ئەز كچەك ئاوارەمە
كۆڤان خانكی
ئەز گەلەك عێجز دبم تە دڤی حالی دا دبینم “دەلالا دلێ منێ”، تو دبن ڤێ خیڤەتا تێرا زارۆكەكی نەكەت، دبن ڤێ خیڤەتا بێ ئاڤ و كارەب ڤە، دبن ڤێ خیڤەتا حەیوان ژی تێدا نەژین، لێ دیسا ژی كەیفا من ب تە دهێت تە سروشتی و بێ مكیاج و ب پرچەكا نە دارككری دبینم، تو یا بوویە تابلۆیەك هێژ نیگاركێشان هزر ل یێن وەك تە نەكریە، دوهی ئەز چۆبوومە بازاری، تو دزانی هەموو دەمان تو ل بیرا منی، لەورا ژی من بۆ تە دیاریەك وا كری، ها بگرە .. پیتەكا زێری یا ناڤێ تە و رستكەكا مۆركا یە.
كەیفا كچكێ گەلەك ب دیاریێ هات، نە ژبەر دیاریێ، بەلكو ژ بەر گرنگیپێدانا هەڤالێ وێ ب وێ، خوەست ئەو ژی تشتەكی وەك بیرهاتن بدەتێ، سەرێ خۆ چەماند و كەتە د خیڤەتا خوەڤە موقدارەكێ خوە مژولكر و هاتە دەرێ، لاپەرەكی دڕیایی و قورمچاندی دا دەستێ هەڤالێ خوە،وە دیاربوو ب لەز ژ دەفتەرەكێ ڤەكربووگۆتێ: ئەڤ ژی دیاریا منە ژ تە را، ل ڤێرێ ڤەنەكە، من دڤێت ل نك تە پاراستی بمینت تا رۆژا مرنێ، ل نك من باشترین وەفایە.
پشتی خاترێ خوە ژ هەڤ خوەستن، مورالا كوركی گەلەك خۆش بوو، فزول بۆ چێ بوو، پشت ب خیڤەتێ كر، ئەو پرتا لاپەری ڤەكر؛ژبلی نڤیسێ تشتەك تێدا نەدیت، نڤیسابوو: ببۆرە.. عەزیزێ من، دەلالێ دلێ من، من گەلەك ژ تە شەرم كر، من د ڤێ خیڤەتێ دا پێشوازی ل تەكر، من خەون ب هندێ ڤە د دیتن ئەم ل باغچەكی، ل بن دارەكێ، ل بەر لێڤا رۆبارەكی ب هەڤرە روونن و ئەز سەرێ خوە دەینمە سەر چۆكا تە و گوهداریا تە بكم،پاشی بلا من چی دی نەبایە.
هێڤیدارم پشتی ڤێ دیتنا د ڤی حالی دا ب چاڤەكێ كێم بەرێ خوە نەدەیە من كو من ژی تشتەك نەدایە تە، ئەز ژی رۆژەكێ پادیشاها مالا خوە بووم، نهۆ ئەز كچەك ئاوارەمە، من یەك دینار نینە تشتەكی بۆ تە بكرم، ئەڤە دەه رۆژن من سەرێ خوە نە شوشتی هەكە من تو بێ ماچ نە دزڤراندی، ئەز ئاخفتنا خوە درێژ ناكەم، چنكو كەلا گریێ یا دهێتە من و دێ گریم و دترسم پاشی تو بێژی یا تەمسیلێ دكەت، هوون كورك هندەك جاران ژ رۆندكێن مە باوەر ناكن، و ئەكید تو ژی یێ وی هەستی دكەی زوو هەری دا كەس تە نەبینت، ئەڤە دیاریا منە بۆ تە: “ب خودێ، ب هەموو پیرۆزیان، ئەز ژ روحێ خوە پتر حەز ژ تە دكەم، خوزی ل جهێ روحێ من تو د لەشێ من دا بایە”!.
تُتاح هذه الصورة أيضا في: کوردی