تۆرا لالش
ئەم گۆڕا خوە ل کی دەرێ بکۆلن؟
شعر: ساکار کامل ــ شاریا
ئەزێ ژ حەرفێ ب ڕێکەڤم،
ئەوا پەرتووکەک ل خاچ دایی!
دێ ژ برینێ دەستپێکەم
ئەوا هەزار بەدەن بن ئاخ کرین،
نا نا،
ئەزێ ژ ئاڤێ دەستپێبکەم،
ئەوا هەموو
هێلینێن ماسیان کرینە زێمار..
..
دوو بهۆست و نیڤان
وێدەی خەیالێ؛
مە گۆڕا خۆ کۆلا،
کفنەک ژ خوونا
برینێن کەڤن سۆر کر،
هەر هژدە گەزان
مە تخووبەک پێڤە درووت،
هەر گەزەک هندابوونەکە،
هەر گەزەک وێرانیەکە،
هەر گەزەک،
گەزەکێ ل دەرگۆشا
وان زارۆیان ددەت،
یێن ب تێهنا ڕۆژێ و
بێهنا بارانێ فرشکبووین،
هەر گەزەک،
گەزەکێ ل دەرگۆشا
وان زارۆیان ددەت،
یێن ب شیرێ فریشتەیان و
نوورا خوداوەندان فرشکبووین.
ئەم گۆڕا خوە ل کێدەر ب کۆڵن؟
چەنگەکی ئاخێ نەما مە نەخواری؟!
..
ئەزێ ژ حەرفێ دەستپێکەم ..
دێ ژ برینێ دەستپێکەم..
حەرفا مە
برینەکە تژییە؛
ژ ئاخێ
ژ داخێ
ژ هەیواخێ..
برینا مە
حەرفەکە هارە؛
ژ ئاخێ
ژ داخێ
ژ هەیواخێ..
..
ئەم ل ژیانێ دگەڕن
ل گرخولکێ
ئاخ و خوونێ گەڤزین.
ئەم ل ژیانێ دگەڕن
ئەو ژ مە بازددەت،
بازدانەک ب دووراتیا
قوبا فەلەکێ و
لێگەڕا میر مح..
بازدانەک ل سەر پڕا سەراتێ؛
ل ڤی ئالی دۆژەهـ
ل ئالیێ دن ئاگر،
ل وی ئالی باری
نەبوون و تاری!.
..
ل وێ خۆپانێ
ل داوی خالا نەهاتنێ،
دەستێن مە
کەسکەسۆران دجڤینن،
چاڤێن مە
ل گەردەنا
پەڕاڤا وێ ئاڤا سپی دچەرن.
پریسکێن بایێ ئێڤاریەکە دەرەنگ،
ل هناڤێن مە دبارن.
ل وێ خۆپانێ
ل داوی خالا نەهاتنێ،
ئەشقێ ژ مە ددزن!
ئەم گۆڕا خوە ل کێدەر ب کۆلن؟
چەنگەکی ئاخێ نەما مە نەخواری؟!
..
ئەز دێ
ژ حەرفێ دەستپێکەم؛
ئەوا ڕووگەها وێ برینەک بت و
خەیالا وێ پێت!
ئەزێ ژ حەرفێ دەستپێکەم
هەزاران هەلبەست سەرژێکربن،
ئەو هەلبەستێن ڕێزکری
ل سەر بەدەنا سۆمەر و
عەرشێ (ئینانا)..
..
ڕێیەک دچت
ب تەنا سەرێ خۆ دمەشت،
مەشیانەک
ب لەزا هەدبانی؛
مە ئارەزوویا سەکنینێ دکر،
دەم د بوهوژی،
ئەم دەربازی
ئالێ دی یێ هەوارێ بووین،
هەوارەک پڕ ژ لەقیانێ
هەگبەیێ مە ڕژییا،
نە مە تاسەک
ژ ئاڤێ ڤەخوار؛
نە ژی
لەقەک ژ پرتا نانی!.
..
ڕێ د مەشیا
مە پرتکێن خەریبیێ لێکددان،
ئاڤاهییەک بێهەشبوو!
د پەنجەرەیا ویدا
هیڤیێن مە دالقاندن،
ئەو کۆترێن
مە بۆ ئازادیێ ب خودانکرین
چەنگۆ بوون،
باسکێن وان
د تۆزێ دا بوونە هەڵم،
ئەم گۆڕا خوە ل کێدەر ب کۆلن؟
چەنگەکی ئاخێ نەما مە نەخواری؟!
…
مە ڕێیەک هزرەتە
سیناهی لێ ڤەحەویێت
خەونێن مە لێ مەخەل ببن،
هەناسەیەک
د بەختەوەرییێ دا بپەنگت،
و د لەشێ کەوچەرینەکێدا
کلامەکێ ب گرنژینا
کێلیێن خوە ببێژین!
د عشقا خودایی یا خدر و لیاس دا،
قورمەک ژ هێوانێ ب نۆشین
هێوانەک ب سوڕا نەمرییێ..
..
د ڤێ مەشێدا،
وەهمەک
ژ شەهرستانیەتا باژێڕان و
کەندەک
ژ غوبارا دیرۆکێ ڕێهەڤالن،
ڕێیەک
ل سەمتا دەریێ عشتار،
ڕێیەک ل سەمتا
وان گۆرستانان درێژ دبت،
هەر کێلییەک
سترانەکە شین
ب گولیەکە گەنمی دبێژت،
هەر کێلییەک
شعرەکە سپی ب نانی دخێزت،
مستەک ئەردنیگارییێ
ل کێدەر بچنن؟.
چەنگەکی ئاخێ نەما مە نەخواری؟!
تُتاح هذه الصورة أيضا في: کوردی