كوتلە… گەفا ژناڤچۆنا رێكخراوێ
دلدار محەمەد
راستە زانستێ كارگێری وەك تیور و ڤەكۆلین گەلەك قۆناغ برینە كاریە شرۆڤەیا گەلەك كوژیێن كارگێریێ بكت و بۆ پرانیا پرسێن هەلاویستی ژی چارەسەری ڤەدیتینە و هندەك ئەگەر ژی بەرچاڤ كرینە و قۆناغ بۆ قۆناغێ كاریە گهۆرینێن بەرچاڤ ب خۆڤە بگرت لێ دژیوارێ كارگێری و رێڤەبرنا رۆژانە یا دئێتەكرن دا هندەك تشت ب بەرچاڤ دكەڤن كو مرۆڤی تووشی مەندەهۆشیێ دكن،ژبەركو ب رەنگەكی ژ رەنگا مرۆڤ هەست دكت زانستێ دئێتە خووندن و ژیوارێ هەی هەر ئێك ژ وان د نهالەكێ دایە دەمێ مرۆڤ هەڤبەركرنێ بكت دگەهتە وێ باوەریێ كو نە ئەو سیكە و نە ئەو بازار !.
ئێك ژ وان دیاردان دیاردەیا هەبوونا گرۆپانە دناڤ كارگێریێ دا كو ب (كوتلە ) بناڤ و دەنگن دوو گرۆپ یان بتر ژی دێ دناڤ رێكخراوێ دا ئێنە هەبوونێ هەڤركیا هەردوویان بۆ بەردەوامیێ یە لسەر كورسیێ یان ژی بۆ بدەستڤەئینانا وێ یە،ئەڤجا ب گۆتگۆتك و پلان و كودەتایێن سپی و پرۆپاگەندەیێن دوری راستیێ ل بەرامبەر ئێك رادوەستن د ناڤ هندەك رێكخراوان كوتلەك ب سەر ئێكا دی دكەڤت و دناڤ هندەكان ژی دا بۆ دەمەكێ درێژ ڤەدكێشت!،ئەڤ دیاردە ل پرانیا وەلاتێن نووی پێدگەهن بەربەلاڤە، كو ب دیتنەكا زانستی ئەڤ هەڤركی یە ناكەفتە دناڤ چ سیستەم و تیور و قوتابخانێن زانستێ كارگێری دا، ژبەركو ئێك ژ بنەمایێن كو كارگێری ل سەر ئاڤا دبت و رێكخراو تێدا پێشكەڤت هەبوونا ئارمانجەكا هەڤپشكە دناڤ هەموو رێكخراوێ دا ب هەم پشكێن خۆڤە هەر ژ رێڤەبەریێ هەتا بلندترین و ئاسایی ترین كارمەند و كاربكن بۆ پێشكێشكرنا خزمەتەكا باش یان ژێ بەرهەم ئینانا بەرهەمەكێ ژ هەژی خەلكی و بكڕا،لێ ب هەبوونا گرۆپ و كوتلان ئەڤ چەندە بەروڤاژی دبت ژبەركو هەردوو گرۆپ دێ كاركن بۆ دیاركرنا روویەكێ كرێت یێ گرۆپێ بەرامبەر خۆ،كو هەلبەت ئەڤە دێ لسەر پشكا خەلكی یان بكری یان هەڤ وەلاتی بت، كوالێتیا بەرهەمی و جۆرێ خزمەتكرنێ ژی دبتە تشتێ لاوەكی!،هەروەسان د زانستێ كارگێری دا ئێك ژ خالێن سەركەفتن و بەردەوامیا رێكخراوان، رێزگرتنە ل پلە و پایێن ئاستێن كارگێری ئانكو هەر تاكەك د رێكخراوێ دا دێ هندی دەستهەلاتا وی هەی پشكداری پرۆسێسا رێڤەبرنێ بت و بریار و فرمان ژ دەستهەلاتا سەری بۆ خوارێ دێ ئاراستە بن و داخوازی و پێشنیار ژی ژ خوارێ بۆ سەری وەسان هەموو پرۆسە دێ تەمام بت ب بەرهەمەكێ باش و د دەمەكێ دەستنیشانكری و نەیێ درێژ دا، و هەر تاكەك دێ خودان رێز و ئەرك و ماف بت د كارگێریێ دا دێ كارن خزمەتەكا باش كەن و ناڤ ودەنگ و خزمەتا خۆ بۆ دەمێن درێژ ل گۆپیتكێ هێلن و هزر و وێنەكێ ئەرێنی دناڤ مێشكێ خەلكێ د ژینگەها ژدەرڤە دا بۆ خۆ پەیداكەن و دەم بۆ دەمی رێژا بكڕ و سەرەدانكەرێن وان دێ بەر زێدەبوونێ چت.
لێ یا ب چاڤ دئێتە دیتن ل هندەك جیان رێڤەبەر و جێگرێ خۆ دژی ئێكن و چ رێز بۆ پایەیا كارگێریا هەڤدوو نینە و هەرئێكی ژوان ژ هندەك كەسێن نێزیكی خۆ ددەنە دگەلدا و چ دانپێدان بۆ دەستهەلاتا هەڤدو نینە و هەولا شكاندنا لایەنێ بەرامبەر ددەن،ئانكو ل ڤێدەر سەر پێچیا دوو بنەمایێن كارگێریا سەركەفتی دئَتەكرن، ئەڤە ژی دێ ئایندەیێ رێكخراوێ بەرەف پاشەرۆژەكا نەدیار ڤەچت، لەوران باشترین چارەسەری بۆ ڤێ رەوشێ خووندنا زانستێ كارگێری یە ب رەنگەكێ بەرفرەهتر و سازیێن زانستی رۆلێ خۆ ب بینن دڤی بواری دا، داكو زانستێ كارگێری ل دەڤ وان كەسێن كو كار بدەست زانستەكێ كوڤی نەبت و رێڤەبرن ببتە ئارمانج و هەر تاكەك د رێكخراوێ دا ئەرك و ماف و سنوورێن خۆ بزانت، هینگی هەر ئەركەك و پایەكێ دێ سەنگ و بهایێ خۆ هەبت و هەر كەسەك دێ كاركەت بۆ بهاداركرنا ناڤێ رێكخراوا خۆ ئەڤە ژی دێ پرۆژێ سازیێ ژ مەترسیا گەهشتنا قۆناغا ژ ناڤچۆن و نەمانێ دوور ئێخت و دەمێ هاتنا ڤێ قۆناغێ بۆ سالێن دوور و درێژ دێ گیرۆكەت.
تُتاح هذه الصورة أيضا في: کوردی