ئێكەتیا قوتابیان ب هەماهەنگی دگەل بنگەهێ لالش دێ هەیڤانە هاریكاریا 10قوتابیێن ئێزدی كت
تۆرا لالش یا راگەهاندنێ
دوهی رۆژا پێنج شەمبوویێ 12/1/2017ێ،دەستەیا بلندا بنگەهێ لالش ل دهۆكێ ب هەماهەنگی دگەل ئێكەتیا قوتابیێن كوردستانێ،ئاهەنگەكا هەڤناسینێ بۆ قوتابیێن ئێزدی ل زانكۆ و پەیمانگەها زاخۆ ئەنجام دا.
ئاهەنگێ دەستپێكر ب خۆلەكەك سەكنین ل سەر گیانێ جانگۆریێن كوردستانێ و كارەساتا شنگالێ،لدووڤ دا”شواف شنگالی”نوونەرێ قوتابیان ل پەیمانگەها زاخۆ و “عەزیز رەشو”نوونەرێ قوتابیان ل زانكۆیا زاخۆ پەیڤەك پێشكێشكرن و دووپاتكرن كو ئارمانج ژ ڤان چالاكیان بۆ هەڤناسین و هەماهەنگیا پترە دناڤبەرا قوتابیێن ئێزدی ل زانكۆ وپەیمانگەهێن زاخۆ،هەروەسا سوپاسیا ئێكەتیا قوتابیان و بنگەهێ لالش كرن بۆ پشتەڤانیا وان بۆ ساخكرنا رێ ورەسمێن ئاهەنگێ.
هەروەسا بەرێز”بارزان مستەفا”سەرۆكێ ئێكەتیا قوتابیان ل زاخۆ دپەیڤەكێ دە دووپاتكر كو پشتەڤانیا ڤان جۆرە چالاكیان ژ ئەرك و كارێن ئێكەتیا قوتابیانە ب تایبەت قوتابیێن ئێزدی ئەوێن ئیرادا خۆ ل هەموو قۆناغێن خووندنێ سەلماندین،ئاماژە ب رۆلێ قارەمانانە یێ خەلكێ شنگالێ كر ل بزاڤا رزگاریخوازا كوردی ب تایبەت رۆلێ وان ل ژناڤبرن و بەرهەنگاربوونا رێكخراوا داعش یا تیرۆرستی،ل داویێ ژی دووپاتكر كو خەلكێ زاۆ ژ رۆژانێن دەستپێكێ یێن كارەساتا شنگالێ و هەتا ئیرۆكە ب كەیف خۆشیانە پێشوازی ل خەلكێ شنگالێ كر و ئەڤە ئەركەكێ نەتەوەیی و مرۆڤایەتی یە ل هەمبەر خووشك و برایێن وان ل شنگالێ. ژبال خۆڤە بەرێز”جەعفەر سمۆ”بەرپرسێ راگەهاندنا دەستەیا بلندا بنگەهێ لالش دپەیڤەكێ دا دیاركر و دووپاتكر كو دۆسەیا قوتابیان ژ گرنگترین ئەولەویاتێن بنگەهی نە،پشتی گەفێن تیرۆری یێن ل قوتابیێن ئێزدی ل پەیمانگەه و زانكۆیێن مووسلێ ل سالا 2007ێ هاتینە كرن،بنگەهێ لالش ژ رۆژێن ئەولی دا لڤین كر و دەستپێشخەری كر بۆ پێكئینانا لژنەكا تایبەت یا گرێدایی ب ڤەگوهاستنا قوتابیێن ئێزدی كو ئەزمونێن خۆ ل پەیمانگەه و زانكۆیێن كوردستانێ بكەن ل وێ سالێ دا،پاش بنگەه بەردەوام بوو بۆ دووڤچوونا ڤێ دۆسێ ژ سالا 2007ێ و هەتا نۆكە،دیسان ژ پێكۆلێن مەزن یێن بنگەهی كرین ب تایبەت سەرپەرشتیا راستەوخۆ ژبال بەرێز”شێخ شامۆ”سەرۆكێ دەستەیا بلندا بنگەهێ لالش بۆ هاریكاریكرنا قوتابیان ب رێیا حكوومەتا هەرێما كوردستانێ جهێ سوپاسیێ یە،گۆتژی پرۆسا ڤەگوهاستنا قوتابیان ژ زانكۆیەكێ بۆ ئێكا دی یا ب زەحمەتە و پێتڤی وەختەكێ درێژە و نەیا ب ساناهی یە،سەرەرای هەموو ئاستەنگ و بەربەستان بنگەهی كاری پتری 9هەزار قوتابیان ژ هەردوو رەگەزان ڤەگوهێزت ب رێیا لژنا سەرپەرشتا ڤێ دۆسێ و برا”رەعەد تارق” رێكخەرێ لژنێ رۆلەكێ مەزن بۆ ڤی بابەتی هەبوو.
هەروەسا”جەعفەر سمۆ”شانازییا خۆ یا مەزن دەربری ب قوتابیێن شنگالێ ئەوێن تێكرایێن مەزن ب دەست خۆڤە ئیناین و ئەنجامێن باش ل هەموو قۆناغێن خووندنێ سەرەرای ئاوارەبوونێ و هەموو كاودانێن ب زەحمەت یێن دربازكرین كو دیوارێ ئاستەنگان شكاندن و سەركەفتن و ئەڤ دەستكەفتە بخۆ دبتە نامەكا مەزن بۆ دوژمنێن مرۆڤایەتیێ،ژئالیێ دیڤە رۆناهی ئێخستە سەر ڤەكرنا قوتابخانێن برایەتی(تاخی) كو بنگەهی ئاسانكاری كر و پێ رابوو ب تایبەت بەرێز”شێخ شامۆ”سەرۆكێ بنگەهی دووڤچوونا بابەتێ ڤەكرنا ڤان قوتابخانان كر و ئەوێن هاتینە ڤەكرن ل قەزا زاخۆ و كۆمەلگەهێن شاریا و خانكێ داكو قوتابیێن هێژا بكارن خووندنا خۆ تەمام بكن،ل داوییا پەیڤا خۆ دا داخواز ژ ئێكەتیا قوتابیان و سازیێن زاخۆ كر ب شێوەیەكێ بەردەوام پشتەڤانیا قوتابیێن ئێزدی ل زاخۆ بكن،ل سەر ڤێ داخوازیێ ئێكەتیا قوتابیان بریاردا ب هەماهەنگی لگەل بنگەهێ لالش هەیڤانە هاریكاریا 10قوتابیێن كێم دەرامەت بكن.
ژلایەكێ دی یێ ئاهەنگێ،قوتابیێن ئێكێ ل پەیمانگەه و كولیژێن زاخۆ هاتنە خەلاتكرن،لدووڤ دا چەند هۆزان ژبال قوتابیان هاتنە گۆتن و ئاهەنگ ب برگێن هۆنەری و مۆزیكێ ب داوی هات.
تُتاح هذه الصورة أيضا في: کوردی