تۆرا لالش
پشتی چل رۆژێن چلێ هاڤینێ ب دوماهی دهێن، رۆژا داویێ دبتە جەژن. ئەڤ جەژنە ئێك ژ وان جەژنێن رێورەسمێن وێ ل پەرستگەها لالش دهێنە گێڕان.
هەر بۆ زانین، چەندین جەژن ل پەرستگەها لالش دهێنە گێڕان وەك:
• جەژنا چلێ زڤستانێ
• جەژنا چلێ هاڤینێ
• جەژنا جەمایێ
جەژنا چلێ هاڤینێ ئێك ژ وان جەژنانە كو ل رۆژا دوماهیێ ژ چلەیێ دبتە جەژن و پێ دهێتە گوتن جەژنا چلێ هاڤینێ.
ئختیارێ مەرگەهێ و جڤاتا وی و دەروێش و شكەستی و زانایێن ئاینی و هەر ئێزدیەكێ بڤێت، ڤان چل رۆژا ب رۆژی دبن، دبێژنه وان چلەگر.
پێدڤیە ئەوێن بڤێن رۆژیێ بگرن، ل هێڤارا رۆژیا ئێكێ قەستا پەرستگەها لالش بكەن و هندەك ئاخێ ژ چلەخانێ دگەل خۆ هلبگرن.
دەمێ چلێ هاڤینێ:
چلێ هاڤینێ ژ 11ی حوزەیرانێ هەتا 20ی تیرمەهێ ب هژمارا رۆژهەلاتی دهستپێدكهت و 20ی تیرمەهێ دبتە جەژن، ئانكو ژ 24ی حوزەیرانێ دەست پێ دكت هەتا 2ی تەباخێ ب هژمارا زاینی، كو دبنە 40 رۆژ.
وەكی دیار، ئەڤ جەژن ب دەمی ڤە یا گرێدایە، د ڤان رۆژێن گەرم و درێژ دا زەلامێن ئۆلی و هەر ئێزدیەكێ بڤێت چل رۆژییان ژ بۆ خودێ دگرت.
ئەڤ جەژن بۆ ماوێ سێ رۆژان دهێتە گێڕان ژ 31ی تیرمەهێ هەتا 2ی تەباخێ ب هژمارا زاینی، و هەر ئێزدیەكی ب ڤێت قەستا پەرستگەها لالشا نوورانی دكت، لێ سەردەری و دیندار پێدڤیە شەڤەكێ بەری گێڕانا رێورەسمان ئامادەبن.
رێورەسم ب ڤی ئاوایی دهێنە گێڕان:
1. ئێزدی قەستا پەرستگەها پیرۆزا لالش دكن، دڤێت ژ سەر پرا سلاتێ ڕا دەرباز ببن و بچنە سەر حەودا كانیا سپی و دەست و چاڤێن خۆ پێ پاقژ بكت.
2. هەر ئێزدیەكی بچتە لالشا نورانی، دڤێت سەرەدانا كانیا سپی و دەریێ قاپیێ و زمزمێ و سندروكا شێخادی و بەرێ شباكێ و نیشانگەها شێخ فەخر و ئختیارێ مەرگەهێ و مەزارگەهێن شێشمس و شێخ و پیرێن خۆ بكەت و ل مەزار و نیشانگەهێن خاسان زیارەتێ بن.
3. ل هەموو هێڤاران سەما دهێتە كێشان و چرایێن ئاقد و نیشانگەهێن خاسان دهێنە ڤێخستن و هیڤی و دوعا دهێنە كرن.
4- ل هەموو رۆژان، سپێدەهیا پشتی بەیتا سبێ و هێڤارا بەری بەیتا هێڤاری رێورەسمێن قەنتارێ دهێنە گێڕان.
5- هەر كەس خۆ و كەس و كارێن خۆ ب ئاڤا زمزمێ سەلا دكت.
6- ئەو كەسێن نەمۆركرین، ب ئاڤا كانیا سپی دهێنە مۆركرن.
7- هەروەسا هەموو هێڤاران قەول و بەیت و قەسیدە دهێنە رێزكرن و دەف و شبابان لێدخن.
8- گۆڤەندا بەر دەرێ كانیێ دهێتە گێڕان.
9- سەردەریێن خاسان سماتێ چێدكن.
10- ل رۆژا دوماهیێ ژ جەژنێ تاوس دهێتە جوانكرن.
11-ل گوندان هەر مالەك سەربرەكێ سەرژێ دكت.
هەر بۆ زانین،چلەگرێ چلێ زڤستانێ ژ 24ی كانوونا ئێكێ دەست پێ دكەت هەتا 2ی سباتێ ب هژمارا زاینی، دیسا ل رۆژا 40ێ دبتە جەژن. رێورەسمێن وێ جەژنێ هەر وەكی یێن جەژنا چلێ هاڤینێ نە و ل پەرستگەها لالش دهێنە گیران:
ئەڤە دگەل نڤیسینا مەدا چەند بەیتێن ژ ئەدەبێ ئایینێ ئێزدیان دیار د کەت دڤێت رێز ل چلەگرا بهیتە گرتن:
مەلەك فەخرەدین دەنگ هلتینە
هنجیێ خاترا من تێ ببینە
دلێ چلەگرا نا ئێشینە
چلەگر برۆژینە
فەرزێن خۆ بجهـ تینن
ئەو جندیێن سلتێنە
ب شەڤ رۆژ برۆژینە
ئەوان فتار نینە
ئەو جندیێن سولتان ئێزینە
ژێدەر:
1. پەرتووكێن پەروەردا ئێزدیاتیێ.
2. مامۆستایێ ئایینی پیر سەعید پیر بیبو
٣- پیر خەلات ئەلیاس زانایێ ئاینی
تُتاح هذه الصورة أيضا في: کوردی