دەیك و باب حەز دكن كچێن وان شوو ب كەسێن نێزیكی وان بكن
راپۆرت:خێرهات بێدرڤان
ل سەردەمێ بەرێ دجڤاكێ ئێزدیان دا شووكرنا كچێ ددەستێ خێزانا وێ دابوو كو بۆكەسەكی نێزیكی دەیكێ یان بابێ بوو،ل هەمبەر ژی نۆكە گهۆرین دجڤاكی دا چێبوینە و پتریا گەنجان یێ لدووڤ ئەڤینیێ خێزانێ پێك دئینن و كچ ئازادبوویە كو شوو ب مرۆڤەكی خۆ یان ئێكی بیانی بكەتن بێ كارێگەری لێ بێتە كرن ژلایێ دەیك و بابان ڤە.
هەدیە حسێن وەك دەیكەك ل دۆر ڤێ چەندێ دبێژت:گەلەك جاران كچ دتەمەنێ سنێلەیێ دایە و ب گۆتنێن گەنجەكی دێ ئێتە سەردابرن و مەرەما دەیك و بابا ئەوە كو كچێ بدەنە كەسەكی نێزیكی خۆ دا ژ وی گەنجی دوور بكن،لەوما دێ دەنە كەسەكی نێزیكی خۆ لێ بەروڤاژی ڤێ چەندێ نابت دهەلبژارتنا هەڤژینیێ دا دەیك و باب ببنە رێگر،بەلێ یا گرنگ ئەوە كچ بچتە قوتابخانێ دا بكارت پاشەرۆژەكا سەركەفتی پێك بینت.
ژلایەكی دیڤە شڤان حەسەن وەك گەنجەك خویاكر،ژبەر حەژێكرنا دەیك وبابا بۆ كچێ نەڤێت دووری وان بكەڤتن و ئەڤە ئەگەرەكی سەرەكی یە دەیك و باب بریارێ ل سەر ددەن،بەلێ گەلەك جاران ئەڤ چەندە دبنە ئاریشێن مەزن دناڤبەرا مرۆڤان دا رەنگە ل وێ چەندێ دا ئەڤ مرۆڤینیا موكوم بەر ب خرابوونێ ڤە بچت،لەوما یا فەرە كچ هەڤژینێ خۆ هەلبژێرت چنكو ژن ژیانە.
نازێ رێسان كچەكە دبێژت:دەیك و باب هزر دكن ئەگەر زارۆكێن وان بۆ كەسێن نێزیكی وان بن دێ پتر چاڤێ وان لێ بت ژ كەسەكی بیانی و دێ پتر رێزێ لێ گرن و ب دیتنا من گەلەك جاران شووكرنا كچێ بۆ كەسێن نێزیكی وێ باشترە ژ كەسێن بیانی و ڤی بابەتی باشی و نەباشی ژی هەینە.
هەروەسا ئەسلان وەك بابەك دیاركر،ب دیتنا من گەلەك باشە دەیك وباب زارۆكێن خۆ بدەنە كەسێن نێزیكی خۆ،بەلێ یا گرنگ ئەوە كچ و كور ب دلێ ئێك و دووبن و مەرەما دەیك و بابا ژ دانا كچ و كورا و مرۆڤێن ئێك بن موكومكرن و زێدەكرنا مرۆڤایەتیێ یە،لێ ل سەردەمێن بۆری دا ئەڤ تشتە هەبوو نهۆ بتریا گەنجان ب ئەڤینی خێزانێ پێك دئینن.
حەجی مغسۆ ڤەكۆلەرەكی جڤاكی یە دیاركر، ل سەردەمێن بۆری دا شووكرنا كچێ ددەستێ خێزانا وێدا بوو كچێن خۆ نەدانە كەسێن بیانی،بەلكو ددانە كەسەكی هۆزا خۆ لێ ب دیتنا من ئەڤ چەندە نەیا راستە،لەوما دڤێت كچ دبریارا هەڤژینیێ دا یا ئازاد بت ل ڤی سەردەمی ژی بارا پتر گەنج ب ئەڤینا پاقژ و پیرۆز خێزانێ ئاڤا دكن و خێزانا وان ب ڤی رەنگی یا بەختەوەر و شادە،لێ خێزانا بەختەوەر نەدتەمەنێ سنێلەیێ دایە،زێدەبارێ هندێ گەلەك جاران شووكرن دگەل كەسێ نێزیك باشترە وەكو مەزن دبێژن ((دەرگەهێ باش بلا لبەر دەرێ مرۆڤ بت باشترە)).
تُتاح هذه الصورة أيضا في: کوردی