تۆرا لالش ــ مەهدی حەسەن مراد
رەوش گەلەک یا مەترسیدارە. ل گورەی ئاژانێن جیهانی ژوانژی CNN و رویته‌رز ئەمریکا پلانێن هێرشێن نووی ل سەر ئیرانێ ئامادە کرینە و باس ل بکارئینانا GBU-43/B یا بناڤ و دەنگ “دایکا هەموو بۆمبا” MOAB دکەن بوو لێدانا بنگەهێن ئەتۆمی و وزێ یێن ئیرانێ.
ل بەرامبەر وێ ئیرانێ گەفێن مەزن کرینە، ب تایبەت ل کەنداڤا عەرەبی و ده‌رته‌نگا هورمز، بەرپرسێ ئەنجومەنێ ئاسایشا ئیرانێ مه‌حسین رەزایی گۆتیە دێ هێرشی ژێرخانا دیجیتالی یا ناڤچێ کەن، وەکی کێبلێن پەیوەندی و ناڤەندێن داتا.
بەلێ ترامپ خوە ب خوە راگەهاند: “ئەم هێرشی ئیرانێ ناکەین بەری هەلبژارتنێن ناڤەڕاست یێن ئەمریکا ل ٣ی نوفەمبەرێ”. وێ دبێژت گفتوگۆیێن بەرهەمدار دگەل ئیرانێ هەنە و دۆرپێچا دەریایی یا لسەر بەندەرێن ئیرانێ هێش د بەردەوامن، واته شەر راگرتیە مەسرەفا سیاسی، نە بۆ ئاشتیێ.
٢- هەلبژارتنێن ئەمریکا و ترسا شەرێ ناڤخۆیی
نها هەموو چاڤ ل ٣ی نوفەمبەر ٢٠٢٦ نە، تره‌مپ دبێژت حوسیێن یەمەنێ ب مەبەست بهایێ پەترۆلێ بلند دکەن داكو زیانێ بگه‌هننە کۆماریان د هەلبژارتنان دا و وی گۆتیە “من چ جاران ژبیرنه‌كریه”، ل میدیایێن ئەمریکی باس ل ئەگەرێ راگەهاندنا بارێ لەشکه‌ری و تێکدانا هەژمارا دەنگان دهێتە کرن، بەلێ هەتا نها چ بەلگەیا فەرمی نینە کو ترامپ پلانەک بۆ شەرێ ناڤخۆیی هەبت.
٣- تەقینا ل بەغدا،دوهی ب شەڤ ل ١٧ی ئۆکتۆبەرێ ٢٠٢٦ تەقینەکا مەزن ل بارەگه‌یێ سەرەکی یێ حەشدا شەعبی ل رۆژهەلاتا بەغدا روودا، ل گورەی ئاژانسا رویته‌رز کەسەک هاتیە کوشتن و چار بریندار بوون. حەشدا شەعبی خوە دبێژت تەقین ژ ئەگەرێ تەقەمەنیێن خراب بوویە یێن د کۆگه‌هان دا، ل ١٨ی ئه‌کتۆبەرێ ژی جارەکا دی میدیایا ئیسرائیلی باسی تەقینەکا نەدیار د کۆگه‌هه‌کا چەکی یا حەشدێ دا کر، ئەڤە د وێ چەند رۆژێن دوماهیکێ دا دووەم روودانە.
٤- مەترسیا سەرهلدانا داعشێ
پشتی ڤەکێشانا ئەمریکا، ترسا داعشێ زڤریە، هێزێن ئەمریکی ل ٣٠ی ئەیلولا ٢٠٢٦ ب تەواوی عێراق بجهـ هێلا، کو دوماهیکا ئۆپەراسیۆنا دژی داعش بوو یا ١٢ سالان بەردەوام بوو، رویته‌رز دبێژت ئەڤ ڤەکێشانە دێ بۆشاییەکا ئەمنی چێکه‌ت و میلیشیایێن سەر ب ئیرانێ و داعش دێ ب هێزتر بن، ژه‌نەرالێ خانەنشین بووی HR McMaster ژی هۆشداری دایە کو ئەڤ دەمە دێ ئیرانێ بهێزتر کەت و عێراقێ بێ پاراستن هێلیت د هەمبەر سەرهلدانا داعشێ، نها حکومەتا عێراقێ هێرشێن ئه‌سمانی ل سەر پاشمایێن داعشێ زێدە کرینە.
٥- ڤەکێشانا ئەمریکا ژ عێراق و کوردستانێ – خیانەتەکا ستراتیژی؟
ئەڤە خودێ مەزنترین خالە، ل ٣٠ی ئەیلولا ٢٠٢٦ هێزێن هه‌ڤپەیمانان و ئەمریکا ژ بنکەیا ئه‌سمانی یا هەولێرێ ب رێک و پێکی ڤەکێشان، ل گورەی لومۆند، دوماهیک ١٥٠٠ سەربازێن مایی ل هەولێرێ بوون و هەموو چوون. پنتاگۆن راگەهاند Operation Inherent Resolve ب فەرمی ب دوماهی هات.
