ئەگەرێن نەخۆشیێن دەروونی
عزەت برۆ
مرۆڤ تووشی نەخۆشیێن دەروونی دبت كا چاوا تووشی نەخۆشیێن لەشی دبت، هەروەسا چەندین جۆرێن نەخۆشیێن دەروونی هەنە و هەر نەخۆشیەكێ نیشان و چارەسەریێن خۆ یێن تایبەت هەنە، د ژیانا ڤی سەردەمی دا گرنگیەكا بەرچاڤ هەیە،چنكو ژیان گەلەك ئالۆز بوویە داخوازیێن ژیانێ زێدە بووینە هەروەسا هەبونا شەرا و نە ئارامیێ و بێكاریێ لەوما ژمارەكە زۆر یا خەلكێ پێ دنالینت ،هندەك سەرژمێری بەحس دكن نێزیكی(10 %) خەلكێ كێشە و گرفتێن دەروونی هەنە ، بێگۆمان هەموو نەخۆشیا ئێك ئەگەر نینە و هەروەسا ئێك تیور نكارت شلۆڤەكرنا هەموو نەخۆشیێن دەروونی بكت،ژبەر هندێ بەحسێ بتر ژ ئەگەران دئێتە كرن ،بەلێ ب شێوەكی گشتی ئەم دكارن ئەگەرێن نەخۆشیێن دروونی ب چەند خالان بەرچاڤ بكن ژوانا ژی:
1-ئەگەرێن نافخۆی وەك بۆ ماوە رۆلەكێ بەرچاڤ هەیە د هندەك نەخۆشیێن دەروونی دا بۆ نموونە نەخۆشیا شیزۆفرینیا رێژا (1%) یە بەلێ د جڤاكەكی بۆ جڤاكەكی دی جیاوازی هەیە ، ئەگەر دەیك یان باب ئەڤ نەخۆشیە هەبت رێژا وێ دێ بتە (10%) بۆ زارۆكیێن وان ئەگەر هەردوكا هەبت ئەڤ رێژە دێ بلند بت بۆ (30%)،هەروەسا ئاستێ مێشكی دمێشكێ مرۆڤ دا گەلەك وەرگر هەنە و هەر ئێكی فەرمانێن خۆ یێن تایبەت هەنە و كارتێكرنا ئاشكەرا هەیە لسەر دەركەفتنا هندەك نیشان و نەخۆشیا،بۆ نموونە زۆربوونا ژمارە و چالاكی و وەرگرتنا هورموناتێ دۆپامین و سیرۆتین رۆلێ بەرچاڤ هەیە د نەخۆشیا شیزوفرینیا دا ئەگەر ئەڤ هورموناتە كێم بوون دێ بتە ئەگەرێن خەمۆكیێ،هەروەسا كەسایەتیا مرۆڤ هەر ئێكی ژ مە خودان كەسایەتیەكا تایبەتە بتریا خەلكێ خودان كەسایەتیەكا نۆرمالە و نێزیكی (15%) خەلك خودان كەسایەتیا نە ئاسایی یە ئەو كەسێن باوەری بخۆ نەی هەردەم دوو دل و شەپرزە بتر تووشی نەخۆشیێن دەروونی دبن ژ كەسێ نۆرمال،چنكو ئەڤ جۆرە مرۆڤە بەرهەڤی هەیە بۆ تووشبونا نەخۆشیا و هەروەسا شیانێ چارەسەكرنا ئاریشێن خۆ نینن،بەلێ كەسێن خودان كەسایەتیا بهێز شیانێ خۆ گونجاندنێ هەنە دگەل هەموو كاودانا و بزاڤا چارەسەركرنا ئاریشێن خۆ هەنە خودان ئارمانجن دژیانێ دا ئەڤ چەندە ژی دبتە پالدەر بۆ بتر گرنگیدان ب ژیانا خۆ.
2-هەروەسا ئەگەرێن جڤاكی و ئابووری وەكو ژ دەستدانا ئێك ژ ئەندامێن خێزانێ یان كەسەكی خۆشتڤی یان جودابوون یان ئەنجامدانا كارەكی نەی رەوا یان ژ دەستدانا سەروەت و سامانێ خۆ یان دەركەفتن ژ كاری ، هەروەسا خساربوون د كاردا تایبەتی دەمێ كەسەك ئاستێ وی یێ ئابووری باش بت پشتی هنگێ هەژار ببت ، هەروەسا كوسبا دەروونی دەمێ مرۆڤ تووشی روودانەكا دەروونی دبت ب هەر رەنگەكی بت ب دیتن یان بهیستن و دیمەنێن ترسناك یان مرۆڤ بێتە ناچاركرن بەشداربت دكارەكی دا یان دەست درێژی و توندوتیژیا لەشی و سێكسی لسەر بێتە كرن دێ تووشی نەخۆشیێن دەروونی بت ، هەروەسا كۆچكرن ئەو ڤەكۆلێنێن هاتینە ئەنجامدان لسەر وان كەسێن كۆچكرین هۆسا دیاركرینە رێژا نەخۆشیێن دەروونی ل نك وان بترە ژ كەسێن دی،كۆچكرن دبتە ئەگەرەكی رێكخۆشكەر بۆ دیاربوونا وان نەخۆشیێن مرۆڤ بەرهەڤی بۆ هەی ئەڤ چەندە ژی دزڤرت بۆ جوداهیا دناڤبەرا هەردوو وەلاتاندا ژ ئالیێ جڤاكی و رەوشەنبیری و كەلتۆر و زمان و ئاینی.
چاوا خۆ ژ نەخۆشیێن دەروونی بپارێزن:دڤێت مرۆڤی ئاگەه ژ شێوازێ ژیانا خۆ هەبت بالانسەكێ چێكەت دناڤبەرا لایەنێ لەشی و دەروونی نڤستن و خوارن و وەرزشێ دا،هەروەسا دروستكرنا پەیوەندیێن جڤاكی یێن باش دیسان مرۆڤی شیانێن چارەسەركرنا ئاریشێن خۆ هەبت و مرۆڤ خودان ئارمانج بت و كار بۆ بكت،دیسان مرۆڤ خۆ بگونجینت دگەل گهۆرینا تەكنەلۆژیایێ هەروەسا ژ دەمەكی بۆ دەمەكێ دی مرۆڤ سەیری ژیانا خۆ بكت و خۆ شلۆڤە بكت بۆ باشتركرنا ژیانا خۆ.
تُتاح هذه الصورة أيضا في: کوردی