پەنابەرێن ئێزدی ل لوبنان د رەوشەكا سەخت دانە
باسنيوز:
خێزانێن پەنابەرێن ئێزیدی یێن ژبەر شەری ژ سووریا ئاوارەی وەلاتێ لوبنانێ بووین، نهۆ د رەوشەكا ب زەحمەت و سەخت دا دژین.
كاوە خەتاری، بەرپرسێ رێكخراوا جڤین بۆ گەشەپێدانا جڤاكێ ئێزدی بۆ (باسنیۆز) راگەهاند: “وەك رێكخراوەكا تایبەت ب كارۆبارێن ئێزدیان ڤە مە سەرەدانا وەلاتێ لۆبنان كر و ژ نێزیك هایداری رەوشا خێزانێن ئێزیدی یێن ژ سووریا ئاوارەی وەلاتێ لوبنانێ بووین كر و هایداری رەوشا وان بووین و بۆ مە دیاربوو كو د رەوشەكا ب زەحمەت و سەخت دان دژین و دەمێ رەڤین ژبەر داعش وان بەلگەنامێن خۆ ژ دەست داینە و رەوشا وان یا ئابووری ژی گەلەك یا ب زەحمەتە”.
خەتاری ئەو چەندە ژی دایە دیاركرن كو پەنابەرێن ئێزیدی بۆ مە دووپاتكرن چو دەزگەه و رێكخراوێن دەولەتی یان ناڤخۆیی نینن پشتەڤانیا مادی پێشكێشی وان بكەن ژ دەمێ ئاوارەبووین ژ سووریا بۆ لوبنانێ، پشتی رووبەرووبوونێن سەربازی یێن چێبووین دناڤبەرا گرۆپێن چەكدار دا ل وێدەرێ.
ل سەرانسەری دەڤەرێن ئێزیدیان هەوەكا مەزن بۆ كۆمكرنا هاریكاریان بۆ ئاوارە و پەنابەرێن ئێزیدی ل رۆژئاڤایێ كوردستانێ و ل وەلاتێ لوبنانێ دێ دەست پێ كەت.
كاوە عیدۆ خەتاری، راگەهاند ژی: “ژ ئەگەرێ ململانێ و شەری ل سووریا چەندین خێزانێن ئێزیدی نەچاربوون ئاوارەی وەلاتێ لوبنانێ ببن و نهۆ د رەوشەكا گەلەك ب زەحمەت دا دژین و پێدڤی ب هاریكاریانە، ل پەی گۆتنا وان ئەڤە ماوێ سێ سالانە وان مامەلێن خۆ پێشكێشی (UNHCR) رێكخراوا نەتەوەیێن ئێكگرتی كریە و هەتا نهۆ بەرسڤا داخوازیێن وان نەدایە، وان پاسپۆرت نینن و داخوازێ ژ رێكخراوێ كۆچێ دكەن وان بیننە هەرێما كوردستانێ یان ببنە كەنەدا یان وەلاتێن ئەورۆپی”.
ئەو چەندە ژی ئاشكەراكر:”پەنابەرێن ئێزیدی ل وەلاتێ لوبنانێ یێ تووشی سڤكاتیێ دبن وهەر كەسێ بزانت ئەو ئێزیدی نە یێ زۆری و زۆرداریێ ل وان دكەن”.
بەرپرسێ رێكخراوێ ئەو چەندە ژی ئاشكەراكر:” ل سەرانسەری دەڤەرێن ئێزیدیان ل هەرێما كوردستانێ هەوەكا مەزن بۆ كۆمكرنا هاریكاریان بۆ ئاوارە و پەنابەرێن.
ئێزیدی ل رۆژئاڤایێ كوردستانێ و وەلاتێ لوبنانێ دێ دەست پێ كەین،ژبەركو ئەو پێدڤی ب هاریكاریێن بلەزن و درەوشەكا ب زەحمەت دا ژیانا خۆ دبۆرینن”.
بەرپرسێ رێكخراوا جڤین رۆنكر ژی كو نەتەوەیێن ئێكگرتی ل لوبنانێ ژڤان دایە ڤان پەنابەرێن ئێزیدی و ل پەی گۆتنا پەنابەران ئەڤە ماوێ سێ سالانە وان مامەلێن خوە پێشكێشی (UNHCR) و رێكخراوا نەتەوەیێن ئێكگرتی كریە و هەتا نهۆ بەرسڤا داخوازیێن وان نەدایە.
خەتاری ئاماژەكریە داخوازێ ژ نەتەوەیێن ئێكگرتی دكەین ڤان پەنابەرێن ئێزیدی بێخیتە د بەرنامێ كۆچكرنێ دا بۆ كەنەدا و ئەورۆپا.
تُتاح هذه الصورة أيضا في: کوردی