باندۆرا سیاسەتێ لسەر كەسی
جوان بەرواری
هەر تشت ل گۆر پیێكهاتا جڤاك، ئۆل، نەتەوە، چاند و هۆنەر دئێتە ژیانكرن و تێكستكرن، بێگومان قەیرانێن جودا جودا ل هەر وەلاتەكی روو ددەن، لێ ب ئاستێن جودا، ل وەلاتێن كو قانوون تێدا سەروەر، هەر قەیرانەكا پەیدا دبت نێزیك یا دی یە و جۆرەكێ پەیوەندیێ ل گەل هەیە، ژبەركو جڤاك ل سەر بنگەهەكێ قانوونی و بەها و پرەنسیپێن تەڤاهی هاتیە دامەزراندن، لەورا ژی گاڤا كو چارەسەریان دبینن، قەیران لسەر هەموو ئاستان سڤك دبن.
دیارە هەر وەلاتەكی مێتۆدەكا پێشكەفتنێ بۆ خۆ هەلبژارتیە ئەو ژی لسەر ماهیەتا جڤاكێ وەلاتی دمینت، بنێرە حوكمەتا وەلاتیێن رۆژهەلاتا ئاسیا و ئەمریكا لاتینی شێوازەكێ جودا بخۆ هەلبژارتیە، ل وەلاتێن رۆژهەلاتا ئاسیا، گرنگی دانە كەرتێ پەروەردێ داكو تاكەك هشیار و رەوشەنبیر ئاڤا بت، بەلێ ل ئەمریكا لاتینی دەستهەلات گرنگیێ ب هەست و هزرا نەتەوەی ددەت و وەسا هەڤوەلاتیەكێ ئازا و بەرهەمهێنەر ئاڤا دكت، كو خزمەتا وەلاتێ خۆ بكت، بەرژەوەندیا گشتی بپارێزت، زێدەباری پاراستنا بەرژەوەندیا تاكەكەسی و گەشەكرنا ئاستێ ژین و ژیارا خێزانێ هەتا كو ل داویێ جڤاكەكێ خودان هیمەت ئاڤا دبت و لسەر سیستەمەكێ ساز و دروست بەردەوام ببت،لێ سەرەرای ڤان هەموو پێشهات و نموونەیان: هەتا نهۆ رۆژهەلاتا ناڤەراست ئەڤ ئێك نەدایە فامكرن، چوو مێتۆدێن ئاشكەرا بۆ پێشكەفتنا تاك و جڤاكی نەبوونە، لەورا ژی قەیرانان سەرهلدانە و ل جیێ دیتنا هندەك چارەسەری و ئالتەرناتیڤان و پێشبینیان بۆ داهاتوویێ دەستودار ئالۆز بوویە، وەك كو كورد دبێژن د دەست هەموویان دا رۆهن بوویە! ئێك ژ سەدەمێن سەرەكی بۆ ڤێ رەوشێ، نەبوونا گرنگی و پووتەدانێ ب زانست و مەعریفێ یە،جڤاكێ كوردی هەردەم قوربانی پێخەمەت ماف و دۆزا خۆ یا رەوا دانە، بەلێ مخابن هەتا نهۆ نكاریە وەك پێتڤی خزمەتا وێ دۆزێ بكت یان مافێن خۆ یێن رەوا تەكەز بكت و سەدەم ژی نەبوونا هزر و ئەقلەكێ رەوشەنبیر، كو نكاریە قوربانیێن خۆ ب ئاوایەكێ دروست تەوزیف بكت،دیارە جڤاك هینگێ ب هێز دبت دەمێ كو تاكەك ئازاد و بەرهەمدار ئاڤا دبت، بەلێ بەری هینگێ گەرەكە زەمینە و داینگەه بۆ تاكی هەبت، ئەو ژلایێ مەعنەوی ڤە و ژلایێ مادی ڤە ژی، چوو گرنگی ب ئالاڤ و ئەلەمەنتێن ژیانا سەردەم نەهاتە دان، داهات و سەروەت و سامان ب جارەكێ ب هەدەر دچن، لەورا ژی تاك ژ هەردو ئالان ڤە هەژارە، هەم ژلایێ مەعنەوی هەم ژی ژلایێ ماددی ڤە، زێدەباری وێ باندۆرا خراب ل سەر كارێكتەرا تاكی، هەبوونا هندەك پرسگرێكێن هەلاویستی و قەیرانێن جودا د وارێ سیاسی، قانوونی، ئابووری و دارایی دا، ئالیسەنگی د پسیكۆلۆژیا تاكەكەسی دا كریە، ئێدی هەست ب ئارامی و ئاشتیێ ناكت، هەتا وێ رادێ جوداهیێ د ناڤبەرا خەون و مافێن خۆ دا نزانت، دغیابا تاكەكەسەك نەهشیار، هەژار و نە دروست دا، نەكارە ئەم وەكو هەرێمێ ببن هێزەك كو سەردەست هزرەكێ بۆ بكن، ل دەمەكێ كو ئەوان كارێن مەزن ل سەر ژێرخانە و سەرخانێن خۆ كرینە و تاكەكێ ئامادە ئاڤاكرینە.
مرۆڤێن كو نەخوازن كار بكن، دەمی دكن بەهانە و دبێژن دەرەنگە، بەلێ ئەز دبێژم دەرەنگ نینە ب تایبەت بۆ كارێن باش، لەورا گەرەكە سیاسەتەكا نوو بێتە دارشتن كو زەمینە و داینگەهەك خۆش و ساز ئامادە بكت، ئەڤجا كار لسەر هەموو ئاستان بێتە كرن سەخمەراتی ئاڤاكرنا تاكەكێ هشیار، زانا و دەولەمەند ژهەر لایی ڤە و هینگی ئەم دكارن بێژن كو جڤاكەكێ ساخلەم دێ پەیدا بت، چنكو تاك بنسترا جڤاكی یە و جڤاك بنسترا دەولەتێ یە.
تُتاح هذه الصورة أيضا في: کوردی