كارتێكرنا كۆرۆنایێ لسەر دەروونێ مرۆڤی
عزەت برۆ
ڤایرۆسێ كۆرۆنا(covid19) نەخۆشیەكا ڤایرۆسی یە كو ئەندامێ هەناسێ دگرت و هاتیە دەستنیشانكرن ژئالیێ رێكخراوا تەندروستیا جیهانی ڤە،كو ئەڤ جۆرە ڤایرۆسە پەتایەكا جیهانی یە ، و ڤی ڤایرۆسی كاریگەریەكا جێواز لسەر هەر نەخۆشەكی هەیە.
بێگۆمان تەندروستی و ئارامیا مرۆڤی نەبتنێ ژ ئالیێ لەشی ڤە بەلكو هەستكرنا كەسی ب بەختەوەری و ئارامی و دڤێت پەیوەندیەكا ب هێز دناڤبەرا لایەنێ لەشی و دەروونی و جڤاكی دا هەبت،هەروەسا دڤێت مرۆڤی شارەزایی هەبت و بزانت چاوا خۆ د گەل هەموو كاودانێت دژوار دا بگونجینت و تەندروستیا دەروونی بدەستخۆڤەبینت،چنكو دەروونێ مرۆڤی وەكە لەشێ مرۆڤی تووشی نەخۆشیا دبت و هەروەسا نەخۆشی و پەستانێن دەروونی كارتێكرنێ لسەر لەشێ مرۆڤی دكن و دبتە ئەگەرێ هندێ مرۆڤ تووشی نەخۆشیێن لەشی ببت،لەوما فەرە ئەم ب رێیێن گونجای خۆ بپارێزن ژ ڤی ڤایرۆسی و نابت ئەم بهێلن ببتە گەف و ترسەكا مەزن لسەر دەروونێ مە و سەرەدەریەكا نۆرمال وەكو هەر ئێشەكا دی دگەل بكن،داكو ئەم بتر دەروونێ خۆ بپارێزن ژبەركو ئەگەر ترسەكە مەزن چێبوو دێ بەرگریا لەشێ مە كێم بت و ڤایرۆسێ كۆرۆنا و هەر نەخۆشیەكا دی دێ بتر كارتێكرنێ لسەر تەندرۆستیا لەشێ مە كەت.
ئاسایی یە ئەگەر هەست ب ترس و خەم و دوو دلیێ بكەی د دەمێ تەنگاڤیا دە بەلێ یا گرنگ ئەوە ئارامیا دەروونێ خۆ بپارێزی و ڤان خالان پەیرەو بكەی: هەول بدە ژیانا تە یە تەندروست بت وەك خوارنێت تەندروست و نڤستنا باش و وەرزش و پەیوەندیێ دگەل كەسوكارێن خۆ بكەی یێ كو توو حەژێ بكەی،هەردیسان خۆ دوور بكە ژ جگارەكێشان و ماددێن كحولی،هەردیسان ئەگەر تە گەلەك هەست ب ماندیبوونێ كر سەرا بنگەهێ تەندرۆستی بكە یان نۆژدارێن دەروونی ،دیسان خووندنا نووچەیان كێم بكە ئەوێن دبنە ئەگەرێن دوودلیێ بۆ تە،بتنێ رێنمایێن ساخلەمیێ ژلایەنێن باوەرپێكری وەربگرە و هەول بدە خۆ دووربێخی ژ گۆتگۆتك و ئاخفتنێن نە راست.
بەردەوام پشتەڤانیا زارۆكێن خۆ بكە و گوهداریا ترس و نە ئارامیا وان بكە و بتر حەژێكرن و گرنگیێ بدێ،هەروەسا پێزانینێن درووست لسەر ڤی بارودۆخی بدە زارۆكێن خۆ و رۆن بكە كانێ چیە رووددەت، و پێزانینێن درووست بدێ لسەر خۆپاراستنێ ژ ڤایرۆسێ كۆرۆنایێ ب مەرجەكی بگونجت دگەل تێگەهشتنا وان و لدووڤ تەمەنێ وان.
تُتاح هذه الصورة أيضا في: کوردی