كارتێكرنا شەران ئەگەرێ سەرەكی یێ هەژاریێ یە!!
چنار شمو قاسم
هەژاری ئاریشەكا كەڤنە،هەبوونا وێ دگەل هەبوونا جڤاكێن مرۆڤایەتی یە ، هەژاری دیاردەكە دناڤ هندەك تەخێن مللەتی یان دناڤ هندەك مللەتان دا سەرهلدەت رامان ژێ ئەوە دەما داهاتێ مرۆڤی یێ هەیڤانە تێرا پێتڤیێـن مرۆڤی یێ رۆژانە نەكت.
ئەگەرێن هەژاریێ ئەون بۆ نموونە ئەگەرێن كەسۆكی ئەو ئەگەرن ئەوێن ب مرۆڤی ڤە گرێدایی دەمێ ئێشێن گران خودانێ مالێ دگرت یان ئەندامەكێ خێزانێ دبتە ئەگەرێ پەیدابوونا هەژاریێ،ژبەركو نكارت چ كاران بكت و پێتڤی ب گەلەك دراڤی هەیە بۆ چارەسەریا خۆ هەروەسا دەمێ كەسەك ئالودەی ڤەخوارنا مەی و قۆپیایێ دبتە ئەگەرێ كارتێكرنەكا خراب لسەر خێزانێ ژ ئالیێ ئابووری ڤە،دیسان ئەگەرێن دەرەكی بۆ نموونە دەمێ وەلات و جڤاك تووشی مەترسیا شەران دبت و دكەڤنە دناڤ شەران دا ل وی دەمی حكوومەت دێ داهاتەكێ زۆر بۆ بەرۆكێن شەری مەزێخت ژبۆ پاراستنا سنوورێن ئاخا خۆ و ل وی دەمی پرۆژێن ئابووری یێن وەلاتی دێ ئێنە راوەستاندن و خەلك دێ تووشی بێكاریێ و هەژاریێ بت،ژلایەكێ دی ڤە روودانێن سروشتی وەك ئاڤ رابوون و ئەردهەژ و هشكەسالی یان پەیدابوونا ئێشێن گران كارتێكرنەكا مەزن لسەر داهاتێ وەلاتان هەیە و دبتە ئەگەرێ هەژاریێ.
هەژاری مەترسیە لسەر خێزانێ ژ گەلەك لایان ڤە لسەر پێكهاتنا وێ و بەردەوامیا ئێكگرتنا وێ هەروەسا ئاستەنگەكە مەزنە هەمبەر گەنجان كو ببنە خودان هەڤژین،هەروەسا گەلەك جارا دبتە ئەگەرێ ژێكڤەبوونا خێزانێ و پەیدابوونا كەرب و كینێ دناڤبەرا وان دا،هەردیسان مەترسیە لسەر ئێمناهیا جڤاكی چنكو ل دەمێ دەلیڤێن كاری نەبن یان د كێم بن دێ بتە ئەگەرێن پەیدابوونا چەندەها ئاریشان،چارەسەریا هەژاریێ زێدەكرنا دەلیڤەیێن كاری و ڤەكرنا كارگەهانە،ژبەركو ئەگەر كار زێدە بوو داهاتێ تاكەكەسی دێ زێدە بت و رێژا هەژاریێ دێ كێم بت،دیسان مووچێ خەلكێ گونجایی بت دگەل نرخێ بازاری ئانكو هەڤسەنگی دناڤبەرا مووچەی و بازاری دا هەبت،هەروەسا دڤێت دەولەتێ پلانەكا ئابووری یا باش هەبت داكو دگەل سیاسەتا ڤی سەردەمی ب رێڤە بچت ژبۆ دابینكرنا ژیانەكا باش بۆ وەلاتیێن خۆ، هەروەسا چاڤدێریەكا تایبەت یان موچەیەكێ هەیڤانە بۆ كەسێن خودان پێتڤیێن تایبەت و دانعەمر هەبت.
پێدڤیە كار ب دەرچۆیێن پەیمانگەه و زانكۆیان بێتەدان لدووڤ وێ پشكا تێدا تایبەتمەند و گرنگی ب وان بێتەدان،هەردیسان پێتڤیە كار ب دەرچۆیێن ل پرۆگرامێ خووندنێ دا ل پەیمانگەه و زانكۆیان گرنگی بێتە دان ب پیشەیێن خووندكاران لسەر پەیداكرنا كارەكی گرێدایی وێ پشكا ژێ دەرچۆیی ڤە بت.
تُتاح هذه الصورة أيضا في: کوردی