دیاردەیا كوشتنا ئافرەتێ
دلڤین خەلەف
وەكو یە دیار دڤی سەردەمێ پێشكەفتی دا خەلكێ كوردستانێ ب گشتی بەرەف قۆناغەكا نوو یا ب رێڤەبرنا ژیانێ ب رێكەفتیە و گەهشتیە باوەریەكا مەزن،كو بتنێ ب زانین و زانست و ئاڤاكرنا كەسایەتیەكا سەركەفتی و هزروبیرێن پاقژ ئەڤ كاروانە وەكو هەموو گەلێن پێشكەفتی دگەهنە ماف و ئارمانجێن خۆ یێن سەرەكی و پێش هەر تشتەكی دڤێت خۆ وەكو مرۆڤەكێ ژیرمەند بدەتە دیاركرن.
بێگۆمان هەر مللەتەكی دابونەریت و كەلەپۆرێ خۆ یێ تایبەت هەیە و دناڤدا باشی و خرابی هەنە لێ دیسان ژی شانازیەكا مەزن پێدبەن و دگەل بهۆرینا دەم و چاخان هندەك ژوان دابونەریتا دئێتە ژبیركرن و هندەكێن دن ژێ وندا دبن و جڤاك ژی هندەكان ژێ پشتگوهـ ڤە دهێلت،ژبەركو دگەل سەردەمی ناگونجن و بەلكو زۆر جاران كێشە و ئاریشە ژێ پەیدا دبن، لەوما گەلێ كورد ژی سەرەرای ئەوێ زۆلم و زۆرداریا لێ هاتیە كرن ل سەر دەستێ داگیركەران د درێژاهیا دیرۆكێ دا پێگیری ب چاند و كەلتۆر و كەلەپۆرێ خۆ یێ كەڤنار و دێرین كریە و دگەل دا ژیایە و هەردەم شانازی پێ كریە و پێ سەربلند و كەیف خۆش بوویە،هەروەسا گەلەك ژ دابونەریتێن كەڤنار و نەشایستەی كۆمەلگەها كوردەواری ژی پاشخۆڤە هێلاینە و هزر د جڤاكەكێ مەدەنی و سەردەم دا كریە و ب هیڤیا گەهشتنا ئاستەكێ پێشكەفتی و بلند ژبۆ نفشێن پاشەرۆژێ كرینە،ب مخابنی ڤە بابەتێ كوشتنا كەچ و ژنان و ئێش وئازارێن وان ل ڤی سەردەمێ پێشكەفتی دا بوویە دیاردەیەكا مەترسیدار، ئافرەتا كورد ژی گەهشتیە وێ قۆناغێ ئیرۆ ئاستێ وێ یێ رەوشەنبیری و تێگەهشتنا وێ د بیاڤێ دابونەریتێن جڤاكی دا نەكێمترە ژ ئاستێ زەلامێ كورد و فەرە كۆمەلگەها مە ڤێ چەندێ ب هوری ل بەرچاڤ بگرێ و رۆلێ ئافرەتا كورد د هەموو بوارێن ژیانێ دا گرنگیێ ب بها و هزر د وەكهەڤیا دناڤبەرا ژن ومێران دا بكن و ئەڤێ دیاردا خراب ژناڤ جڤاكا كوردەواری یا مرۆڤ دۆست و ئاشتیخواز بنبر بكن و نەهێلن،ژڤێ چەندێ زێدەتر ئافرەتا كورد بێتە ئێشاندن و هەستێ وێ بێتە شكاندن و ژشیانێن وێ بێتە خوار و زیان پێ بكەڤت.
هیڤیدارین ژ دام ودەزگەهێن حكومەتا هەرێمێ ئەڤ بابەتە بێتە چارەسەركرن و سزایێن دژوار دەرهەقێ ئەوان كەسان بێتە وەرگرتن كو دبنە ئەگەرێ ڤێ دیاردەیا نەشارستانی و ب رژدی بزاڤێن وێ چەندێ بێنەكرن،ئافرەتا كورد ژی ببتە پشكەكا كاریگەر ژ ژیانا گەلێ مە و هەموو دەمان ژیانا وێ بێتە پاراستن ل ژێر سیبەرا یاسایی و چاڤدێریا حكومەتێ د وەلاتێ مەدا، و سەروەری بۆ ئافرەتا كورد ل هەر جیەكی و كوردستان هەر ئارام و ئاڤەدان بت.
تُتاح هذه الصورة أيضا في: کوردی