ژ بیرهوهریێن مه (پشكا سێیێ)
جههوهر ههكارى:
دووشهڤا ئهم ل گوندێ بایێ ماین و رۆژا دى پشتى نیڤرۆ موختارى برایێ خۆ عزالدین و ئێكى دى وهكو رێبهر دانه دگهل مه و ئهم چۆین و ئێدى چهند د ژۆردانیێ چۆین و بهفر كێمبوو،ههتا ئهم گههشتینه رۆبارهكى و ههتا بوویه رۆژ ئهم ل ناڤ هندهك داران دا رونشتین و ئاڤا ل وێ دهڤهرێ ل سهرێ كوپێ چیایهكى ئاڤاهیهك دیار بوو،كاك عزالدین گۆت ئهو دێرا هینێ یه.
ئهم چۆینه سهر جادهیهكا تێكهلكرى دوو تهكسى هاتن و جودا جودا مه داخواز ژ ههر ئێك ژ وان كر مه بگههیننه بنیا گوندێ سورانسهرى بهلێ رازى نهبوون و ئهم چۆین ههتا ژ گوندهكى دهرباز بووین تهكسیهكا دى هات مه داخواز ژێ كر مه بگههینته بنیا گوندێ سۆرانسهرى ئهوى گۆت دێ چم نهفهرێن خۆ دانم و دێ ئێمه وه پشتى بۆرینا دهمهكى ئهو هات ئهز و محهمهد و عهبدالله و دگهل رێبهرێ مه ئهم سوار بووین و گههاندینه جادا دناڤبهرا گهڤهر و شهمزینان دا،گۆته مه ههرنه ناڤ تهراشێن ههنێ داكو بچمه ههڤالێن وه ژى بینم و چۆ ههڤالێن مه ژى ئینان و مه زۆر ههول دا ئهم كریا وى بدهینێ،بهلێ ئهوى گۆت ما ئهز نهكوردم دێ چاوا كرێ ژ وه وهرگرم و ئهو خهلكێ گوندێ مچیچێ بوو ل نێزیك گهڤهرێ.
ل دهرهنگى شهڤێ ئهم گههشتینه گوندێ سۆرانسهرى و رێبهرێن مه ئهم برینه مالهكێ وان ناسدكر و گۆته وان سبهیكێ رێبهرهكى بدهنه دگهل وان داكو رێبهرییا وان بكن و سبێ مه تێشت خوار و خاترا خۆ ژ كاك عزالدین و ههڤالێن وى خواست و ل گهل رێبهرى ئهم ب رێكهفتین دیسا بهفرێ لێكر و ئێڤارى ئهم گههشتینه گوندێ سهرهرو ئهز و محهمهد و عبدالله چۆینه مالهكێ بهفرهكا زۆر لێ ههبوو،سبێ داوهتهك ل گوندى ههبوو بوو نیڤرۆ هندهك خۆرت هاتن و ب زۆرى ئهم برینه ناڤ داوهتێ و خوارنا فراڤینێ، و شهڤهكا دى ژى ئهم ماین و رۆژا دى سبێ رێبهرهك دانه دگهل مه و ئهم چۆین بهرهف گوندێ زێوكێ بتنێ دوو یان سێ مال لێ بوون و بهفرهكا زۆر ههبوو،و ریسیێن گیایێ ل سهر بهفرێ د دانه پهزى،لنگێ من كهفته سهر داڤهكا گیایى و ئهز لێك زڤریم و كهفتم و لنگێ من زۆر ئێشا بهلێ ئهز رابووم و چۆینه مالهكێ مه فراڤین خوار و وان رێبهرهك دانه دگهل مه و ئهم ب سهر چیایهكێ نهبلند كهفتین و رێبهرى گۆته مه ڤێ دۆلێ بهرنهدهن ههتا دگههنه پشتا گوندى، ئێڤارى گیایى ددهنه پهزى و دگهل پهزى ههرنه گوندى،چنكو قهرهقۆلهك ل بنیا گوندى ههیه و رێبهر زڤرى و ل رۆژئاڤایێ ئهم گههشتینه پهزى و ئهم چۆینه دناڤ گوندێ ههلانه دا.
س.س
تُتاح هذه الصورة أيضا في: کوردی