ئەگەرێن خۆكوشتنا ئافرەتان
دلڤین خەلەف
ئەڤە دەمەكە نڤیسینا ڤی بابەتێ گرنگ ل بیرا من بوو لێ ژ كارتێكرنا وێ یا خراب ل سەر دەروونێ خەلكێ مە ب گشتی و ئافرەتێ ب تایبەتی من نەدڤیا بابەت بێتە ئازراندن،ئەو ژی ژبەر گەلەك ئەگەران و ژوان ژی برینداركرنا هەستێ ئافرەتان د ڤێ قۆناغا هەستیار دا كو خەلكێ مە یێ شنگال ل ناڤ كەمپان دا ژیانا خۆ دبەنەسەر.
ب راستی پێتڤیە ئەڤ جۆرە بابەتە ب هشیاریەكا مەزن و ب زانابوون بێتە بەحسكرن و شرۆڤەكرن و كارەكێ ئێكجار باش بێتە كرن،پێخەمەت مرۆڤ ب كارت ئەنجامێن راست و دروست یێن كارتێكرنێ ژ هەموو ئالیان ڤە بێژت و فەرە ژ دەستپێكا ئەگەرێن وێ یێن سەرەكی بابەت بێتە شۆپاندن و رۆنكرن ل سەر بێتەكرن،ل گۆر ڤەكۆلینێن بەرفرەهـ ل سەر ئەڤی بابەتێ گرنگ ژ چەندین ژێدەرێن جیێ باوەریێن بەردەستێ مە كەفتین و ب تایبەت ب رێیا كاری كو بووینە چەند سال ئەم دناڤ خەلكێ خۆ دا ئەنجام ددەین و ل گۆر ئەوان پێزانینێن هەموو جاران دكەفتنە بەر دەستێ مە فەرە چەندین ئەگەر و چارەسەریێن ئەڤێ دیاردا خراب ب رێیا ڤی بابەتێ گرنگ د ئەڤان خالێن ل خوارێ دیار بدەینە خویاكرن و كارتێكرنا ڤێ چەندێ ل سەر رەوشا خەلكێ مە یێ شنگال ب تایبەت پشتی ئەوێ كارەساتا مەزن ژ ئەنجامێن وێ هێرشا هۆڤانە ژلایێ رێكخراوا تیرۆرستیا داعش ب سەرێ وان دا هاتی و بووینە قوربانیێن هزر و بیرێن پاشڤەرۆ، ئاوارە ژیانا خۆ ل ناڤ كەمپێن كۆچبەریێ دەرباز دكن.
1_ بێگۆمان هەر دەڤەرەكا تووشی جەنگ و شەر و كارەساتان ببت و خەلكێ وێ دەربەدەر و ئاوارە دبت و ئەڤ جۆرێن كاودانا دێ دناڤ دا پەیدابن.
2_ هەر دەمەكێ رەوشا خیزانێ ژلایێ ئابووری ڤە ئالۆز و بەرەف خراب بوونێ ڤەچۆ، و بەلەنگازی و دەستكورتی و نەبوون دناڤا جڤاكێ سەرهلدا، بێگۆمان دێ نەخۆشیێن ساخلەمی و دەروونی دناڤ دا پەیدابن و ئەڤ جۆرە بابەتێن خراب دێ ب سەردا زال بن و خویا كن.
3_ بێكاری و مانا ل هیڤیا ئۆمێدێن پووچەل و بێ ئەنجام كارتێكرنەكا گەلەك مەزن ل سەر كەسایەتیا هەر مرۆڤەكی دكن و دبنە ئەگەرێن پەیدابوونا تێكچوونا رەوشا وان یا ساخلەمی و ئەنجامێن خراب ژێ پەیدا دبن و ئەڤ جۆرە بابەتە دئێنە پێش.
4_ دووركرنا خیزانێ ژ ئێك نەخاسمە دایك و باب ژ زارۆكێن سنێلە و نەفام دبتە ئەگەرێ ژێك دووركرنا هزر و بیرا دناڤبەرا وان دا و ئەڤ چەندە ژی ئەنجامێن خراب ژێ پەیدا دبن.
5_ كارتێكرنا بكارئینانا كەرەستێن قەدەغە ب هەموو جۆرێن خۆ ڤە و دانوستاندنا نەرەوا و بەروڤاژی داب و نەریتێن جڤاكی دگەل كەسێن خراب و دووركەفتن ژ خووندن و فێركرنێ و نەبوونا كەسێن ژیر و شیرەتكار ل نێزیك ئەوان كەسێن د قۆناغەكا مەترسیدار دا دەرباز دبن ،دبتە ئەگەرێن ئەنجامدانا ڤان كاودانێن نەشارستانی و خراب.
6_دانوستاندنا دژوار و شاش ژلایێ خێزانێ ڤە دگەل گەنجێن سنێلە دناڤ مالێ دا ئێك ژ ئەگەرێن هەرە مەزنە ژبۆ پەیداكرنا ئاریشێن دەروونی و تووشبوونا وان بەرەف رەوشەكا رەش و تاری.
ئەڤە ژی چەند نمونەیێن كێم بوون مە دڤان چەند خالان دا داینە دیاركرن ژبۆ ڤی بابەتێ گرنگ وكارتێكەر، بێگۆمان گەلەك ئەگەرێن دی ژی هەنە كارتێكرنا خۆ ل سەر رەوشا ئەوان كەسان دكن كو ژیانا خۆ ب داوی دئینن و خۆ دكوژن،لەوما فەرە ل سەر هەموو لایەنێن پەیوەندیدار و ب تایبەت رێكخراوێن مافێ مرۆڤان و دام و دەزگەهێن پەیوەندیدار یێن حكومەتا هەرێما كوردستانێ گرنگیا ئەڤی بابەتی ل بەرچاڤ بگرن و بزاڤێن چارەسەریێ ژبۆ ئەڤی توخمێ مرۆڤان ببینن و بزاڤێن پەیداكرنا ژیانەكا خۆش ژبۆ هەموو گەنجێن وەلاتێ مە بكن پێخەمەت هەبوونا جڤاكەكێ ساخلەم و ڤالا ژڤان جۆرە كاودانێن خراب و بێ مفا و هیڤیا ساخلەمیەكا باش بۆ تەڤایا گەنجێن گەلێ مە و بەرەف ئارامی و ئاڤەدانی یا كەسایەتیەكا ب هێز و خودان شیان بۆ هەموو كەچ و كورێن ڤی وەلاتی.
تُتاح هذه الصورة أيضا في: کوردی