ئافرەت و توندوتیژی
دلڤین خەلەف
بەرهنگاربوونا توندوتیژیێ ل دژی ئافرەتێ ئەرکەکی نەتەوەیی و نشتیمانی هەر تاکە کەسەکی کوردە ل هەر جیهەکی و بتایبەت ل ناڤ کۆمەلگەها کوردستانی دە ژبەر کو ئافرەتا کورد هەردەم ژبۆ دۆزا گەلێ خۆ خەمخۆر و وەفادار و پێشرەو بوویە وژبۆ پێشڤەبرنا ئاستێ رەوشەنبیریا کۆمەلایەتی مامۆستا و زانایەکا ژیر و ژێهاتی بوویە، هەر ل سەر ئاستێ ئاڤەدانکرنا جڤاکێ ژی ئافرەتا کورد رۆلەکی سەرەکی هەبوویە و هیچ جارەکێ خۆ ژ ئەرکێ جڤاکی یێ پێدڤی نەدایە پاش بەلکو ب بیروباوەریەکا مکوم سەرەدەری دگەل هەر پێنگاڤەکا بەرو چارەسەریا دەرد وژانێن خێزانی دناڤ مللەتێ خۆ دە کریە و بدڵ نەرمی و دوور ژ کەرب وکینێ پێشوازیا کێشە و ئاریشێن جڤاکا خۆ کریە و هەموو هەولێن دەرباسبونێ ژ قوناغێن زەحمەت لبەر خۆ داناینە هەتا کو ئارامی و ئێمناهیا ناڤ کۆمەلگەها خۆ پاراستیە،زۆر جاران ئافرەتا کورد ل سەر تشتەکی بێ گونەهـ هاتیە سزادان و کەفتیە بەر زۆلم و ستەما کۆمەلگێ بێی کو سەرەدەریا مرۆڤایەتی دگەل دا هاتبتە کرن وەك کەسایەتیەکا خودان هزر وبیر و ئاقلمەند دڤێ جڤاکێ دە بەلکو بەرۆڤاژی ڤێ چەندێ رفتار دگەلدا هاتیە کرن و ب چاڤەکی کێم سەرەدەری دگەل هەستێ وێ دە هاتیە کرن،دناڤ زۆربەیا مللەتێن رۆژهەلاتا ناڤین دە و جهێ داخێ یە مللەتێ مە ژی ئێك ژوان مللەتانە کو هەتا نها ئافرەت ب دڵەکی سار دهێتە کوشتن و ب تۆمەتا زنایێ دهێتە گونەهبار کرن ئەڤەژێ دیاردەکا مەترسیدارە و بەرۆڤاژێ هەموو رەوشت و تیتالێن گەلێ کوردە لەوما پیدڤیە لسەر تەڤایا مللەتێ کورد خۆ ژڤێ دیاردا خراب قورتال بکەت و سەرەدەریەکا شارستانی و ل هەژی ئاستێ و مەزناتیا ئافرەتێ دگەل دا بکەن هەروەها فەرە ل سەر هەموو دام و دەزگەهێن حکومی و ریکخراوێن پشتەڤانیێ ل مافێ ئافرەتێ دکەن ل سەرانسەری کوردستانێ دژێ هەر رەفتارەکا کو ئافرەتێ ب ئێشینێ راوەستن و ببنە پالدەر و پشتەڤانین وێ ژبۆ کو رۆلەکی کاریگەر وسەرکەفتی دناڤ کۆمەلگەها کوردی دە ببینێ و هەروەها ببنە پشتەڤان ژبۆ ئێکسانی و وەکهەڤیێ دناڤبەرا هەردوو رەگەزان دە ژبۆ ئاڤەدانکرنا کۆمەلگەهەکا سەردەم و پێشکەفتی و بێ گومان هەموو وەلاتین پێشکەفتی ل سەر ڤی بنەمایێ راست و دروست ب مافین خۆ شادو کامەران دبن و جڤاکەکا ئازاد پەیدا دکەن،هیڤیا سەرکەفتنێ ژبۆ ئافرەتا کورد ب هەموو پێکهاتەیێن کۆمەلگەها کوردستانی ڤە دخوازم.
تُتاح هذه الصورة أيضا في: کوردی