زارۆكێن ئاوارێن ئێزدی ل كەمپان دبن تەمەنێ هەژدە سالیێ دا كار دكن
تۆرا لالش یا راگەهاندنێ
كاركرنا زارۆكێن ئاوارێن ئێزدی ل كەمپان دبن تەمەنێ هەژدە سالیێ دا بەربەلاڤ بوویە و ل پێ یاسایێن نێڤ دەولەتی نائێتە قەبوولكرن،پێخەمەت كاری چەندەها زارۆكان قوتابخانە هێلایە بۆ خێزانێن خۆ كار دكن ژبەر بارێ ئابووری یێ لاواز تێدا دژین.
(دیار)زارۆیەكی دبن تەمەنێ هەژدە سالیێ دایە ل كەمپا ئێسیان ئاكنجی یە كار دكت بۆ رۆژناما دەنگێ لالش گۆت:قوتابی مە ل قۆناغا ناڤەندی ل وەرزێ خوندنێ دچمە قوتابخانێ و ل دەمێ بێنڤەدانا ب ناچاری ڤە كار دكەم و پرسیارا زەحمەت و گرانیا كاری ناكەم بەرامبەر وەرگرتنا دراڤەكی كێم ژبەر بارێ ئابووری یێ لاواز یێ خێزانا خۆ،بابێ من یێ نەخۆشە ونكارت كار بكت و ئەگەر كار نەكەم دێ ژیانا مە زۆر ب زەحمەت كەڤت و كارێ من دابینكرنا پێتڤیێن مالێ یە بۆ خێزانا خۆ،دیسان هندەك زارۆكێن دی ژی هەنە قوتابخانا خۆ هێلاینە و بۆ خێزانێن خۆ كار دكن.
نوونەرێ رێكخراوا دەنگێ پیران و خێزانێ ل كەمپا ئێسیان(دلدار باپیر) بۆ رۆژناما دەنگێ لالش خویاكر،ل پشكا پاراستنا زارۆكان كاردكەین و مە ئاگەه ل بتریا ئاریشێن زارۆكان ل بن تەمەنێ هەژدە سالیێ دا هەیە و گەلەك ژ وان ئاریشان چارەسەركرینە،كاركرنا زارۆكان ل ڤی تەمەنی دا یا بەربەلاڤ بووی و ل پێ یاسایێن نێڤ دەولەتی نائێتە قەبوولكرن،لێ ب مخابنی ڤە ژ ئەنجامێ جینۆسایدا بسەرێ ئێزدیان ل شنگالێ هاتی و بتریا خەلكێ مە كەفتنە بارەكی ب زەحمەت دا و بارێ وان یێ ئابووری لاوازبوو،ڤێجا ناچاردبن زارۆكێن خۆ بدەنە كاری بۆ دابینكرنا پاریێ ژیانا خۆ،دبینم بتریا وان زارۆكان ژ ناچاری كاردكن بەلێ رێژەك هەیە نە بۆ خێزانێن خۆ كاردكن بەلكو بتنێ بۆ كەسایەتیا خۆ و مە هندەك حالەتێن بڤی شێوەی سەكناندینە ئەوێن كو هندەك كەس ل ناڤ خێزانێن وان دا هەین كاربكن و زارۆكێن تەمەن كچك دشاندنە سەر كاری.
رێڤەبەرێ كەمپا مام رەشان(شێرۆ سمۆ) بۆ رۆژناما دەنگێ لالش دبێژت:كاركرنا زارۆكان دیاردەیەكا ترسناك ونەرێنی یە لسەر نفشێ نوو ئەگەرێ سەرەكی یێ زارۆكان پال ددەت بۆ كاری ئەوە شەر و بارودۆخێن ب زەحمەتن،ژلایەكی دی ڤە هندەك خێزانا بتر ژ نەخۆشیەكێ دناڤ مالێ دا هەیە و پێتڤی دراڤی هەیە بۆ چارەسەریێ،رێكخراوێن دناڤ كەمپان دا كار دكن هاریكاریێ بۆ وان خێزانان ناكن لەورا ب ناچاری ڤە ئەو زارۆك كار دكن بۆ چارەسەریا وان نەساخان،ئەڤە دێ ب شێوەیەكی نەرێنێ كارتێكرنێ لسەر ژیان و گەشەیا مێشكی و لەشێ زارۆكان و پاشەرۆژ و ژیانا وان یا خووندنێ كت.
تُتاح هذه الصورة أيضا في: کوردی