Eşîrên êzîdî: Bila eşîrên ereb navê endamên xwe yên ku tevlî DAIŞê bûne, eşkere bikin
BasNews
Serokê eşîreka êzîdî dibêje, divê wan endam û çekdarên DAIŞê ku destê wan di komkujiya êzîdiyan de hebûye, bên dadgehîkirin ji ber wê jî divê eşîrên ereban yên devera Neynewa navê wan çekdar û endamên DAIŞê eşkere bikin.
Dema çekdarên DAIŞê havîna 2014 êrişî devera Şingalê ya Başûrê Kurdistanê kirin, gelek erebên Şingalê tevlî DAIŞê bûn û di komkujkirin û revandina kurdên êzîdî de beşdar bûn.
Serokê eşîra Şirkan ya êzîdî, Omer Elî Kebho di daxuyaniyekê de, ku nusxeyek bo BasNewsê hatiye şandin, ragihandiye, dê li dijî hemû wan endam û çekdarên DAIŞê ku tevlî komkujkirin û revandina êzîdiyan bûne, li dadgehê gilî bike.
Omer Elî Kebho bang li eşîrên ereban yên devera Neynewa û Şingalê jî kiriye, ew endamên eşîran yên ku destê wan di kuştin û revandina êzîdiyan de hebûye, eşkere bikin û radestî dadgehê bikin da ku êzîdî û ereb bikarin bi hev re bijîn.
Wî mezinê êzîdiyan her wiha daxwaz kiriye ku pêşiya “baskê siyasî” yê DAIŞê jî were girtin û gotiye, her kesê ku agahî li ser çete û çekdarên DAIŞê yên ku destê wan di jenosîda êzîdiyan de hebûye, eşkere bike.
تُتاح هذه الصورة أيضا في: Kurdî