بنگەهێ لالش:کۆمەلکوژیا ئێزدیان ر
استییە و پشتگێریا ب هەزاران بەلگەیان
ب سینگەکی بەرفرەهـ دیڤچوونا هەولێن نەتەوەین ئێکگرتی ئەوێن تێنە کرن دەربارەی وێ کارەساتا هۆڤانەیا ب سەرێ ئێزدیا هاتی ل سەر دەستێ تیرۆرستێن داعش ل تەباخا ۲۰۱٤ و ناساندنا وێ ب تاوانا کۆمەلکوژیێ (جینۆساید)، دئەنجامدا بڕیارین نێڤ دەولەتی یێن گرنگ دبەرژەوەندیا خەلکێ مە دا و ڕاکرنا هندەک ژ وێ زۆرداریا ب سەرێ وان هاتی ، هەروەسا ئەڤ پێشڤەچوونێن هەنێ نامەکە ڕۆن و واتادارە ژبۆ وان کەسێن دەست هەی ل کریارێن کوشتن و گرتن و سەرژێکرن و تالانکرن و کڕین و فرۆتنا کچێن مە کو یاسا و دادوەری دێ گەهتە وی کەنگێ مابت .
ئەم دزانین هەمی مرۆڤ دۆست و ڕێکخراوە و کۆمەلەیێن خێرخوازی و مرۆڤایەتی یێن ناڤخۆی و نێڤ دەولەتی و نێڤ نەتەوەیی ئەوا ب سەرێ خەلکێ مە هاتی ب گشتی و ل شنگالێ ب تایبەتی تاوانا کۆمەلکۆژی ب هەمی پەیڤ و واتایێن خوەڤە ، هەروەسا تیرۆرستێن داعش دڤیان ئێزدیا ژ ڕەهـ وڕیشالڤە ژناڤ ببەن ، و داگێرکرنا دەڤەرێن وان زێدەباری تاوانێن بازرگانیکرنێ ب کچێن مە ، و پێکۆلا سەپاندنا ئاینێ ئیسلامێ ل سەر ب هەزاران ژ گرتی و گرتێن ئێزدیا ب شیوەکێ زۆر پێچەوانەی هەمی ڕێسا و پەیماننامەی مرۆڤایەتی و نێڤ دەولەتی ، هەروەسا ب هەزاران بەلگەنامە و دیدەڤانیێن تۆمارکری هەنە ب ئالاڤێن جوداجودا ژ لایێ رزگاربووی و ڕزگاربوویان ژ دەستێ داعشێن تیرۆرست و ژ دیدەڤانێن ب چاڤ دیتی ، بەلکو دانپێدانێن ژلایێ ئەندامێن ڕێکخستیا توندڕەو دووپات دکەت ئەوا چێبووی تاوانا جینۆسایدە.
بێ گومان گەهاندن بۆ ڤێ قوناغا گرنگ ژلایێ ئێزدیاڤە ، نە ژڤالاتیەکێ هاتییە ، بەلکو ئەو بەرهەمێ هەولێن سەرۆکاتی و حکوومەتا هەرێما کوردستانێ یە و ل پێشیێ ڕێزدار سەرۆکێ هەرێمێ مەسعوود بارزانی و ڕێزدار سەروکێ حکوومەتێ ڕێزدار نێچیرڤان بارزانی ، ئەوێن کو بەردەوام ئێش و ئازارێن ئێزدیان گەنگەشەدکرن و دکرنە دەستپێکا بابەتێن چاڤپێکەفتنێن خۆ دگەل هەمی کەسایەتین نێڤ نەتەوەیی و دوبلوماسی ئەوێن دهاتنەکرن ل ناڤخۆیا هەرێمێ و تاکو ژدەرڤەی هەرێمێ.
زێدەباری پالپشتیا بێ سنوور ژلایێ حکوومەتا هەرێمێ بۆ کۆمێنتا بلند یا ناساندنا جینۆسایدا کوردێن ئێزدی ئەوا کو درێخی نەکری دکارێ خۆ دا ژبۆ کۆمکرنا ژمارەکا مەزن ژ دێدەڤانی و دانپێدانا و دانەیێن وان گەهشتینە بەردەستێ پتریا کۆمیتەیێن گرێدای ڤی کاری ل نەتەوەیێن ئێکگرتی . بۆ زانین بنگەهێ مە ٥۰۰ ڤیدیۆ درێژایا ٦۰ دەمژمێرا و تێدا ب دەهان دیدارو چیرۆکێن هاتینە بەلگەکرن ل ڕەخ ئازارێن ژمارەکا رزگاربوویێن ئێزدیا ژ دەستێ ڕێکخراوا داعش یا تیرورستی دانە کۆمیتەیا ل سەری دیار.
هەروەسا ئاماژێ دەنە وێ چەندێ کو نەتەوەیێن ئێکگرتی نەڕاوەستیایە ل سەر وێ چەندێ بتنێ کو ئەوا هاتی سەرێ مە جینۆسایدە ، بەلکو ئێک ژ ڤەکۆلەرێن سەر ب وێ ڤە دیارکریە کو هندەک گۆتن هەنە ل سەر دەست نیشانکرنا ناڤێن تاوانبارا ژ ڕێکخستیا داعش یا تیرورستی ئەوێن کو دەست هەی لقڕکرنا ئێزدیاندا دچارچۆڤێ گهۆڕینا پێزانیا دگەل هندەک دەولەتێن پێڤەگرێدای ، و ئەم ب هیڤینە ئەڤ پێکۆلێن هەنێ سەربگرن و نەهێنە ڕاوەستاندن ژبۆ پێشکێشکرنا وان کەسێن تیرورست بۆ یاسایێ داکو بگەهنە سزایێ خۆ یێ دادوەری.
دەستەیا بلندا بنگەهێ لالش یێ ڕەوشەنبیرێ و کۆمەلایەتی/ دهۆک
16/6/2016
تُتاح هذه الصورة أيضا في: کوردی