تۆرا لالش
کوردستان وارگەهێ ئێزدیان و شنگالیا یە، بتنێ ئاخ و وەلات ل جیهانێ ئێزدیان هەمبێزدکەت کوردستانە، ئەڤێن ئێزدیان ژ کوردستانێ و کوردایەتیێ دوور دئێخن هەر گاڤ د شەرمەزارن، ژ بەر کو هەبوونا ئێزدیاتیێ ل کوردستانێ هەر ژ دێر زەمان نامەکا ئاشکەرایە د دیرۆکێ دا.
به‌لگه ژی ئەوە ب تنێ ئێزدی ل سەر ئاخا کوردستانێ ماینە و هەینە و دێ هەبن، بەلێ ل سەر ئاخ و وەلاتێن عەرەب و تورک و فارسا هاتنە قڕکرن و بن ئاخ کرن و بێ ئۆل مان و ئێکی مای ژی ل ڤان سالێن بۆری هاتە کوشتن.
ئیرۆ ئەو بوختان و ده‌رەوێن دهێنە کرن کو دبێژن کوردستانێ رێز ل ئێزدیان نەگرتیە ب ته‌مامی به‌رۆڤاژی راسته، ژ بەرکو کوردستانێ ب خوینا خۆ بەرگری ژ ئێزدیان کریە.
1. کێ خوە ل ئێزدیان کریه خودان؟
ل بیرا مەیە و ل بەرچاڤێن مەیە فرمانا شنگالێ یا 3/8/2014 ئەوا داعش ب سەرێ ئێزدیان ئینایی، جهەک نەبوو ئێزدی هاوارا خو بگەهینێ ژ بلی سەرۆک بارزانی و کوردستانێ.
ئەو بوو خەلکێ کوردستانێ دەم ل دەست دەرگەهێن خوه ڤەکرن و د هاوارا شنگالێ چۆن و دەستێ هاریکاریێ بۆ وان درێژکرن و هەر تشته‌كی هەی ب لەز و بەز گەهاندنە بەر دەستێ وان و د ناڤا مالێن خۆ دا حەواندن و دەرگەهێن مزگەفتا ڤەکرن و خو ل ئێزدیان کرنە خودان.
ئەڤە بۆ جارا ئێکێ بوو ل فەرمانەکێ دا موسلمان خوه ل ئێزدیان بکەنە خودان و رێز و تەقدیرەکی ب ڤی رەنگی ل شنگالیان بگرن، ئەڤەژی ل سەر ڕاسپارده و فرمانا راستەوخۆ یا سەرۆک بارزانی بوو کو خەلکێ کوردستانێ هاتنە سەر خەتێ و خوه ل ئێزدیان کرنە خودان و پاراستن و نەهێلان دەستێن چەپەل یێن داعش بگەهنە ئێزدیان و هێلان ئێزدیاتی هەر بمینت.
هەر چەندە ل قۆناغا ئێکێ زەرەر و زیانەکا مەزن گەهشتە خەلکێ شنگالێ، رێژەیه‌کا مه‌زن هاتنە کوشتن و کچ و ژن هاتنە رەڤاندن و مال و ملکێن وان ل خوه حەلالکرن و قوب و هلێل و مەزارگەهێن ئێزدیان هاتنە هەرفاندن.
لێ د ئەنجامدا پێشمەرگه‌هێ قەهرەمان بەر سنگێ تیرۆرێ گرت و تۆلا ئێزدیان ڤەکر، دەولەتا ئیسلامی یا بناڤێ داعش ل سەر دەستێ پێشمەرگەی و هێزێن هەڤپەیمانان هاتیە ژناڤبرن و چەندین ئەمیر و چەکدارێن داعش ل سەر دەستێ پێشمەرگەهی هاتنە کوشتن و ژناڤبرن و کەلەخێن وان کەتنە بەر دەڤێ ئاژەل و بن پۆستالێن پێشمەرگەهی و تۆلا کچ و ژنێن ئێخسیر هاتە ڤەکرن.
جهێ سەرفرازیێ یە هەتا نهۆ ژی بتر نیڤا ئێزدیێن شنگالێ ل کوردستانێ ئاکنجی نە و ژین و ژیارا خوه یا ل بن چادرێ خۆشتر دزانن ژ ڤەگەریانا بن دەستێ داگیرکەر و بیانیان، چونکی شنگالی ب خۆ دزانن تنێ ب ئالایێ کوردستانێ و مل ب ملێ پێشمەرگەی دێ ب ئازادی ڤەگەرن و ل شنگالێ بژین.
ئەڤە ئەو قوربانی و بەرگری یە کو نابت بهێتە ژبیرکرن و نابت ب بوختانان بهێتە بەرزەکرن.
2. رێکەفتنا هەولێر و بەغدا – تاکە چارەسەریا شەرعی و یاسایی یه
هەر چەندە پشتی شنگال هاتیە رزگارکرن و هەتا ڤێ گاڤێ ژی هەولێن حکومەتا هەرێما کوردستانێ د بەردەوامن بۆ ڤەگەراندنا ئاوارەیێن شنگالێ و ئاڤەدانا شنگالێ، بەلێ شنگالی رەت دکەن ب ڤەگەرن ژ بەر هەبوونا هندەک هێزێن نەیاسایی ل شنگالێ و سەپاندنا بیروباوەرێن خۆ یێن نه‌شەرعی ل سەر خەلکێ، وەکی یەبەشێ و (پ ک ک) و حەشدا شەعبی و …هتد.