وەزارەتا پێشمەرگەهی راگەهاند ئەڤ ڤەکێشانە ب رێكکەفتنا دناڤبەرا بەغدا و واشنتۆن دا بوویە، بەلێ ل کوردستانێ وەکی ئاگربەستەک بوو – کورد هەست ب نە ئارامیێ دکەن، راپۆرتا Kurdistan24 دبێژت: “ڤەکێشانا ئەمریکا ئه‌زموونه‌كا بۆ سەروەریا عێراقێ و دخوازت کوردستان بەرەڤانیا خوە بهێزتر بکەت، کوردستان نها بێ بەرگریا ئەسمانی یا رەسەن مایە دژی درۆن و موشەکان.
٦- حکومەتا عێراقێ – وەزیرێن سەر ب میلیشیایان
حکومەتا نوی یا عەلی زه‌یدی ل ١٤ی ئایارێ ب ١٤ وەزیران دەست بکار بوو، ٩ وەزارەت هێشتا ڤالا بوون، د ناڤ دا بەرگری و ناڤخۆ، ترامپی قەدەغە کربوو کو کەسێن سەر ب میلیشیایێن تیرۆرست بن ببنە وەزیر، ل ١٥ی ئه‌کتۆبەرێ پەرلەمانێ عێراقێ ل دوماهیێ ١١ وەزیر پەسەند کرن، د ناڤ دا نایف شەمەری وەکی وەزیرێ بەرگری و یاسر مالیکی وەکی وەزیرێ ناڤخۆ. میدیایێن ئەمریکی دبێژن جێگرێ سەرۆک وەزیران کەسەکە سزادایێ ئەمریکایە و برایێ قەیس خەزعەلی یە، سەرکردێ عەسائیب ئەهلولحەق. ئانکو زاڤایێ مالیکی و جەماعەتا خەزعەلی بووینه وه‌زیر و به‌رپرس.
٧- کوردستان – هێشتا بێ حکومەت
پارتی و ئێکەتی ژ هەلبژارتنێن ئۆکتۆبەرا ٢٠٢٤ وەرە نەگەهشتینە رێککەفتنێ، پارتی ٣٩ کورسی و ئێکەتی ٢٣ کورسی ل پەرلەمانێ ١٠٠ کورسی هەنه، دادگەها فیدرالی یا عێراقێ کەیسا حکومەتا هەرێمێ پاشئێخست بوو ٢٦ی ئۆکتۆبەرێ.
نها نووترین زانیاری، پارتی و ئێکەتی رێککەفتینە کو ل ئۆکتۆبەرا ٢٠٢٦ پەرلەمانێ کوردستانێ کارا بکەن و رێ بۆ حکومەتا نوو ڤە ببت. سەرۆکایەتیا هەرێمێ ژی ل ١٤ی ئه‌کتۆبەرێ دگەل کونسولێ ئەمریکا ل هەولێرێ کۆم بوو و تەکەز لسەر گرنگیا ئێکگرتنێ و لەزکرنا پێکئینانا کابینەیا نووی کر، بافل تالەبانی ژی گۆتیە ئامادەیە دەست ژ داخوازیێن حزبی بەردەت بەلێ مافێ گەلێ کورد ناهێتە دان و ستاندن.
٨- کوردستان ئارامە بەلێ بوو چەند؟ شرۆڤه‌كرنا قۆناغا داهاتی
ل کوردستان ئارام و تەنایە ل ناڤەڕاستا ئاگری.
چاوا ڤی قۆناغی تێپەڕینین؟
١. بەرگری: بێ ئەمریکا، پێدڤیە پێشمەرگە خۆ ب سیستەمێ دژە درۆن بهێز بکەت، ئەمریکا ب سۆز مابوو بەلێ چوو، نها دڤێت کوردستان راستەوخۆ دگەل وەزارەتا بەرگریا ئەمریکا و فەرەنسا و ئەلمانیا باخڤت، نە د رێیا بەغدا را.
٢. سیاسەت: ئەگەر کابینەیا ١٠ێ هەر ل ئه‌ۆکتۆبەرێ نەهێتە پێکئینان، دادگەها فیدرالی دێ دەستوەردانێ کەت و بودجه و مووچە دێ بنە کارتەکا فشارێ و پێکئینانا حکومەتێ نها ژ هەموو دەمان گرنگترە.
٣. ئابووری: ئەگەر شەرێ ئەمریکا و ئیرانێ دەست پێ بکەت پشتی ٣ی نوفەمبەرێ، نرخێ پەترۆلێ دێ بلند بت – ئەڤە بوو کوردستانێ باشە بەلێ رێیا هەناردەکرنێ دێ ب مەترسی کەڤت ژبەر حوسی و میلیشیایان.
رەوش بەرف ئاقرەکێ مەزن ڤە دچت، بەلێ ئارامییا کوردستانێ د دەستێ پارتی و ئێکەتی دایە، ئەگەر نها نە بنە ئێک، چ دەولەت دێ وان بپارێزت؟
تُتاح هذه الصورة أيضا في: کوردی