شنگال بوویە خالا ناكۆكیێ دناڤبەرا ئیران و توركیا دا
خالد خدر
یارۆن وئاشكەرایە پشتی رزگاركرنا دەڤەرا شنگال لبن دەستێ چەكدارێن تیرۆرستێن داعش دا،بەلێ ب مخابنی ڤە شنگال بوویە گۆرەپانە بۆ چەندین گرۆپ و ئالیێن چەكدار و بووینە ئەگەرێ تێكدان و نە ئارامیا دەڤەرێ و خەلكێ مە یێ ئێزدی یێ كو تووشی مەزنترین جینۆساید بووی ل چەرخێ بیست وئێكێ و جیێ داخێ یە كو هەبوونا وان گرۆپ و ئالیێن هەنێ بووینە بەهانە وهێجەت ژبۆ دەستێوەردانا هەڤركی و ململانێ دناڤبەرا هندەك وەلاتێن هەرێمایەتی.
وەك ل ڤێ داویێ هەردوو وەلاتێن ئیران و توركیا ئێكدو تومەتباركرن لسەر بنپێكرنا سەروەریا ئاخا عێراقێ ، كو ژ سەدەما ڤێ چەندێ گرفتەكا دبلوماسی پەیداكریە دناڤبەرا ئیرانێ و توركیا دا، گرفتا ڤێ داویێ سەرهلدایی پشتی داخویانیێن بالیۆزێ ئیرانێ ل بەغدا رەخنەیێن تووند ل ئۆپەراسیۆنا لەشكەرێ توركی دگرت،و بەرسڤا بالیۆزێ توركیا ل بەغدا تووندتر بوو ، سەرەرای هەردوو وەلاتان كارینە وان ناكۆكیێن دناڤبەرا وان دا هەین زوو چارەسەر كەن و راكەن ،بەلێ ئەڤ چەندە نائێتە ڤەشارتن كو قەبارێ ئاریشە و ناكۆكیان دناڤبەرا هەردوو وەلاتان دا دراستەقینە و كوورن ل دەمێ هەردوو وەلات ل هیڤیا وێ چەندێ نە گەلەك رێككەفتنا دناڤبەرا خۆدا ئێمزا بكن، و لسەر گەلەك بادەكێن گرنگ و زیندی ژ وانا پێگهۆركا بازرگانی و ژێدەرێن وزێ و خوورتكرنا پەیوەندیێن دووقولی و خۆ دووركرن ژ پێكدادانێ ل سووریا و چەند بادەكێن دی، شنگال بوویە خالا ناكۆكیێ دناڤبەرا ئیرانێ و توركیا دا ، ب دوو سەدەمێن جێواز ، كو ئیران دەڤەرێ بكاردئینت بۆ دەربازبوون وهاتن وچوونا چەكدارێن میلیشیاتێن سەرب وان ڤە دناڤبەرا عێراقێ و سووریا دا ، و توركیا ژی ب هێجەتا نەهێلان و ژناڤبرنا چەكدارێن پارتا كرێكارێن كوردستانێ (پەكەكێ) و گرۆپێن سەرب وانڤە، كو توركیا دبێژیت ئەو گەف وهەرەشەنە لسەر ئاسایشا نەتەوەیا توركیا ، و هەبوونا ئیرانێ ل دەڤەرێ بەشەكی گرنگە ژ ئیستراتیژییەتا وێ یا مەزن ژبۆ بدەستڤەئینانا عێراقێ و بەرفرەهكرنا ئیمبراتۆریەتا وێ یا لەشكەری و هەژموونا وێ ل رۆژهەلاتا عەرەبی و خوورتكرنا وێ ل سووریا ولوبنانێ.
تشتێ سەرەنج راكێش و جیێ گۆمان و سەرسۆرمانێ ! ئەوە كو دناڤ ڤێ هەڤكێشێ دا بتنێ مللەتێ ئێزدی زەرمەند و قووربانیێ ڤان ناكۆكی و هەڤركیێن مەزنە ل شنگال، ب مخابنی ڤە مللەتێ مە یێ بێ دەستهەلات و هەژار و ستەملێكری بوویە قوربانیا یاریەكا مەزن یا چەند وەلاتێن هەرێمایەتی و زلهێز و خودێ نەكەت ئەگەر شەرەك دن ل شنگال رووبدەت دێ هەمان تراژیدی و مالوێرانی دووبارە بت لسەر ئێزدیان ، هێشتا برینێن ئێزدیا سارێژ نەبووینە، ژ ئەنجامێ وێ هێرشا هۆڤانەیا درەندەیێن داعش ئینایە سەر ئێزدیان ل شنگال،كو ئەڤە چەندین جارە توركیا گەف هەرەشا دكت ژبۆ ئەنجامدانا ئۆپەراسیۆنەكا لەشكەری ل چیایێ شنگالێ ب هێجەتا سزادانا وان گرۆپێن چەكدارێن ل شنگالێ یێن سەرب پەكەكێ ڤە،و ب مخابنی دەولەتا عێراقێ ژی ب رۆلێ خۆ رانابت كو دەڤەرا شنگالێ بەشەكە ژ سەروەریا ئاخا عێراقا فیدرال ئەو ژی ژبەر دوو سەدەمێن سەرەكی نە:یا ئێكێ عێراق نۆكە نە ل وی ئاستی یە بەرگریێ ژ سەروەریا خۆ بكت و یا دن عێراق ب تەمامی كەتیە لبن هەژموونا ئیرانێ ئەو ژی ب رێیا گرۆپێن حەشدا شەعبی،ل ڤێدەرێ دڤێت جڤاكێ نێڤ دەولەتی ب رۆلێ خۆ رابت و نەهێلت دووبارە ئێزدی تووشی فەرمان و جینۆسایدێ بن.
تُتاح هذه الصورة أيضا في: کوردی