شیرەتكارێ سەرۆكێ هەرێمێ:سەرۆكێ هەرێما كوردستانێ ل ئاستێ نێڤ دەولەتی كار بۆ چارەسەركرنا پرسا شنگالێ دكت
تۆرا لالش:
شیرەتكارێ سەرۆكێ هەرێما كوردستانێ بۆ كاروبارێن ئێزدیان دیاركر، سەرۆكێ هەرێما كوردستانێ نێچیرڤان بارزانی نامەیێن فەرمی ئاراستەی جڤاتا ئاساییشا نێڤ دەولەتی و ئەنجوومەنی كریە بۆ پرسێن هەلاویستی یێن دناڤبەرا حكومەتا هەرێمێ و عێراقێ دا بێنە چارەسەركرن،هەروەسا كار ژبۆ چارەكرنا پرسا شنگالێ ژی دكت.
حسێن قاسم حەسوون، شیرەتكارێ سەرۆكێ هەرێما كوردستانێ بۆ كاروبارێن ئێزدیان بۆ رۆژناما دەنگێ لالش دیاركر،رەوشا ئێزدیان گەلەكا ب زەحمەتە ژ هەموو ئالیان ڤە،ژ ئالیێ دەستووری كو ماددەیا(140) نەكەفتیە دبیاڤێ ب جهئینانێ دا،ئەگەر ئەڤە ماددە هاتبا ب جهئینان دبوو ئەڤ جینۆسایدا هندا مەزن ب سەرێ ئێزدیان ل شنگالێ ل سالا(2014)ێ نەهاتبا،هەروەسا ئەڤ رێككەفتنا دناڤبەرا حكومەتا هەرێما كوردستانێ و حكومەتا عێراقێ دا هاتیە كرن ریككەفتنەكا دەستووری یە و ب رەزامەندیا نەتەوەیێن ئێكگرتی و هندەك لایەنێن نێڤ دەولەتی و چەندین وەلاتان هاتیە كرن،لێ مخابن ئەڤ رێككەفتنە وەك خۆ نەكەفتیە دبیاڤێ جێبەجێكرنێ دا، ئەڤە ژی رامانا هندێ یە،كو رەوش نەیە ئارامە ل وان دەڤەران و كێشەیێن ئالۆز هەینە و گۆت:((سەرۆكێ هەرێما كوردستانێ نێچیرڤان بارزانی ژی نامەیێن فەرمی ئاراستەی جڤاتا ئاسایشا نێڤ دەولەتی و ئەنجوومەنی كرینە بۆ پرسێن هەلاویستی دناڤبەرا حكومەتا هەرێێ و عێراقێ دا بێنە چارەسەركرن،سەرۆكێ هەرێمێ ب رێیێن دیبلۆماسی دخوازت كێشەیان چارسەر بكت،چنكو كێشەییا ماددێ(140) و ئەو ناڤچەیێن ل ڤی سنووری پێتڤی ب چارسەرەیەكا نێڤ دەولەتی نە ژبەركو حكومەتا عێراقێ سەرێ چەندین سالایە خۆ ژ ڤی ماددێ دەستووری ددەتە ئالییەكی و ناخوازت جێ بەجێ بت،ژبەر هندێ ژی سەرۆكێ هەرێمێ ل دەرگەهێن جیهانا دەرڤە ددەت بۆ چارەسەریا كێشەیان)).
ئاشكەراكر ژی هێشتا ب هەزاران كەس ئاوارەنە ل هەرێما كوردستانێ هەرچەندە كوردستان مالا ڤی خەلكی یە،بەلێ دڤێت رێگە چارەیەك بێتە دیتن بۆ ڤەگەراندنا ئاواران ئەو ژی ب هەلبژارتنا ئاوارەیان بت و جیێن وان بێنە ئاڤاكرن و خزمەتگۆزاری بێنە دابینكرن و ئاسایش و تەناهی ڤەگەرتە ناڤچەیێ و ژیانا ئاسایی ڤەگەرتەڤە و دڤێت گەرەنتی هەبت،بۆ ڤێ چەندێ ژی كارەكی دەستووری و پێكهاتنەكا جڤاكی و دادپەروەری و دادگەهكرنا تاوانباران و پشتەڤانیەكا نێڤ دەولەتی و نافخۆیی بۆ دڤێت.
شیرەتكارێ سەرۆكێ هەرێما كوردستانێ بۆ كاروبارێن ئێزدیان دیاركر،پێتڤیە ل ئاستێ نافخۆیی و هەرێمی و نێڤ دەولەتی كارەكێ جددی بكەین،كو كێشەیا شنگالێ چارەسەركەین و چارەكرنا وێ ژی حكومەتا عێراقێ و هەرێما كوردستانێ یە و هەردوو ئالی د پێگیرن بڤێ چارەسەریێ ژ ئالیێ دەستووری و یاسایی و ئەخلاقی دڤێت ڤێ كێشەیێ چارەسەر بكەین.
حسێن قاسم حەسوون خویاكر ژی دڤێت هێزێن نەیاسایی و نە شەرعی ناڤچەیێ بجهـ بهێلن و رێزێ ل بریارا خەلكێ مە بگرن و دابنە ڕێكخۆشكەر بۆ هندەك ئالیێن دی بێنە دناڤچەیێن مەدا و ئاریشە بێنە دروستكرن، هێشتا چارەنڤیسێ زێدەتری دوو هەزار كەسێن ئێزدی یێ دیار نینە،دڤێت بزاڤەكا نێڤ دەولەتی و نافخۆیی بۆ ڤان كارا هەبت دا چارەنڤیسێ وان بێتە دیاركرن،دیسان دڤێت ئەم ل دژی وان بزاڤان ب سەكنین ئەوێن دخوازن شنگالێ ژ كوردستانێ جودابكن، ئەڤە ژی گاڤەكا مەترسیدارە چنكو هندەك ئالی ب پلان كار بۆ هندێ دكن و ئەڤە ژی دێ زیانێ ب كەیسا ئێزدیان گەهینت.
دووپاتكر ژی لیژنەیا یونیتاد بەلگەیێن باش كۆمكرینە دەربارەی پرسا جینۆساید ناساندنێ،پەسەندكرنا دادگەهەكا تایبەتمەند بۆ تاوانێن داعشێ ژی ل هەرێما كوردستانێ ژ ئالیێ جڤاتا وەزیرێن هەرێما كوردستانێ ڤە پێنگاڤەكا گرنگە و ب گرنگ ل قەلەم ددەین.
تُتاح هذه الصورة أيضا في: کوردی