ئەو كەسێن خۆپێشاندانێت ڤێ داویێ كرین پشتا خۆ ب ئالییەكی دەرەكی گرێداینە؟
خالد خدر
ل حەفتیێن بۆری زنجیرەكا خۆپێشاندانێت نەرازیبونێ هاتنە كرن ل دەڤەرا سولێمانیێ، ئەو خۆپێشاندانێت هەنێ رووداینە ب بەهانەیا نە دانا مووچەیێن فەرمانبەرا ، بەلێ جهێ داخێ یە كو ئاراستەیا وان خۆپێشاندانا هاتیە گهۆرین ژ داخوازكرنا مافێ خۆ بۆ ئەنجامدانا كارێن نە یاسایی و تێكدانێ و ئاژاوەگێری ، بەلكو خراپتر لێهاتینە كو خۆپێشاندەرا بارەگایێن حزبی و فەرمانگەهێن حكومی سۆت.
ئەڤ خۆپێشاندانە هاتنە كرن ل دەمێ ڤان ناكۆكیێن حكومەتا هەرێما كوردستانێ دگەل حكومەتا بەغدا ، و دڤان كاودانێن دژوار یێن هەرێما كوردستانێ تیرا دەربازدبیت ، و ڤان سزایێن حكومەتا بەغدا لسەر هەرێما كوردستانێ سەپاندن پشتی ئەنجامدانا ریفراندۆما هەرێما كوردستانێ ، كو حكومەتا عێراقێ وان پێدڤیێن دارایی یێن حكومەتا هەرێمێ نادەتێ بتنێ ب مەرجێ هەلوەشاندنا ریفراندۆمێ، و پاشی رادەستكرنا دەروازێن سنووری وفرۆكەخانا مخابنی هەمی بەهانە نە كو چەندین جارا حكومەتا هەرێمێ ولسەر زارێ سەرۆكێ حكومەتێ رێزدار (نێچیرڤان بارزانی)بەرهەڤییا خۆ داینە دیاركرن ژبۆ دانووستاندنا دگەل حكومەتا عیراقێ بەلێ هەتا نهۆ ئالییێ عیراقی هیچ بەرهەڤییا خۆ دیار نەكری یە ژبۆ دانووستاندنا ، زێدەباری داخوازكرنا مووچا خۆپێشاندەرا داخوازا چاكسازییا و نەهێلانا گەندەلیێ كرینە و هەروەسا داخوازا هەلوەشاندنا حكومەت وپەرلەمانێ كوردستانێ كرینە ، خالا نەرێنی دڤان خۆپێشاندانا دا ئەوە كو ژ روویێ شارستانی دەركەفتی نە و بەرەف تووندوتیژیێ وخرابكاریێ ڤە چووینە و بارەگایێن حزبی تێكداینە دگەل دام ودەزگایێن حكومی، و خالا دی یا نەرێنی و جهێ لسەر راوەستیانێ ئەوە كو ئەو كەسێن خۆپێشاندانێت ڤێ داویێ كرین پشتا خۆ ب ئالییەكی دەرەكی گرێداینە ؟، ئەوژی حكومەتا عیراقێ یە كو خۆپێشاندەرا ب ئاشكەرایی داخواز ژ حكومەتا بەغدا دكرن مایتێكرنێ بكت د كاروبارێ هەرێما كورستانێ دا ، ئەڤ چەندا هەنێ ژی خالەكا مەترسیدار بوو و دهەمان دەمدا سەدەما نەسەركەفتنا ڤان جۆرە خۆپێشاندانا ، چنكو حكومەتا عیراقێ نكاری یە هەتا نهۆ ئاریشێن خۆ چارەسەركەت ، ب تایبەتی ژ ئالییێ چاكسازیان ڤە و نەهێلانا گەندەلییا كارگێری و دارایی ل عیراقێ ، كو ئەڤە ماوێ دوو سالایە عەبادی و حكومەتا خۆ ژمارەكا هەوێن چاكسازیان كرینە بەلێ بێی چ ئەنجامێن ئەرێنی لپێ خۆ بینن هەتا نهۆ ، ئەو كەسێ نكارت ئاریشێن خۆ چارەسەر بكت چاوا؟ دێ ئاریشێن خەلكێ چارەسەركەت ، عەبادی بەردەوام بەحسێ چاكسازیێ و نەهێلانا گەندەلیا دارایی و ئیداری دكت و هەروەسا نەهێلانا سیستەمێ كەڤن یێ ب رێڤەبرنێ ل هەمی دام ودەزگایێن دەولەتێ دا.
بەلێ وەسا دیارە هەولێن عەبادی هەمی دبێ مفانە كو هەمی گۆتنێن بێ كریارن ، و ژبەر ڤێ چەندێ داخوازیێن رەوا یێن خۆپێشاندەرا بوونە قووربانی ڤان پیلانێن دەرەكی یێن مەرەمدار ، و هەروەسا وێنێ خۆ یێ راستەقینە شێلۆكرن لپێش چاڤێن خەلكێ ، كو پشتا خۆ گەرمكرن ب دژمنێت گەلێ كوردستانێ و ئەوێن بووینە سەدەما بِرینا مووچێن فەرمانبەرا و قوتكرنا بارا هەرێمێ ژ بۆدجا گشتی و خەلكێ مە ئێخستینە ڤێ رەوشێ و ل ڤێ داویێ سزایێن دی دەیناینە سەر خەلكێ هەرێما كوردستانێ ، ئەم ب هیڤی و ئۆمێدین كو رێزدار سەرۆكێ حكومەتا هەرێمێ دهەولدانا دایە ژبۆ دیتنا رێكە چارەیەكێ بۆ ڤێ رەوشا تەنگەزارا خەلكێ هەرێمێ تێرا دەربازدبت .
تُتاح هذه الصورة أيضا في: کوردی