زوبَعَه…
سيمون عيلوطي
هَالزّوبعه الْ هَبّت عَ غَفلِه….
كَسّرت جِسْر التّلاقي
مع تَفاعيل الزّمن،..
جَرْجَرَت روح الصّحارى
عَ الجّنايِن…
وِالمسارِح وِالطّرَب،..
دارَت السّاعات،.. تجري للخَلِف
تِفْتَح سْواق العبيد..
وِالجّواري بِالمَزاد،..
حالِة سَواد..
خيّمَت وِالجّهْل عاد!!
***
أجسام سودا مْقنّعه..
فِلْتَت بِليلِه غيّرَت شِكْل القمر
صَحّرَت وَهْج العُقول
وِالحُقول
وِالبداوي وِالحَضَر،..
راجَت صور..
شو شِنْعَه عنها مَ انْحكى
لا بِرجْفات الرّعُب..
لا بِالبُكا..
حَيّات تِطْلَع من تَجاعيد الوَطا*
شي صفرا شي زرقا
ومنها مْرَقّطَه…،
شو يْروج فِكْر الطّرْطَقه
يِنْخِفِض كَرّ الكَنار…
يِهْوي زِزّ الزّنْبَقه!!
——
الناصرة:27-9-2014
——
*الوَطا: الأرض
تُتاح هذه الصورة أيضا في: العربية