کچکا “چاڤ سحری” هاتە دەستەسەرکرن
ئێن ئارتى
پشتی ٣٤ سالان ژ بەلاڤبوونا وێنەیێ زارۆکا چاڤ سحری یا ئەڤغانی د بەرگێ گۆڤارا ناشیۆناڵ جوگرافیک دا، شەربەت گول ل وەلاتێ پاکستان ب ناسنامەیەکا ساختە هاتە دەستەسەرکرن.
پۆلیسێ پاکستان وێنەیەکێ شەربەت گول-ێ بەلاڤکریە ل گرتیگەهەکا وی وەلاتی کو ب توهمەتا هەبوونا ناسنامەیا ساختەیا پاکستانی هاتیە دەستەسەرکرن.
شەربەت د نهادا ٤٤ سالە و د ژیێ ١٢ سالیێ دا و ل سالا ١٩٨٤ێ وینەیەکێ وێ ژلایێ ستیڤ مەکوری یێ فۆتۆگرافەر د کەمپەکا ئاوارەیان دا هاتە گرتن و پشتی بەلاڤبوونا وێنەیێ وێ ناڤودەنگێ وێ ل جیهانی بەلاڤبوو ئان کو وێنەیێ وێ ل جهانێ دەنگڤەدا، کو ب زارۆکا “چاڤ سحری” یا ئەڤغانستانی ناڤ دبر.
شەربەت گول یا ٤٤ سالی، ل باژێرێ پیشاوەرێ پاکستانێ ب توهمەتا هەلگرتن و بکارئینانا ناسنامەیا ساختە ژلایێ پۆلیسی ڤە هاتیە دەستەسەرکرن، ئیدارەیا ڤەکۆلینا فیدرالیا پاکستانێ دبێژیت شەربەت بۆ دەمێ ٢ سالان دێ هێتە زیندانیکرن بۆ ڤەکۆلینکرن دگەل دا.
پۆلیسێ پاکستان دبێژیت شەربەت دەمەکی هاتیە دەستەسەرکرن کو ئاشکرا بوویە ناسنامەیا ئەفغانی و پاکستانی هەبوویە.
شاهید ئیلیاس، بەرپرسەکێ ئیدارەیا ڤەکۆلینا فیدرالی یە ب ئاژانسا نووچەیان یا فرانس پرێس گۆتیە “سێ کەس ل بەرپرسێن رێڤەبەریا ناسنامە و ئاکنجیکرنێ توهمەتبارن ب پێدانا ناسنامەیا ساختە ب شەربەت گول-ێ”.
لگۆری زانیاریێن ئیدارەیا ڤەکۆلینا فیدرالی ل سالا ٢٠١٤ێ شەربەت ب ناڤێ “شەربەت بی بی” داخازی پێشکێشکریە بۆ دەرکرنا ناسنامەیا پاکستانی.
ستیڤ مەکوری د سالا ٢٠٠٢ێ دا جارەکا دی شەربەت دیت و وێنەیێ وێ گرت و کو خودانێ سێ زارۆکان بوو.
د دەمێ وێنەگرتنێ دا مێرێ شەربەت-ێ رازی نەبوویە ستیڤ ب تنێ وێنەیێ شەربەتێ بگریت و داخاز لێ کر کچکەک وێنەیێ وێ بگریت.
تُتاح هذه الصورة أيضا في: کوردی