Peyama Serokwezîr Mesrûr Barzanî bi helkefta cejna Newrozê
Bi minasebeta cejna Newroz û sersala nû ya Kurdî, germtirîn pîrozbayiyên xwe pêşkêşî tevahiya Kurdistaniyan, bi taybetî pêşmergeyên qehreman, hêzên asayîşa navxwe û kesûkarên serfiraz yên şehîd û enfalan dikim.
Hêvî dikim rojên cejnê di nava rewşeke aram, şadî û xweşî de biser berin, daxwaz ji welatiyan dikim di dema seyranê de paqêjiya jîngehê biparêzin û rêkarên hatinçûnê jî cîhbicîh bikin.
Di dirêjahiya dîrokê de Newroz bo gelê Kurdistanê herdem sembola berxwedan, rûbirûbûna sitem û zordariyê û domandina xebat, azadî û rizgarbûnê bûye. Gelê Kurdistanê niha jî berdwam e li ser xebatê bo parastin û berevanîkirin ji mafên xwe yên destûrî, bi ti awayî jî ne amade ye di bin ti zextekê de dev ji xwestek û mafên xwe yên netewî berde.
Bi minasebeta Newrozê careke din em diyar dikin ku Herêma Kurdistanê weke her car faktereke girîng ya aramî û aştiyê li deverê de dibe û ti car nabe sedema gef û metirsiyan bo ti aliyekê, belku berovajî herdem li kêleka berevanîkirin ji mafên xwe yên destûrî, xwedan roleke girîng û berçav jî bûye bo pêşdebirina çanda lêborîn û bihevre jiyana aştiyane ya di navbera pêkhateyên curbicur yên Herêma Kurdistan û Îraqê de.
Newroza we pîroz be, Xwedayê mezin Kurdistan û Kurdistaniyan biparêze.
تُتاح هذه الصورة أيضا في: Kurdî
