چار هاووڵاتیێن خەلكێ زاخۆ د دەریا ئیجەدا خەندقین
باسنيوز:
ژ ئەنجامێ وەرگەریانا بەلەمەكا پەنابەران ل دەریا ئیجەدا دناڤبەرا تۆركیا و یۆنانێ دا، ژنەك و دوو زارۆیێن خوە ل گەل زارۆیەكێ دی كو خەلكێ زاخۆ نە، خەندقین و هەتا نها تەرمێن وان نەهاتینە دیتن و ئەوێن ژ بەلەمێ ژی رزگاربووین، گەهشتینە یۆنان.
فازل تەیب سمۆ، باپیرێ ئێك ژ وان زارۆیێن خەندقی بۆ (باسنیۆز) دیار كر، ل رۆژا 4/4/2018، بەلەمەكێ پەنابەرێن كورد كو هەموو خەلكێ زاخۆ بوون ژ تۆركیا ب بەلەمێ دانە رێ بەرەڤ وەلاتێ یۆنان ڤە. ل گۆرەی زانیاریێن گەهشتینە مە ئەو بەلەمە د ناڤا دەریا ئیجە دا د وەرگەریت و تێدا ژنەك و دوو زارۆیێن خوە و ل گەل نەڤیێ من یێ چوار سالی كو هەموو خەلكێ زاخۆ نە تێدا خەندقینە.
ئاشكرا ژی كر (كامیران یوسف) خێزاندارەكێ خەلكێ زاخۆیە و گۆندیێ مەیە د ناڤا وێ بەلەمێ دابوون، ل دەمێ وەرگەریانا بەلەمێ، هەڤژینا كامیرانی (بەیان عەجیل 35 سال) و دوو زارۆیێن وی ب ناڤێ (شێروان 12 سال و ئادەم چوار هەیڤ) خەندقین، بەلێ كامیران و دوو زارۆیێن خوە یێن دی قورتال بووینە و نها گەهشتینە یۆنان. هەروەسا نەڤیێ من ژی یێ چوار سالی ب ناڤێ (ئەحمەد هاریوان فازل) د ژیێ چوار سالیێ دا خەندقیە كو ل گەل وان چوو بوو، چونكو ئەحمەد نەڤیێ منە و یێ بێ دایك و باب و بێ خودان بوو، لەوما ل گەل وان چوو بوو.
فازل تەیب ئاشكرا ژی كر، 25 كەس د وێ بەلەمێ دا بوون و چوار خەندقینە و 21 گەهشتینە گزیرتەكا یۆنانێ و پەیوەندی ب مەكریە و دبێژن ئەم ژی نزانین كا ئەم ل كیڤەینە و هەتا نها تەرمێن وان هەر چوار كەسێن خەندقین ژی نەهاتینە دیتن.
تُتاح هذه الصورة أيضا في: کوردی