Hewlêr (K24) – Serokwezîrê Herêma Kurdistanê Mesrûr Barzanî ligel Serokwezîra Îtalyayê Giorgia Meloni civiya û ji aliyê Meloni ve bi fermî bo Îtalyayê hat vexwendin.

Îro Înê 23ê Berfanbara 2022yan, Serokwezîr Mesrûr Barzanî di merasîmeke taybet de li Balafirgeha Navdewletî ya Hewlêrê, pêşwazî li Serokwezîra Îtalyayê Giorgia Meloni kir.

Piştre di civînê de li ser pêşvebirina pêwendiyên Herêma Kurdistanê û Îtalyayê gotûbêj kirin.

Serokwezîra Îtalyayê kêfxweşiya xwe bi serdana Hewlêrê nîşan da û amaje bi dostaniya bihêz a navbera Herêma Kurdistanê û Îtalyayê kir û rewşa pêkvejiya aştiyane ya navbera pêkhateyên cuda û bi taybetî rola Herêma Kurdistanê di parastina Xirîstiyanan de bilind nirxand. Herwiha daxwaza welatê xwe ji bo hevkarîkirinaHerêma Kurdistanê di hemû waran de dubare kir.

Giorgia Meloni herwiha bi fermî Serokwezîrê Herêma Kurdsitanê Mesrûr Barzanî bo Îtalyayê vexwend.

Serokwezîra Îtalyayê di konferansa rojnamevanî ya hevbeş de diyar kir: “Îtalya dê li cem Herêma Kurdistanê bimîne û em ê karên konsulxaneya me ya li Herêma Kurdistanê mezintir û berfirehtir bikin.”

Serokwezîr Mesrûr Barzanî jî diyar kir ku hatina Serokwezîra Îtalyayê dilgermî û piştevaniyeke bihêz e ji bo xelkê Kurdistanê û hêviya xwe anî ziman ku pêwendiyên navbera herdu aliyan di hemû waran de pêş bikevin.

تُتاح هذه الصورة أيضا في: Kurdî