هەتاکو نوکە ل دورێن سێ ھزار خێزانان ڤەگەریاینە باشیکێ
ئەڤرۆ نیۆز،زنار تۆڤی:
رێڤەبەرێ ناحیا باشیکێ راگەهاند کو ھەتاکو نوکە ل دورێن سێ ھزار خێزانا ل سنۆرێ ناحیا باشیکێ ڤەگەریاینە سەر مال و ملکێ خوە،لێ ھەتاکو نوکە چ ھاریکاری ژلایێ حوکمەتا عێراقێ بۆ مە نەهاتیە کرن.
زەنوون یونس رێڤەبەرێ ناحیا باشیکێ بۆ ئەڤرۆ نیۆز دیارکر:سنۆرێ ناحیا باشیکێ ٤٧ گوندان ب خوەڤە دگریت و رێژا وان خێزانێن ڤەگەریاینە سەر مال و ملکێن خوە ل گوندێ عومەر قامچی نێزیکی 600 خێزانانە و هەروەسا ل گوندێ خۆرسەباتێ 500 خێزان ڤەگەریاینە.
رێڤەبەرێ ناحیێ گۆت ژی:هەتاکو نوکە پتری 400 خێزانان ڤەگەریاینە سەر مالێن خوە ل ناڤ سەنتەرێ ناحیا باشیکێ و دھێتە چاڤەرێکرن ل دوماھیا ڤێ هەیڤێ ئەو خەلکێ ماین ژی ڤەگەرنە سەر مالێن خوە.
ئەو چەند ژی دیارکر:کو هەتاکو ئەڤرۆ ل دورێن(2500_3000) خێزانان ل ناحیا باشیکێ ڤەگەریاینە سەر مالێن خوە،هەروەسا رۆژانە ژی خەلک قەستا جھـ و وارێن خوە دکەن،دیسا نوکە ترس ژی ل سەر خەلکێ ناحیا باشیکێ نەمایە.
ناڤھاتی ئەو ژی گۆت:هەتاکو نوکە چ ھاریکاری نە ژلایێ حکومەتا ھەرێما کوردستانێ و نە ژلایێ حکومەتا عیراقێ بۆ دەڤەرێن مە نەھاتینە کرن، بتنێ پشتەڤانیا سەرەکی ژلایێ رێکخراوێن نێڤ دەلەتیڤە بۆ مە هاتییە کرن وەکو پرۆژەیێن ئاڤێ و کارەبێ.لەورا ئەم داخوازێ ژحوکمەتا ھەرێما کوردستانێ و حوکمەتا عێراقێ دکەین کو ھاریکاریا دەڤەرێن مە بکەن، چونکی پرانیا دەڤەرێن مە ژلایێ داعشێ یێن ھاتینە وێرانکرن و هەروەسا پتری 25 % ژ سەنتەرێ ناحیا باشیکێ هاتیە خرابکرن.
تُتاح هذه الصورة أيضا في: کوردی