پێتڤیا ئێزدیان ب دبلوماسیەتێ هەیە نە ب شەری!
مەروان داود
هەر جیەكێ جەسەدێ تاكێ ئێزدی، دەستێ مرۆڤی بگەهتێ یێ بریندارە و خوون ژ هەموو دهەرەكێ، دناڤ ئەڤێ قەرەبالەغا د نهۆ دا هەی و د نهۆ دا هەموو عێراق ب گشتی د رەوشەكا سیاسی و ئابووری یا نالەبار دا دەرباز دبت و تژییە ژ كێشە و ئاریشێن جودا جودا و هەبوونا دەستێن لایەنێن دەرەكی ژی لسەر عێراقێ،ئەڤ رەوشە بتر ئالۆز كریە.
دناڤ ئەڤێ هەموو رەوشێ ژی دا، ئێزدی ژی وەكو هەموو پێكهاتێن عێراقێ و كوردستانێ بووینە قوربانی و بۆ ماوەیێ شەش سالان قوربانیێن هەرە مەزنن و ژ گەلەك ئالیان ڤە ئێزدی قوربانی نە و ب تایبەتی ژی،ئەو ناكۆكیێن لسەر دەڤەرێن وان هەین،لێ د نهۆ دا و دڤێ رەوشا ئالۆز دا، ئێزدی ب خۆ دناڤ خۆدا هێدی هێدی دبنە پارچە و ئەڤە ژی مەترسیەكا مەزنە لسەر پاشەرۆژا تاكێ ئێزدی و تفاق و ئێكگرتنا ئێزدیان دروست دكت،باشترین رێك ژبۆ بهێز خستنا ئێزدیان و ئاڤەدانكرنا دەڤەرێن وان،هەر وەك سەبقەیەكا قەولێن ئێزدیان كەرم دكت و دبێژت:
ئەز چوومە دیوانا وی پەدشایی
لێ هەبوو خوەشی و شایی
سەرێ هەموو سەرا تفاق و تەبایی
مرۆڤ كارێ ب تفاقێ چیایێ بدانە سەر چیایی ئانكو ب تنێ ئێكگرتن و ئێكرێزیا ئێزدیان دێ كێشا و ئاریشێن ناڤخویی یێن دناڤ ئێزدیان ب خۆ دا و یێن هەرێمی و دەرەكی ژی چارەسەركت،دڤان روودانێن داویێ دا گەلەك وەسا دبینن هەبوونا هێزەكا سەربازیی ژبۆ ئێزدیان باشترین چارەسەریی یە،لێ هەبوونا هێزەكا سەربازی چێدبت هندەك كێشەیان چارەسەر بكت،بەس رەنگە هندەك كێشەیێن مەزنتر ڤەكەت و پەنا برنا ئێزدیان بۆ هەبوونا هێزەكا سەربازی یا سەربەخۆ دێ مەترسیێن خۆ ژی هەبن، ب تایبەت ژی ل شنگال، ژبەر نهۆ عێراق وەسا لێهاتییە هەر ئێكی پێنج سەد كەس هەبن، دكارت خۆ بكەتە خودان حزب و هێز،ئەگەر هات و ئەڤ هێزێن جودا جودا زێدەبوون وی دەمی دێ بتە مەترسی لسەر ئێزدیان و پەنا برن بۆ شەری ژبەر دنهۆ دا نە ئێزدیان هێزەكا مەزن هەیە ژ روویێ سەربازی ڤە و نە ژ روویێ پێتڤیێن شەری ڤە،لەورا یا هەرە باش ژبۆ بەرژەوەندیا ئێزدیان ئەوە ئەو كەسێن نوونەراتیا ئێزدیان دكن ل چ جیێن دنیایێ بن كێش و ڤەكێشێن ئێزدیان ب دیالۆك و رێیێن دبلوماسی چارەسەر بكن،بێ كو پەنایێ ببتە بەر هێزێن لەشكەری یێن سەربەخۆ و شەری.
ل شوونا هەبوونا هێزەكا سەربەخۆ یا ئێزدیان،بلا ئەو هێزێن ل دەڤەرێن ئێزدیان هەین سەر ب هەردوو حكومەتێن عێراقێ و هەرێما كوردستانێ ڤەبن،هەموو فەرماندار و لەشكەر ئێزدی بن،داكو ئێزدی ب خۆ ژی هەست ب كێماسیێ نەكن و برینێن جەسەدێ خۆ بكوینن.
تُتاح هذه الصورة أيضا في: کوردی