پێتڤیە ئەم ئێزدی بەری هەموویان بێژین بەلێ بۆ سەربەخۆبوونا كوردستانێ
سوزان میرزا بەگ
هەر ژ كەڤندا ئێزدی تووشی گەلەك مالوێرانی و دەردەسەیێ و فەرمانا بووینە ،ئەڤەژی قەدەرا مە بوویە كو ئەم یێن دناڤ هندەك مللەتان دا ژ جوگرافیێ ڤە هەردەم هەرەشە بووینە و جیێ مەترسیێ بووینە ،ژبەركو ب شاشی د بیروباوەر و هزرێن مە ئێزدیا گەهشتینە،یان ژی ئەگەرا هەرە گرنگ كو مە دەست ژ كەلتۆر و بیروباوەرێن خۆ یێن رەسەن بەرنەداینە و مە بەردەوامی ب خەبات و تێكوشینا خۆ دایە ئەو ژی پاراستنا هزر و بیرێن خۆ یێن كوردیاتیێ بووینە،ژبەركو مە ئێزدیا خودایەكی تاك وبێ شریك ب زمانێ دایكێ ناسیە و كەسی لسەر مە فەرز نەكریە،لەورا ئەم شانازیێ ب ئۆل وئەركانیێن خۆ دبەین كو پەیوەندیەك و تێكلیەكا هەرە موكوم مە ب سروشتی ڤە یا هەی.
ئەگەر بێَین و بەر پەرێن دیرۆكێ هەل بدەین هەر لسەر دەمێ مێرنشینێن كوردا یان ژی لسەر دەمێ حكومەتێن هاتینە سەر دەستهەلاتا عێراقێ،دێ بینین هەردەم ئەم ئێزدی دئاگرێ هندەك كەسانێن شوفینی خودان هندەك هزرێن بەرتەنگ شەوتینە ئەوژی دكارین بێژین ژبەر بەرژەوەندیێن رژێمێن ئێك لدوڤ ئێكێ هاتینە سەر كورسیكا دەستهەلاتێ ،لێ پشتی رژێما گۆربگۆر ژناڤ چۆیی و دستورەكی نوو بۆ عێراقێ هاتیە دانان ب پشكداریا سەرۆك مسعود بارزانی بۆ ئێكەم جار ل مێژوویا كەڤن و نوو دا ناڤێ ئێزدیا د دستوورێ عێراقێ دا هاتە چەسپاندن،لێ مخابن پشتی چاردەسال ژی بسەر ڤە چووی ناڤەرۆكا ڤی دستووری نەهاتە بجهئینان ژ گەلەك ئالیان ڤە ،لەورا دێ بینین ژبلی (73 )ی فەرمانا ل ( 14/8/2007) كارەساتا گرعزێر و سیبا شێخدرێ روودا و پشتی هەفت سالان ل( 3/8/2014) دەڤەرا شنگالێ كەفتە بەر مەزنترین و دورەندەترین هێرشا چەكدارێن خیلافەتا ئیسلامی یا بناڤێ(الدولە الاسلامیە فی العراق والشام )،وەك دئێتە زانین ژ ئەنجامێن ڤێ هێرشێ ب هەزاران ژن وزارۆك پیر و لاو بوونە قوربانی و ب هەزاران دایك و خوشكێن مە رەڤاندن و ل بازارێن وەلاتێن دراوسێ كرین و فرۆتن پێ دئێتە كرن،ئەڤە ژی جیێ سەرشۆریا وان وەلاتایە ئەوێن كو دەست لگەل داعشێ هەین ،لێ مخابن هەتا نهۆ ژی حكومەتا عێراقا فیدرال وەك پێتڤی نەیا هاریكار بوویە كو كەیسا ئێزدیان ل ناڤ جڤاكێ نێڤ دەولەتی بەلاڤ بت وەك جینۆساید بێتە هژمارتن.
لێرەدا ئەگەرئەم وەك كورد قەوارەكی سەربەخۆباینە،ئانكو خودان دەولەت دستوور باینە مافێ مە ئێزدیان دێ دڤی دستووری دا هاتبا چەسپاندن و جارەكا دی تووشی مال وێرانیا نەدبووین وب ئازادانە رێورەسمێن ئۆلا خۆ و جڤاكێ خۆ یێ ئێزدی ئەنجام بدەین ،لەورا یا فەرو پێتڤیە لسەر مە ئێزدیا بەری هەركەسەكی دی بچینە سەر سندۆقێن دەنگدانێ و ژ هەموو دلێ خۆ بێژین بەلێ بۆ سەربەخۆبوونا كوردستانێ وبەلێ بۆ دەولەتا كوردی،چنكو كا چاوا ئەم ئێزدی زەرەرمەندێن ئێكێ بووینە،پشتی سەربەخۆبوونا كوردستانێ دئێتە راگەهاندن،ئەم ئێزدی دێ بەری هەر ئالیەكێ دی مفاداربین.
تُتاح هذه الصورة أيضا في: کوردی