دێلیز و دەرگەهێ مالێ دگەل جارێن جاران
ئلیاس نعمۆ خەتاری
دەرگەهێ مالێ یێ مەزن و سەرەكی بوو ل پێشیا مالێ بوو، دێلیز ئاڤایەكە دهاتە چێكرن ژ هەری و لبنا یانژی ژ گێچ و بەری و دوو دەرگەهێت داری یێن مەزن تێدابوو ئەو دەرگەهـ ب شیركی دهاتنا داخستن و ب كلیلا داری ڤەدبوو، ئاڤا مالێ دناڤا دێلیزا دەربازدبوو دگۆتنە وی جی (دەردان) و لبن بەرێ دەرجكا دەرگەهی را ئەو ئاڤ دچۆ دگۆتنە وی بەری (عبارە)، دێلیز دهاتە بكارئینان بۆ گەلەك تشتان وەك جیێ روونشتن و بێنڤەدانێ یانژی بۆ عەمباركرنا هندەك كەلوپەلێن ناڤ مالێ.
ئاخۆر:پشكا بنیا قەسرێن كەڤنە ئەوێن ژ گێچ وبەری دهاتنا چێكرن و دگۆتنێ قەسر، نیڤەكا ئاخۆرێ دكەفتە بن عەردی وەكی (بنداڤێ⁄ سەردابێ ) و نیڤا دی لسەر عەردی هندەك پەنجەرە بۆ هەناسێ وگهۆرینا هەوای تێدا چێدكرن، قەسرا مەزن لسەر دهاتە ئاڤاكرن،لیوان: ئاڤایەكە جوان بوو دكەفتە د نیڤا هەردوو ژۆرێن قەسرا مالێ قاتێ سەری دە لسەر ئاخورێ جیەكێ بلند و فێنك و خاشبوو دەرگەهێن هەردوو ژۆرێن مالێ دكەفتنێ دگەل دەرەجا سەر بانی،عۆلیك:ئاڤایەكە بچوك بوو لسەر دەرجا سەربانی دهاتە ئاڤاكرن ژبەر بارینا بارانێ و دەرگەهەك هەبوو دگۆتنێ (دەرگەهێ سەربانی)،حەوالە:ئانكو دۆردانا سەربانی یان سەر خانی ب لبن و حەریێ یان ب گێچ و بەری دهاتەچێكرن ئانكو سیاجێ سەربانێ ب مەرەما پاراستنێ،خشیفە:كونەكە درێژ بوو د قەسرێن كەڤندە، ئەو قەسر ب شێوەیێ كڤانی دهاتنە ئاڤاكرن وسەربان یێ راست بوو لەوما ڤالاهیەك دناڤا ئاڤاهی دە پەیدابوو ب دەریەكێ ڤەكری ل پێشیا ئاڤاهی و ل جیەكێ بلندبوو هەردەم ئەو خشیفە دبوونە جیەكێ ئارام بۆ ڤەحواندنا كۆترا (كۆتر شینك⁄كەڤۆك)،كولینە:كونەكە خرۆڤرە دكەفتە د نیڤا سەربانی دا، دئێتە بكارئینان بۆ هندەك كارێن فەر وەك شداندنا سۆپێن داران بۆ دەركەفتنا دیكۆلێ، دیسان ژبۆ ڤەگوهاستنا گەنم وجەهی ژ سەربانی بۆ ناڤ مالێ،سۆلینە: كونەكە تایبەت بوو دهاتە چێكرن د حەوالا سەربانی دە ژبۆ رێژاندنا ئاڤا بارانێ،سڤاندە: تایبەت بۆ خانیێن زنچكی دهاتنە چێكرن، خانیێ زنچكی ژ حەریێ و لبنان یان بەرا دهاتە چێكرن ب شێوەكی سێ گۆشەیی سەربانێ وی چێدكرن داكو بەفر و باران لسەر نەسەكنت و بێتە خوارێ، ئەڤ خانی ب رێزكە نیڤل یان شەقلا و دگەل قرش و قەمیشی دهاتە دۆردان دڤیا ژ دیوارێ بۆری با دگۆتنێ سڤاندە.
هەروەسا زەمبلیتك:تێژكێت بەفرا جەمدی ئەوێت ب سڤاندێن خانیانڤە چێدبوون ل وەرزێ زڤستانێ ژبەر سر وسەقەمێ دگۆتنێ زەمبلیتك.
تُتاح هذه الصورة أيضا في: کوردی