ب ئامادەبوونا بەرپرسێن کارگێڕی؛ دەست ب چاندنا داران ل مەزارگەهێ شێخ عەنزەروت هاتە کرن

تۆرا لالش

ب مەبەستا زێدەکرنا رێژەیا کەسکاتیێ و خزمەتکرنا جهێن ئۆلی، ب ئامادەبوونا سعود مستۆ، ڕێڤەبەرێ گشتی یێ کارووبارێن ئێزدییان، و جەعفەر سمۆ، ئه‌ندامێ ده‌سته‌كا بلندا بنگه‌هێ لالش و ڕێڤەبەرێ کارووبارێن ئێزدیان ل دهۆکێ، كه‌سایه‌تیێن ده‌ڤه‌رێ ب هەماهەنگی دگەل ڕێڤەبەرییا دارستان و پاوانان ل دهۆکێ، پڕۆژەیێ چاندنا داران ل دەوربەری مەزارگەهێ “شێخ عەنزەروت” ل گوندێ خەرشەنیا کەڤن ل کۆمەلگەها شاریا دەستپێکر.

ئەڤ پڕۆژەیە ب پشکداریا کارا یا گەنجێن گوندێن (خەرشەنیا، رکاڤایێ، گرێپانێ و کەبەرتویێ) هاتە ئەنجامدان.

هەرمان مدور، گەنجەکێ گوندێ ناڤبری یه‌، بۆ تۆرا لالـش دیار کر کو وان وەک گەنج دەسپێشخەری کریە و نێزیکی ٣٠٠ دار چاندینە، هەروەسا حکومەتێ ژی پشته‌ڤانی لێ کریە و ٢٠٠ دارێن دی بۆ دابین کرینە.

دیار مەردان، گەنجەکێ دی یێ گوندییە، تەکەزی ل سەر وێ چەندێ کر کو د ئایینێ ئێزدیان دا پاراستنا ژینگەهێ ئەرکە، لەورا گەنجان ب ئەرکێ خۆ زانی کۆم ببن بۆ کەسککرنا مەزارگەهی. تێ زانین لایەنێ خزمەتگوزاری یێ مەزارگەهی ژی بەردەوام ل ژێر چاڤدێریا مجێورێ گوندێ خەرشەنیا دایە.

 نادر شوکری، موختارێ گوندێ خەرشەنیا، وێڕای دەستخۆشیێ ل لایەنێن حکومی و حزبی و گەنجان، ئاماژە ب کێشەیا نەبوونا ئاڤێ کر و داخواز ژ حکومەتێ کر بیرەکا ئاڤێ ل وی جهی بهێتە کۆلان دا کو دار هشک نه‌بن و سەردانکار ژی مفای ژێ ببینن.

بەلێنا ڕێڤەبەریا دارستانان.. کاوە سەبری، ڕێڤەبەرێ دارستان و پاوانان ل پارێزگەها دهۆکێ، بۆ  تۆرا لالش ڕاگەهاند کو ئەو دێ کار کەن بۆ کەسککرنا وی مەزارگەهی و دابینکرنا ئاڤێ، و دێ بەردەوام بن ل سەر چاندنا داران ل هەر جهەکێ پێدڤی بت.