شنگالی داخواز دکەن پێشمەرگە و لەشکەرێ عیراقێ هەبن و یاسایەک هەبت ل شنگالێ، نەک دەسهەلاتا گرۆپێن چەکدار، لەوما باشترین و تاکە چارەسەریا ئیرۆ بۆ شنگالێ ئەوە:
جێبەجێکرنا رێکەفتنا شنگالێ یا دناڤبەرا حکۆمەتا هەرێما کوردستانێ و حکومەتا عیراقێ دا ب چاڤدێریا نەتەوەیێن ئێکگرتی، کو خالێن وێ ژی ئه‌ڤه‌نه:
1. ڤەگەراندنا ئیدارا شەرعی و هەلبژارتی یا سەر ب هەرێمێ ڤە و ڤەگەراندنا شەرعیەتێ.
2. دەرئێخستنا هەموو هێزێن نەشەرعی و بیانی ژ شنگالێ.
3. ڤەگەراندنا شەرعیەتا پێشمەرگەهی و لەشکەرێ عیراقێ و پۆلیسێ خۆجهـ.
4. ئاڤەدانکرن و قەرەبووکرنا خەلکێ شنگالێ.
رێگری کرن و بەرسنگگرتنا پێشمەرگەهی و پارتی ژ بۆ شنگالێ کارەکی نەرەوایە، ئەو هەلوێست و بەرخودانا کوردستانێ ژ بۆ شنگالێ و ئەو شەهید و قوربانیێن داین ژ بۆ رزگارکرنا شنگالێ، دڤیا شنگالی نەکەڤنە بن فشارەکا سیاسی و چ هیز و گەلێ کوردستانێ و ئێزدیان نەکەنە دوژمن و بەرسنگێ ئێک بگرن و ژێک ڤەکەن.
ئەڤ رێکەفتنە ژ لایێ (پ ک ک)ێ ڤە نەهێلا بهێتە جێبەجێکرن و خەلکێ مە سەردا بر و نوکە ژی پۆشمانن.
3. مەترسیا بەردەوام ل سەر شنگالێ
ئەڤا روودده‌ت ل شنگالێ مەترسیەکا مەزنە، (پ ک ک) هاتیە ل شنگالێ خو بکەنە خودان ب بەهانەیا ل فرمانا شنگالێ سالا 2014ێ هاریکاریا خەلکێ مە کری، نهۆ ل شنگالێ ئاسێ بوویە و حکومەتەکا ناڤخۆیی یا نەشەرعی ئاڤاکریە و هێز و چەکدارێن خو بەلاڤکرینە ل شنگالێ و رێگریێ ل هێزێن پێشمەرگەهی و لەشکەرێ عیراقێ دکەن و دبێژن ئەم خوه‌یێن شنگالێ نە.
هەبوونا (پ ک ک)ێ ل شنگالێ مەترسیەکا مەزنە ل سەر خەلکێ دەڤەرێ و شنگالی باش دزانن دێ شنگالێ بتر وێرانبت، نابت رێکێ بدەینێ بتە دەسهەلاتدار ل شنگالێ و ب زۆری خۆ ب سه‌پینت.
ژ بەر ڤێ چەندێ دەولەتا تورکیا هۆشداری دایە حکومەتا عیراقێ ئەگەر ئەو هێزێن بیانی و (پ ک ک)ی نە دەرئێخن ژ شنگالێ، دێ لەشکەرێ تورکیا هێرش کەنە سەر شنگالێ، ئەڤە مەترسیە ل سەر ئاسایشا نەتەوەیی یا تورکیا وەک ئەو دبینن و دوور نینە هێرشێ بکەت و ڤێ دەڤەرێ داگیربکەت و ئاسێ بت و گرۆپێن تورکمان و تەلەعفەری و کەرکوکی لێ خرڤەبن و بتە کێشەکا مەزن ل سەر عیراقێ ب گشتی و شنگالێ ب تایبەت و ئێزدی ژ رەهــ و ریشال ڤە بهێنە هەلقاندن.
لەوا ڤێ جارێ حکومەتا عیراقێ و لەشکەرێ وێ ب رژدی هاتینە سەر خەتێ و دەست ب ئۆپەراسیۆنێ کریە ل شنگالێ و دخوازت (پ ک ک)ێ دووركه‌ت ژ شنگالێ، ئەڤ چەندە د بەرژەوەندیا مە ئێزدیان دایە.
4. پەیاما دوماهیێ
شنگالی دڤێت بزانن کەس نینە خوه ل ئێزدیبا و شنگالیا بکەتە خودان ژبلی پارتی و بارزانی، ئەڤا دهێتە گوتن و دوورئێخستنا ئێزدیا ژ کوردستانێ و پارتی شکەستنەکا مەزنە بۆ ئێزدیان، ئێزدیان جهەک ل دنیایێ نینە کوردستان نەبت و ئەسلی کوردا ئێزدینە.
دگەل هندێ ژ جڤاکێ ئێزدیان ژی دهێتە خواستن ب ئێک دەنگ گازی (پ ک ک)ێ و حەشدا شەعبی بکەن کو شنگالێ چۆل بکەن، بچن گوند و باژارێن خو رزگار بکەن، شنگال نە جهێ وە یە، شنگال بریندارە و پاشمایێن 74 فەرمانا یە، گۆری سیاسەتا خو یا شاش نەکەن و برینێن مە بتر ڤەنەکەن، مە ئێزدیان بێ کەس و بێ وار نەکەن.
مە پارتی و بارزانی و کوردستان یێت هەین دێ مە پارێزن وەکی بلبلیكا چاڤێن خۆ.
بژیت کوردستان، بژیت شنگالا ئازاد ب ئالایێ کوردستانێ و پێشمەرگەی ڤە
تُتاح هذه الصورة أيضا في: کوردی