڤایەتی دكەین بتر هاریكاریا ئاواران ل كەمپان دا بێتە كرن.
تُتاح هذه الصورة أيضا في: کوردی